Esodo 23 - Iaai Bible 1901 (New Caledonia)

¹ U CA he ka kap ûthumetu ae thoi: ke ca hai hnyamâm tha u me at ae monu he ka ohnatho ûokonguny.

² U ca he ka hnu hoton tavat ae se he ka ânyâ monu; ke u ca he ka fuc hnyi ivinö he ka tha hien me tavat ae se hia adre me ohnathoâ thoi;

³ ke u me ca he minya ka betenge ge at ae ba taʼ ûnyi, hnyi anyin ivinö.

⁴ U je ne he ka ûkhanö me kau, ame ne asina haleny iwahnaihmiony möu, ame he monu, u ma he ka ohmeto e kâu.

⁵ U je ne wâ asina haleny at ame hûkötiö u, ame mokut takoû hnen honen hok, wâ eâu u ne he ka hake hna kâu, u me he ka hom hadruâ.

⁶ U ca he ka ohwalö hna owisa ka liamewaeny möu ae ba ta ûnyi, hnyi anyin ivinö.

⁷ Ûsâkâûö u but me hofuc ae thoi; ke ca he ka kot at ae ba kongou, ke wisa hwakecin: anyin oge me ca he ka haiwisa at ae kong.

⁸ Ke u me ca he ka kap bwihlany: anyin a haba bwihlany ame omûko at ame wâ, me ohavâ hofuc hwan tavat ae wisa.

⁹ Ke u ca he ka okongoâ; atkanyua: anyin ae khanʼ öbun hnyekon atkanyua, anyin je atkanyua öbun e hac hnyi hnyei Aigupito.

¹⁰ Ke siks ta je huna u me he ka belökâ kânâm kânâ, me meno je wan:

¹¹ ke haba huna a seveniny u me he ka hna but ka me menâ, me me han hnen tavat unyâm ae ba ta ûnyi: ke haba je kolon hwabödrin, ame he ka han hnen omeno. Ke u me he ka ânyâ helâe ka halem ta je vine me elaio.

¹² Hnyi ta bong a siks u ma he ka ânyâ je hûdrâm, ke haba hnyi bong a seveniny u me he ka menâ: me me hnyi menâ halem bolok, me halem asina, me me he ka ohwegiâ hmeto nokon athnyabaem a momo, me atkanyua.

¹³ Ke hnyi ta je hofuc hia oge ha köbun, wâ eâu: ke ca he öbun ka ha ien ke ta je khong, kʼ adre me ca he ka löng e ûnyi hnyi hnyimâm.

¹⁴ Kun ta ûen u me he ka bijeû hnyin könya knyi huna.

¹⁵ U me he ka bijeûâ areto adre ca levenâ bi: seven ta bong u me he ka han areto adre ca levenâ, helâ me hnök hna hûna köu, hnyi ûen adre thu, hnyi tehi Abiba (anyin a u je he but ûhem Aigupito hnyi tehi eling); ke ca he ke at ka manen hnyi hnyimakök ke ba ûnyi:

¹⁶ me bijeuâ hna meno, ta je wan a bân hnyi ânyâm huliwa, wale u je ta hnyi hnyei: me bijeû adre meno hnyi obiny huna, ûen u je um dö meno hnâm hna huliwan hnyi hnyei.

¹⁷ Haba obaga hia unyâm adre me he ka okun manen hnyi huna hnyi hnyimakan Than Iehova.

¹⁸ U ma ca he ka hudo könya dra tha e me areto adre levenâ; kʼ ame ca he ka laba ke ne o but hnyomakatu pipikhenyainy meno adre hudo könya.

¹⁹ U me he ka hom ka hnyi uma umo Iehova a Khongom ta je jeû a bân ûnyi hnyi kânâm kânâ. Ke ca he ka ölâ nokon got hnyi dân basin hinyen.

²⁰ Wâ bi, inya oge me kunâ angela he ka bân hnyi hnyimâkâm he ka tuö u eû hnyi gethen, me hum u ka hnyi dok oge hia but penapena.

²¹ Wâ wia e bi, me löng hoton hwan hofuc: ca he ka ohmönyinâ: anyin a e ame ca he ka hna degecâ hnâm ta je hna hanyâûâ; anyin a eû hnyi hnyekon iök.

²² Ke u ka he ka löng hoton hwan hofuc, me ânyâ hia hnök hna ha; me oge me he ka iwahnaihmiony me je iwahnaihmiony möu, me ivinö me at ame ivinö möu.

²³ Anyin ame he anyik angela ka hnyimakan ânyâm bunyen, me hum u ka at Amora, me Heth, me Perizi, me Kanana, me Hivi, me Jebusi: kʼ oge me he ka ohiʼ odra.

²⁴ U ca he ka khudrung ka ta je khongundrin, me bi athnyaba ködrin, me ânyâ helâ me anyidrin huliwa: ke so bi u me he ka hagutʼ ödrin, me kot omomono anyidrin je veto ame tot.

²⁵ Kʼ öbun e he ka bi athnyabai Iehova Khongubun, me ame he ka hahnahicâ âm me belâm; ke oge me he ka hom mok ûnyi gam.

²⁶ E ba at ame he ka köluhabû nokon, ke ba ke at ame he ka safac hnyi em hnyei: ke oge me he ka ohwâdâ numerainy bongom ta je bong.

²⁷ Oge me he ka kunâ hnân outö nya hnyi hnyimâkâm, me ovecâ ta je hnyei hia u me he ka o ka hnyin, kʼ oge me he ka kunâ ta je iwahnaihmiony hia möu he ka kec gam.

²⁸ Ke oge me he ka kunâ bânâ wahankânâ wale ame he ka obâ at Hivi, me Kanana, me Heth ûnyi hnyi hnyimâkâm.

²⁹ Oge me ca he ka obʼ odra hnyi huna a khaca, wâ e nye hnyotö kânâ, kʼ ame osehia but omenoiny hnyot köu.

³⁰ Ke oge me he ka obʼ odra ûhnyûkong tot hnyi hnyimâkâm ke ne o but u me se hia, me labâ hnyei.

³¹ Ke oge me he ka si hnyigöulâm hwân hnyi Köiö ae Dra ke ne o but ka hnyi köien at Filisiti, ke hwân hnyi hnyebuba ke ne o but hnyi Wagewe: anyin oge me he ka hna ka hnyi hnyamöbun tavat adre me labâ hnyei; kʼ u me he ka obʼ odra hnyi hnyimâkâm.

³² U me ca he ka ûhihinyköu mʼ odra me je khongudrin.

³³ Adre me ca he ka laba hnyi em hnyei wâ odra nye bi jönâm könya: anyin a u je ne he ka bi athnyaba je khongudrin, wale thibi e hnân nuc u.