Esodo 30 - Iaai Bible 1901 (New Caledonia)

¹ KE u me he ka tibet tap hnân leû utö ae bo so hon: u me he ka tibet e ge utö öhum.

² Khaca kubit ibeûen, me khaca kubit ûlauen; kʼ ame he ka tha ûcû je hwenöiny a vak: kʼ ame he ka lo li kubit ibeûen goranyai, kʼ ame he ka tha khaca me je baitoiny.

³ Ke u me he ka tube e ge gol ae so, wale hon, me hnyi je ke keihen igigilöâ, me je baitoiny; ke u me he ka bi koronainy a gol igigilö e.

⁴ Ke u me he ka ânyâ vak ta otru gol ka hnyi hmelen haten, hnyi li vhaken, wale hnyi li ke keihen; ke wale hnen li venyâ hnân vadren.

⁵ Ke u me he ka ânyâ li venyâ öhum, me tube ge gol.

⁶ Ke u me he ka ip e hnyi hnyimakan singiny cicö tang hnân ohnatho hnyi hnyimakan taben ibetengiö wale hon ûnyi hnân ohnatho, dok oge me he ka iouny möu hnyin.

⁷ Ke hamö Arona he ka le hon e je utö ae bo so: kʼ ame he ka le hnyi je hnyomakatu, e ka ânyâwia je lamepa.

⁸ Ke ka he Arona ka vâc je lamepa hnyi je sahac, me ame he ka le e, ke wale thibi e hnân bo so bala hnyi hnyimakö Iehova, hnyi anyibun ta je dö hia.

⁹ Ca he öbun ka hudo hon ke je utö bi ae bo so, me je hut adre le, me je hut hnân han; ke öbun e ca he ka hudo hudiny ic hon e.

¹⁰ Ke ame he Arona ka okhaca bi hwaban möt hon je baitoiny hnyi je huna: e ame he ka okhaca bi hwaban möt hon e hnyi je huna ge dra hnân hudiny hwakecin ae monu hnân bi hwaban möt hnyi anyibun ta je dö hia: e ti kap e kö Iehova.

¹¹ Ke Iehova ame ha kö Mose, ka habe,

¹² U ka he ka aû ûseiny lakon Isaraela hoton numeraidra, haba hnyi ûen e adre me he ka ve bi hwaban anyidra möt kö Iehova, u ka öû odra; me me ca he ka hu mok unyidra u ka öû odra.

¹³ Walang ûnyi adre me he ka ve ham, odra ka hanyâûâ hnyi hna öû odra, ûsa haf sekel, helâ me sekeliny dok ae kap: (haba sekel twente je gera:) haba hut kö Iehova, me, haf sekel.

¹⁴ Haba tavat hia adre me hanyâûâ ka hnyi tavat adre hia but aû, hwân ge tavat a twente huna me gan hon e, adre me he ka ve bi hut kö Iehova.

¹⁵ Ame ca he tavat tren omjeû ka ham gânâ, kʼ ame ca he tavat ae ba ta ûnyi ka ham oûhnyûkongoâ, ke haf sekel cici thibi, hnyi ûen adre bi hut kö Iehova, hnân bi hwaban anyibun möt.

¹⁶ Ke u me he ka hom mone hwaban möt unyin lakon Isaraela, me ip hobi kâu huliwa hnyi uma ûkhacaköu; me me hnân oûnykûmeâ ka lakon Isaraela hnyi hnyimakö Iehova hnân bi hwaban anyibun möt.

¹⁷ Ke Iehova ame ha kö Mose, ka habe,

¹⁸ U me he minya ka ânyâ taben soû a bras, kʼ ame he ka bras je can, hnân soû: ke u me he ka ip e hnyi wanben uma ûkhacaköu me taben hut, ke u me he ka hingâlâ köiö hnyin.

¹⁹ Kʼ ame he Arona me lakon ka hinyem hnyin me osûâ je cadrin:

²⁰ odrin ka didrö ka hnyi uma ûkhacaköu odrin e he ka soû ge köiö, wâ odrin e mokcu; helâe minya, odrin ka hakekenyâ taben bi hut he ka huliwa me le hut a an ge meic kö Iehova;

²¹ helâe odrin e he ka hinyem me osûâ je cadrin, wâ odrin e mokcu: ke wale hnanyibu ködrin nyiele balua, hobi kâu, me je mâtrâniny hnyi anyidrin ta je dö hia.

²² Ke Iehova ame ha kö Mose, ka habe,

²³ U me he ka hom je ûnyi ae bo so ae ûnyi hnathu, wale muro ae köiö a faiv haded je sekel, ke hafiny e kinamo ae bo so, wale lo li haded ke fifte,

²⁴ me kasia a faiv haded je sekel, helâ me sekeliny dok ae kap, me tap wakaco elaio a khaca hin:

²⁵ ke u me he ka ânyâ e me wakaco hnân hû ae kap, wakaco ae bo so adre ûhaniken helâ me hna huliwan hnen at ame bi wakaco; ke wale wakaco hnân hû ae kap.

²⁶ Ke u me he ka hû uma ûkhacaköu hnen ûnyi e, me tang hnân ohnatho,

²⁷ me laulau me je omjehen, me taben lamepa me je omjehen,

²⁸ me tap hnân leû ûnyi ae bo so, me tap hnân leû hut me je omjehen, me taben soû me je can.

²⁹ Ke u me he ka okabâ je ûnyi e, me me ti kap: ame he ka kap ta je ûnyi hia ame kâlâ.

³⁰ Ke u me he ka hû Arona me lakon, me okabi odrin, mʼ odrin e hnyat bihut könya.

³¹ Ke u me he ka ha ka lakon Isaraela, ka habe, Wale thibi e wakaco ae kap hnân hû könya hnyi anyibun ta je dö hia.

³² Ca he ka hingâlâ e hon unyin at, ke ca he öbun ka ânyâ ûnyi helâe, helâ me önyen: e kap, kʼ ame he ka kap köbun.

³³ Ke haba at ame he ka ûhaniken ûnyi helâe, me ip hanen hon ke atkanyua, me adre me he ka ohia at e ûnyi hnyi iny hnyei.

³⁴ Ke Iehova ame ha kö Mose, ka habe, U me he ka hom je ûnyi ae bo so, wale natafa, me sekeletha, me kelibena; je ûnyi ae bo so tha e me libanu ae so: ûsa khaca thibi ihmakiny;

³⁵ ke u me he ka ânyâ e hnân bo so adre le me ûhaniken helâ me ihuliwainy at ame bi wakaco, adre ûnyaköuâ ae so me kap:

³⁶ ke u me he ka kot omomono ke keihen, me ip cicö ûnyi hnân ohnatho hnyi uma ûkhacaköu, wale oge me he ka iouny möu hnyin: ame he ka ti kap e unyihun.

³⁷ Ke haba ûnyi ae bo so u me he ka ânyâ, ca he öbun ka ânyâ hobi köbun helâ me önyen: ame he ka kap e unyâmhobi kö Iehova.

³⁸ Ke haba at ame: he ka ânyâ ûnyi helâe hnân hnulâ, me adre me he ka ohia e ûnyi hnyi iny hnyei.