Esodo 24 - Iaai Bible 1901 (New Caledonia)

¹ KE e ame ha kö Mose, ka habe, Ölö thö kö Iehova, u, me Arona, me Nadaba, me Abiu, me wahingatiny Isaraela a sevente; ke öbun e he ka khudrung sâkâû:

² ke haba Mose ame he ka hake hakekeny kö Iehova; ke odrin e ca he ka hakekenyâ; kʼ ame ca he tavat ka tha ölö më.

³ Ke Mose ame he me thumeto ta je hofuc ho Iehova, me ta je hna owisa hia; ke ame thu hnen tavat hia hnyi hofuc a khaca, ka habe, Ohmun e he ka ânyâ ta je hofuc hia a ba hnö Iehova.

⁴ Ke haba Mose ame sihnalimen je hofuc ho Iehova, me vesâkong, me otilâ taben hut hmelen bucen, me je veto ame tot a twelv hoton je tribu a twelv anyin at Isaraela:

⁵ Ke e ame kunâ wahidröu a je lakon Isaraela, mʼ odrin e hudo ta je hut adre le, me hudo kö Iehova je kau hnân hudiny ûsoköu.

⁶ Haba Mose ame hom ke keihen dra, me hingâlâ ka hnyi je kaia; ke haba kolon dra e ame dukâiâ kâu taben hut.

⁷ Ke e ame hom tusiny ûhihinyköu, me aû, kʼ ame löng tavat: me haingödra, ka habe, Ohmun e he ka ânyâ hia hna ha hnö Iehova, me löng hoton.

⁸ Ke haba Mose ame hom dra me dukâiâ tavat, me ha, ka habe, Wâ bi dren ûhihinyköu a ânyâ Iehova mʼ öbun hnyi je hofuc hia eang.

⁹ Ke haba Mose ame tha ölö me Arona, me Nadaba, me Abiu, me wahingatiny at Isaraela a sevonte:

¹⁰ ke odrin e wa Khongon at Isaraela; ke eû hnyi hmelen li can helâ me dek veto a safairo, ke helâ me drany ae alai.

¹¹ Ke e ame ca ip hnyamen hon je thaniny lakon Isaraela: kʼ odrin e wâ Khong me han me ic.

¹² Ke Iehova ame ha kö Mose, ka habe, Ölö thö könya hon bucen, me laba eling: ke oge me he ka ham köu li veto ae lau, me hnanyibu me je hna hûna waleji oge sihnalimen, mʼ u me he ka ûne.

¹³ Ke Mose ame todrö me Josua athnyabainy: ke Mose ame öliâ bucen anyin Khong.

¹⁴ Ke haingen ka wahingat, ka habe, Halubahing ohmu ju öbun eang ke ne o but ohmu me hmetu köbun: ke wâ bi e unyibun Arona me Huro: ke a ne hu hna ivinö ge at, me ame he ka he ködru.

¹⁵ Ke haba Mose ame öliâ bucen, kʼ ame khavâ bucen hnen ûlâ.

¹⁶ Ke haba hmanenang! Iehova ame laba hon bucen Sinai, kʼ ame oiyongâ hnen ûlâ hnyi siks ta bong: ke hnyi bong a seveniny e ame laba hnyin ûlâ me hao Mose.

¹⁷ Ke haba hwakecin hmanenangi Iehova, me, helâ me meic ame han hnyi hon bucen hnyi hnyimakan lakon Isaraela.

¹⁸ Ke Mose ame dit ka hnyin ûlâ me öliâ bucen: ke ethö Mose hon bucen fâte je lany ke fâte je lit.