Esodo 28 - Iaai Bible 1901 (New Caledonia)

¹ KE hom dö köu Arona a tuhâm me je lakon a tha odrin me, ûnyi hnyi lakon Isaraela, mʼ odrin e he ka huliwa könya hnyi je hanymen at bi hut; Arona, me Nadaba, me Abiu, me Eleazara, me Ithamara, a je laku Arona.

² Ke u me he ka tibit je ûkhaû ae kap hobi kö Arona tuthâm, ûnyi ae mec me hmanenang.

³ Ke u me he ka ha ködrin hia hnyat ae metâ hnyok, wale hnyat oge hia but ounö-ngötâ ge metâ, mʼ odrin e he ka tibet je ûkhaûö Arona, mʼ adre me okhabâ me me at bihut könya.

⁴ Ke walang je ûkhaû adre me he ka tibet, ka habe, tubwiny ûlainy, me iefoda, me ûkhaû ae beû, me ûkot ae hu hnalimen, me hnabinybak, me wen hnyekon: adre me he ka tibet je ûkhaû ae kap hobi kö Arona tuhâm, me je lakon, me me at bihut könya.

⁵ Kʼ adre me he ka hom gol, me mano ae udrudrâ, me udrudrâ hlit, me dra vec, me lino ae ûhnyûkong nân.

⁶ Kʼ adre me he ka tibet iefoda gol, me mano ae udrudrâ, me udrudrâ hlit, me dra vec, me lino ae ûhnyûkong nân adre seveny a huliwan hnyat ae metâ.

⁷ Ame he ka hu ke mano hon li bajebenyin adre ûtibetköuâ hnyi li hnyiban; me me khaca thibi.

⁸ Ke haba wen iefoda adre hwâwâ metâ, hnân he ka okhavâ, adre me he ka huliwan a tha ûcû me, me khaca me; wale gol, me mano ae udrndrâ, me udrudrâ hlit, me dra vec, me lino ae ûhnyûkong nân adre seveny.

⁹ Ke u me he ka hom li veto soama, me kave hon ien lakon Isaraela:

¹⁰ siks je iödrin hnyi ke veto, ke siks minya je ien hnyi ke veto, hoton je ûtangköu.

¹¹ U me he ka kave hon li veto je ien lakon Isaraela, ge huliwa anyin at ame khavi veto, helâ me bongon kave ûnyi hnân bi haten: u me he ka ânyâ me ohmâ hnyi li gol hnân taben.

¹² Ke u me he ka ohmâ li veto ka hnyi hon li bajebenyin iefoda, me me li veto hnân oûnykûmeâ ka lakon Isaraela: kʼ ame he Arona ka hom je iödrin hyi hnyimakö Iehova hnyi hon li bajebenyin hnân oûnykûmeâ.

¹³ Ke u me he ka ânyâ li gol hnân taben:

¹⁴ ke u me he ka ânyâ li cein gol ae so adra khenyö helâ me tö, me ohmâ li cein adre khenyö ka hnyi li taben.

¹⁵ Ke u me he ka ânyâ tubwiny ûlainy hnân owisa a huliwan hnyat ae metâ; u me he ka ânyâ e helâ me ihuliwainy iefoda; u me he ka ânyâ e ge gol, me mano ae udrudrâ, me udrudrâ hlit, me dra vec, me lino ae ûhnyûkong nân adre seveny.

¹⁶ Ame he ka khaca tulut je baten a vak, kʼ adre thu; haba tulut, me, khaca hnyam ibeûen, ke khaca hnyam ûlauen.

¹⁷ Ke u me he ka ip hnyin je deö veto, a vak ta deö veto: haba dö a bân, me, sadis, me topazio, me bereketh:

¹⁸ ke haba dö a loiny, me, semerado, me safairo, me aloma;

¹⁹ ke haba dö a kuniny, me, lesema, me sevo, me amethusa;

²⁰ ke haba dö a vakiny, me, berulo, me sadonuki, me jasepi; adre me he ka ve bi taben ta je ûnyi e hnyi gol.

²¹ Ke ame he ka hnen hnyi je veto je ien lakon Isaraela a twelv, hoton je iödrin, helâ me hna kave ûnyi hnân bi haten, ame he ka ve hu ien hoton je tribu a twelv.

²² Ke u me he ka ânyâ hnyi tubwiny ûlainy li cein gol ae so adre khenyö.

²³ Ke u me he ka ânyâ hnyi tubwiny ûlainy li otru gol, ke u me he ka ip li otru hnyi li hnyiban tubwiny ûlainy.

²⁴ Ke u me he ka inâ li cein gol adre khenyö hnyin li otru hnyi li baten tubwiny ûlainy.

²⁵ Ke u me he ka ohmâ li hnyiban li cein adre khenyö hnyi li taben, me ip li ûnyi e hon ke keihen bajebenyin iefoda hnyi hnyimakan.

²⁶ Ke u me he ka ânyâ li otru gol, me ohmâ hnyi li ke keihen khaûen ûlainy hnyi baten hnyi ke keihen bân hnyin iefoda.

²⁷ Ke u me he ka ânyâ ke li otru gol, me ohmâ hnyi li hnyiban hon bajebenyin iefoda eû hnyi hnyimakan, hnyi hna ûohmâkouâ ethö hon wen adre hwâwâ metâ.

²⁸ Ke adre me he ka ca tubwiny ûlainy ge li otru ka hnyi li otruiny iefoda ge telenu ae udrudrâ me me he ka mokut hon wen iefoda adre hwâwâ metâ, me me ca he ka ok tubwiny ûlainy hnyi iefoda.

²⁹ Ke ame he Arona ka hom je ien lakon Isaraela hnyi tubwiny ûlainy, a ûnyi hnân owisa, hon oûnykûminy bi, e ka didro ka hnyi dok ae kap hnân oûnykumeâ bala hnyi hnyimakö Iehova.

³⁰ Ke u me he ka ip hnyi tubwiny ûlainy hna owisa Urim me Thumim; kʼ ame he ka hnen li ûnyi e hon oûnykûmi Arona e ka didrö ka hnyi hnymakö Iehova: ke Arona ame he ka hom hna owisa hobi kâu lakon Isaraela hon oûnykûminy bi hnyi hnyimakö Iehova bala.

³¹ Ke u me he ka tibet ûkhaû ae beû hanen iefoda ge mano ae udrudrâ hia.

³² Ke ame he ka hu hnyimen deny bân hnyi wanben; kʼ adre me he ka tibet telenu adre i hwâwâ igigilö hnyimen, helâ me man ûkhaûen vat me me ca he ka mou.

³³ Ke u me he ka ânyâ hnyi obiny je wan rimona ae udrudrâ, me udrudrâ hlit, me dra vec, I hnyi obiny ûkhaû igigilö; me je pate gol hnyi wanben ta je ûnyi e igigilö:

³⁴ khaca pate gol me khaca wan rimona, me khaca pate gol me khaca wan rimona, hnyi obiny igigilö ûkhaû.

³⁵ Ke adre me he ka okhaûö Arona hnân huliwa; kʼ adre me he ka löng ûcuhainy e ka didrö ka hnyi dok ae kap hnyi hnyimakö Iehova, me dit hmetu but, me me ca he ka mok.

³⁶ Ke u me he ka ânyâ ke wahano a gol! ae so, me kave hon helâ me hna kave ûnyi hnân bi haten, ka habe, e kap kö Iehova.

³⁷ Ke u me he ka ohmâ e ka hnyi telenu ae udrudrâ, me me hnen hnyi hnabinybak; ame he ka hnen hnyi hnyimakan hnabinybak.

³⁸ Kʼ ame he ka e hnyi bari Arona, me me he Arona ka hom monuiny ta je ûnyi ae kap, ame he ka okabâ hnen lakon Isaraela hnyi anyidra ta je bwihlany hia ae kap; ke ame he ka e bala hnyi bariny me me he ka kap soi odra hnyi hnyimakö Iehova.

³⁹ Ke u me he ka hwâwâ ûkot lino ae ûhnyûkong nân ae sisit, ke u me he ka ânyâ hnabinybak lino ae ûhnyûkong nân, me u me he ka ânyâ wen hnyekon, a huliwan at omecâ mano.

⁴⁰ Ke u me he ka tibet je ûkot hobi kâu je laku Arona, me u me he ka ânyâ hobi ködrin je wen hnyekudrin, ke u me he ka ânyâ hobi ködrin je hnabinybak, hnân mec me hmanenang.

⁴¹ Ke u me he ka okhaûö Arona tuhâm me je lakon unyin ge je ûkhaû; ke u me he ka hûʼ odrin, me otilʼ odrin, me okabi odrin, mʼödrin e hnyat bihut könya.

⁴² Ke u me he ka tibet hobi ködrin je utrauzes me me khavâ unyidrin hwân hnyi fetriny ke ne o but hnyi li jevan:

⁴³ kʼ ame he Arona ka khavâ e me je lakon, odrin ka he ka didrö ka hnyin umâ ûkhacaköu, me hakekenyâ taben hut he ka huliwa hnyi dok ae kap; me me ca hu jönidrin mʼ odrin e mokcu; wale hnanyibu nyiele balua hobi kâu me je mâtrâniny a hwaban.