Esodo 3 - Iaai Bible 1901 (New Caledonia)

¹ KE haba Mose ame tuö hnahat mamoe hale Jethero a ûngon, at bihut e Midiana; kʼ ame alen hnahat mamoe ka hnyi hoton hnyebuba, me o ka hnyi bucen anyin Khong, wale Horeba.

² Ke ame manen kâu angela anyi Iehova hnyi bâhlân meic hnyi wanben ûö ae ûdedö: ke ame wâ, me wâ bi, ame hlâ meic hnyi ûö, kʼ ame ca aû but ûö.

³ Ke haingö Mose, ka habe, Oge me he walang ang ka saû, me wâ ûnyi ae gan eang, anyin ame ca aû but geû ûo.

⁴ Ke a wâ but Iehova, a e ame saû ka wâ, me haba Khong ame hawâ e ûnyi hnyi ûö ae ûdedö, me ha, ka habe, Mose, Mose lö. Ke haingen, ka habe, Inya ang.

⁵ Ke ame thu, ka habe, Ca hakekeny bi kââng: uny jut taben li hnyeûcam ûnyi hnyi li cam, anyin a haba dok e u me tot hnyin, me, wale kânâ ae kap

⁶ Ke e ame ha minya ka habe, Inya ang Khongon kâmâm, me Khongu Aberahama, me Khongu Isaaka, me Khongu Jekob. Ke Mose ame tube hnyimakan; anyin a e ot ka wâ Khong.

⁷ Ke Iehova ame ha, ka habe, Inya oge hia but wâ hna okongoâ lakeik walödra hnyi hnyei Aigupito, me löng anyidra tenge ûnyi ge je tuhan anyidra huliwa; anyin ae khanö nya anyidra vec;

⁸ kʼ oge me utut ang he ka hûgûnʼ ödra ûnyi hnyi hnyamen at Aigupito, me hum ödra ûnyi hnyi hnyei eling ka hnyi ke hnyei ae so me au, a hnyei ame di hnyin debai me hane; a hnen at Kanana, me at Heth, me at Amora, me Perizi, me Hivi, me Jebusi.

⁹ Ke walang ang, wâ bi, ame o but könya hwatenge anyin lakon Isaraela: ke haba khaca, oge hia but wâ ûokonguny hnen at Aigupito hna oveci odra.

¹⁰ Anyin a wale aiö u, oge me he ka kunö u ko Farao, mʼ u ma he ka hom lakeik a lakon Isaraela, ûnyi hnyi Aigupito.

¹¹ Ke haba Mose ame ha ka Khong, ka habe, Iny ia, mʼ oge me he ka he kö Farao me he ka hom lakon Isaraela ûnyi hnyi Aigupito.

¹² Ke ame ha, ka habe, Inya oge me he ka tha e möu; ke walang haten köu hnyi hnök hna kunö u, ka habe, U ka um dö hom tavat ûnyi hnyi Aigupito, öbun e he ka bi athnyabainy Khong hnyi hon bucen eang.

¹³ Ke haingö Mose ka Khong, ka habe, Wâ bi, iny ka o ka je lakon Isaraela me ha ködra, ka habe, A kunö nya köbun Khongon lakamöbun; ke adre me he ka ha könya, ka habe, Ia ien? oge ma he ka thu ködra ieû?

¹⁴ Haba Khong ame ha kö Mose, ka habe, inya ang a e, ke ka inya ang: ke e ame ka, ka habe, U ma ha helâng ka lakon Isaraela, ka habe, inya ang at a hia but kunö nya köbun.

¹⁵ Ke Khong ame ha minya kö Mose, ka habe, U ma he ka ha helâng ka lakon Isaraela, ka habe, A hia but kunö nya köbun Iehova, Khongon, lakamöbun, a Khongu Aberahama, me Khongu Isaaka, me Khongu Jekob; wale iök nyiele balua, ke wale hnân ûnykûmi nya hnyi ta je dö hia.

¹⁶ He thö u he ka ûkhacaköuâ wahingatiny Isaraela, me ha ködra, ka habe, A manen dut könya Iehova, Khongon lakamöbun, Khongu Aberahama, me Khongu Isaaka, me Khongu Jekob, me ame ha, ka habe, Inya oge hia but senʼ öbun, me wâ ta je ûnyi adre ânyâ köbun e Aigupito:

¹⁷ kʼ oge hia but ha a oge me he ka hum öbun ûnyi hnyi ta je vec hnyi Aigupito ka hnyi hnyei iny at Kanana, me Heth, me Amora, me Perizi, me Hivi, me Jebusi, wale hnyei ame di hnyin debai me hani.

¹⁸ Ke adre me he ka löng hwâm: ke u ma he ka tha he me wahingatiny Isaraela ka than Aigupito, kʼ öbun e he ka ha kâu, ka habe, A hia but iouny möhmun Iehova Khongon at Heberu: ke walang ang, ö u hnʼ ohmun dut he ka he ka hnyi hnyebuba hnyi kun ta bong, he ka bi hut kö Iehova a Khonguhmun.

¹⁹ Ke manen könya a gʼ ame ca he than Aigupito ka hnʼ öbun, ke so bi hnen hnyamen ae hwege.

²⁰ Ke oge me he ka hai hnyamok me kot Aigupito ge ta je ûnyi hnân lâiâ, wale oge me he ka ânyâ eling: ke hwaban dö e, e ame he ka hnʼ öbun.

²¹ Kʼ oge me he ka okûâ ibetengiö ka tavat eang ûnyi ge at Aigupito: kʼ öbun ka he but, me öbun e ca he ka he me ba ta je omjeû:

²² kʼ ame he omomo hia ka ve sumâ â unyin at ame laba hakekenyi odra, me unyin tavat adre me tha laba hnyi umödra ta je uma, je hmanenanginy sileva, me je hmanenanginy gol, me je ûkhaû: kʼ öbun e he ka otheibâ lakubun obaga me wahlu; mʼ öbun e he ka öba omjeûiny hnyei Aigupito.