Esodo 25 - Iaai Bible 1901 (New Caledonia)

¹ KE Iehova ame ha kö Mose, ka habe,

² Ha thö ka lakon Isaraela mʼ adre me hom bwihlany hobi könya, öbun e he ka j hom anyik bwihlany hoton weny je hnyekudra.

³ Ke walang bwihlany öbun e he ka kap ûnyi gadra, gol, me sileva, me bras;

⁴ me je mano udrudrâ, me udrudrâ hlit, me dra vec, me lino ae ûhnyûkong nân, me leûnen got;

⁵ me je unen mamoe baga adre wia me me dra, me je unen takasa, me je ûö ohum;

⁶ me wakaco hnân umumelam, me ta je ûnyi ae bo so hnân le;

⁷ me je veto soama, me je veto hnân mokut hnyi iefoda, me tubiny ûlainy.

⁸ Kʼ adre me he ka ânyâ hobi könya dok ae kap; mʼ inye he ka laba unyidra.

⁹ Öbun e he ka ânyâ helâ me ta je hofuc hia oge me omanenâ köu, tulutiny uma, me tulutiny omjehen, öbun e he ka ânyâ helâe.

¹⁰ Kʼ adre me he ka tibet ke tang a utö ohum: ame he ka lo li kubit me haf ibeûen, ke khaca kubit me haf ûlauen, ke khaca kubit me haf ibeûen goranyai.

¹¹ Ke u me he ka tube hnyin me hoton ge gol ae so, ke u me he ka bi koronainy a gol.

¹² Ke u me he ka le je otru gol a vak hobi kâu, me ohmâ hnyi je can a vak; lo li otru hnyi ke keihen; ke lo hnyi ke keihen.

¹³ Ke u me he ka ânyâ li utö ohum hnân venyâ, me tube ge gol.

¹⁴ Ke u me he ka inʼ li ûnyi e hnyi hnyin je otru hnyi li ke keihen tang, hnân vadren kâu tang.

¹⁵ Ame he ka mokut li venyâ hnyi hnyin je otruiny tang, ca he ka oc ut.

¹⁶ Ke u me he ka hitangen hnyin tang ûnyi hnân ohnatho, wale oge me he ka ham köu.

¹⁷ Ke u me he ka ânyâ taben ibetengiö gol ae so: lo li kubit me haf ibeûen, ke khaca kubit me haf ûlauen.

¹⁸ Ke u me he ka ânyâ li kerubi gol; u me he ka tibet me huliwan ge hama, hnyi li bahebetiny taben ibetengiö.

¹⁹ U ma tibet ke kerubi hnyi ke bahebet, me ke kerubi hnyi ke bahebet: öbun e he ka ip li kerubi me hanen taben ibetengiö hnyi li ke keihen.

²⁰ Kʼ ame he li kerubi ka lau goranyai li labenyidru, me me khavâ taben ibetengiö ge li labenyidru, ke ödru me he ka ûhnyimaködruköu; kʼ ame he li kerubi ka hnyimaködru ka hnyi taben ibetengiö.

²¹ Ke u me he ka ip taben ibetengiö ethö hon tang: ke u me he ka hitangen hnyin tang ûnyi hnân ohnatho oge me he ka ham köu.

²² Ke oge me he ka iouny möu eling, me ûhnenamö möu ûnyi ethö hon taben ibetengiö, ûnyi hnyi wanben li kerubi hon tang hnân ohnatho, hnyi ta je hofuc oge me he ka hûna köu hobi kâu lakon Isaraela.

²³ Ke u me he ka tibet utö ohum hnân laulau: lo li kubit ibeûen, ke khaca kubit ûlauen, ke khaca kubit me haf ibeûen goranyai.

²⁴ Ke u me he ka tube ge gol ae so, me bi koronainy gol hnyi je haten.

²⁵ Ke u me he ka bi haten igigilö a khaca hnyam, me bi koronainy haten igigilö e ge gol.

²⁶ Ke u me he ka tibet hobi kâu je otru gol a vak hnyi je haten a vak, wale hnyi je can a vak.

²⁷ Kʼ ame he ka ûhakekenyi je otru me baten hnân hnen li venyâ, mʼ adre me vadren laulau.

²⁸ Ke u me he ka ânyâ li venyâ ge utö öhum, me tube ge gol, mʼ adre me vadren laulau kâu.

²⁹ Ke u me he ka ânyâ je utkaiainy, me je spuniny, me je jöginy, me je kaiainy, hnân hingâlâ: u me he ka ânyâ je ûnyi eling gol ae so.

³⁰ Ke u me he ka ip bala hnyi hnyimakök hon laulau areto hnân omanenâ.

³¹ Ke u me he ka ânyâ taben lamepa gol ae so: ke u me he ka ânyâ taben lamepa me huliwan ge hama, wale can, me unyin; kʼ adre me he ka khaca mê je kaiainy, me je ovejien, me je vongon:

³² ke ame he ka vhei siks ta vheiny ûnyi hnyi li ke keihen; kun ta vheiny taben lamepa hnyi ke keihen, ke kun ta vheiny taben lamepa hnyi ke keihen:

³³ kun ta kaia helâ me vhönginy saked, me ovejien, me vongon, hnyi ke vheiny; ke kun ta kaia helâ me vhönginy saked hnyi ke vheiny, me ovejien, me vongon: ame he ka helâe hnyi je vheiny a siks a vheivhei ûnyi hnyi taben lamepa:

³⁴ ke vak ta kaia hnyi taben lamepa helâ me je vhönginy saked, me je ovejien, me je vongon:

³⁵ ke ke ovejien hmelen li vheiny me khacā mē, me ke ovejien hmelen ke li vheiny me khacā mē, hnân je vheiny a siks ame vhei ûnyi hnyi taben lamepa.

³⁶ Ke ûnyi hnyi ûnyi a khaca je ovejien me je vheiny eling: a khaca thibi hia thithö hna huliwan ge hama gol ae so.

³⁷ Ke u me he ka ânyâ je lamepainy me me seven: kʼ adre me he ka vâc je lamepainy me me umumelam igigilö.

³⁸ Ke ame he ka gol ae so li uthesiûniny, me taben hleûhleû.

³⁹ Ke khaca talan gol ae so adre me be ka ânyâ tha e me je taben hia eling.

⁴⁰ Ke wâ bi, me u me he ka ânyâ ta je ûnyi e helâ me tulut adre omanenâ köu hon bucen.