Esodo 22 - Iaai Bible 1901 (New Caledonia)

¹ A NE be at ka venâu kau, ame ne mamoe, me hlingâ e, ame ne ûco; me ame he ka ham thabûng ta kau me hwaban ke kau, me je mamoe a vak me hwaban ke mamoe.

² Adre ne kât at hnyi ûen e ame tiga venöu, ke adre kot moko e, me ba dra hnân bi hwaban.

³ Ke a ne utö seûnö hon, me ame he ka hu dra hwaban e; ke hamen he ka bi hwaban; ke a ne ba omjehen, me adre me he ka ûco e me hwaban hnen hna venöu.

⁴ Kʼ adre me ne wâ ûnyi a venöu ae tiga möt hnyi hnyamen, ame ne kau, ame ne asina, ame ne mamoe; e ame he ka ham lo me hwaban.

⁵ A ne he ke at ka okongoâ hna belök, ame ne hnyei vine, me hna haleny meno he ka an hnyei iny ke at; me e ame he ka bi hwaban soâ ûnyi hnyi iny hnyei, ame ne anyin hnyei vine.

⁶ A ne o thö meic me thong ta je ûö ae ûdedö, me le hwit ame ta, ame ne hwit ame tot, ame ne hnyei; me ame he ka bi hwaban hnen at a hlogon.

⁷ A ne ke at ame ip unyin ke at tang mone, ame ne ke ûnyi he ka tuö, kʼ adre me ne venâu ûnyi hnyi umen uma; ke adre me ne wâ at venöu, me ame he ka bi hwaban ibi olo.

⁸ Kʼ adre me ne ca wâ at venöu, me adre me he ka hom at a umen uma ka hnyat owisa, mʼ adre me wâ thö, hawa, ame ne hia but inâ hnyamen ka hnyi tang omjehen at.

⁹ Haba hnyi je hna hanyâûâ hia, ame ne kau, ame ne asina, ame ne mamoe, ame ne ûkhaû, ame ne ke unyi bi ae hia, ke haingen ke at, ka habe, ka anyin, me adre me he ka hom hnödra hna ivinö ka hnyat owisa; ke haba at hnen hnyat owisa hna aat, me hamen he ka ibi olo bi hwaban ka ke at bi.

¹⁰ A ne he ke at ka hna asina ka ke at he ka tuö, ame ne kau, ame ne mamoe, ame ne ke meno; kʼ ame ne mokcu, kʼ adre ne okongo, kʼ adre ne alen, ke ba at a wâ:

¹¹ me ödru me he ka khemanyin hnyi hnyimakö Iehova, a ga ca inâ hnyam ka hom ûnyi anyin ke at; kʼ ame he ka kap e hnen at a haleny ke ame ca he ka bi hwaban.

¹² Ke adre ne venöu unyin, me ame he ka bi hwaban ka at a haleny.

¹³ Kʼ ame ne kikia but, hamen he ka hom hnân ohnathoâ, kʼ ame ca he ka bi hwaban hna kia.

¹⁴ Ke a ne he ke at ka me hom ke ûnyi anyin ke at, kʼ adre ne okongo, kʼ ame ne mok, ke tiga hia at a anyin, me e ame he ka bi hwaban.

¹⁵ Ke a ne tha e me at a anyin, e ame ca he ka bi hwaban: ke a ne ke ûnyi adre me me hom hnân hwaban, me ame he ka hu hwaban.

¹⁶ A ne he ke at ka cubec ke hlu adre tiga ca kâcâ, kʼ ame tha mokut më, me ame he ka ham omjeû me me âiân.

¹⁷ Ke a ne höcö kamen he ka ham kâu, me e ame he ka ham mone ae ûcû me hwaban hlu.

¹⁸ U ma ca he ka hna but momo ae tren khong he ka möt.

¹⁹ Adre me he ka hlingâ at ame tha mokut me meno.

²⁰ Adre me he ka ti ohia at ame bi hut ka ke khong, ke ca kö Iehova.

²¹ U me ca he ka okongoâ atkanyua, me ovecâ: anyin a öbun je atkanyua hnyi hnyei Aigupito.

²² Ca he ka okongoâ safac me nakahme.

²³ U je ne he ka okongu odrin, ke odrin e he ka tenge könya, me oge me he ka löng anyidrin tenge;

²⁴ kʼ ame he ka ubâhlâ anyik hmönyin, ke oge me he ka hlingʼ öbun ge hele vat; kʼ ame he ka safac je laöiöbun, kʼ ame he biju ka nakahme je lakubun.

²⁵ U je ne he ka me ham mone ka lakeik unyâm at ae ba ta ûnyi, ca he ka helâ me at ame ham ge hwaban; ke u ca he ka hnei hwaban gan.

²⁶ U je ne he ka hom ûkhaû anyin ke at hnân haten, me u ma he ka ham hmetu e kâu ke tiga ca dit seûnö:

²⁷ anyin a iny kubö a khaca, ke hnân khavâ unyin: kʼ ame he ka mokut hnyi ieû? ke e ka tenge könya oge me he ka löng, anyin a iny at betenge.

²⁸ U ma ca he ka haikongoâ hnyat owisa, me hangâ at ame musö em hnyei.

²⁹ U ca he ka becâ ham wan em hnyei, me dân wan halem je ûö. Ke u me be ka ham könya watö a lakom baga.

³⁰ Ke helâe u me he ka ânyâ ge halem ta je kau, me halem je mamoe: seven ta je bong ame he ka hnen unyin hinyen, ke hnyi bong a eitiny u me he ka ham könya.

³¹ Ke öbun e he ka tavat ae kap hobi könya; anyin a wale öbun e ca he ka han utiö adre oloû hnyi hnyot; kʼ öbun e he ka khûâ ka ta je kuli.