Esodo 21 - Iaai Bible 1901 (New Caledonia)

¹ KE walang je hna owisa u ma he ka omanenâ ködra.

² U je ne ûco athnyabaem a at Heberu, e ame he ka huliwa hnyi siks ta huna: ke hnyi huna a seveniny e ame he ka he baûâ, kʼ ame ca bi hwaban bi.

³ Kʼ ame ne hake didrö, me ame he minya ka hake didrut: kʼ ame ne hu âiân, me ame he âiân ka tha didrut me.

⁴ A ne hu âiân a ham kâu tuhan, kʼ ame ne hnokoâ lakon baga me hlu; haba momo me lakon me wale anyin tuhan, ke hake e ame he ka he kha.

⁵ Ke ame ne ha manenâ hnen athnyaba, ka habe, Inya oge me hnyokâ tuhok, me öiök, me lakuk; oge me ca he ka he baû:

⁶ hawe, ame he tuhan ka hom e ka hnyat owisa, me hom e ka hnyi hlinginy hwanuma, ame ne ut hwanuma; kʼ ame he tuhan ka koû hnyikonyen ge ûnyi hnân koû; kʼ ame he ka bi athnyabainy nyiele balua.

⁷ Ke ame he ke at ka ûco nokon hlu me me athnyaba momo, me ame ca he ka didrut hmetu helâ me ûheny je athnyaba baga.

⁸ Ke ame ne ca so momo ka tuhan, wale at ame hom, hamen he ka hna but ködra he ka ûco e hmetu: ke ca khana he ka ûco momo ka hnyi ke hnyei bi, anyin a e ame iyawâ.

⁹ Ke ame ne ham hlu ka nokon baga, hamen he ka ânyâ kâu helâ me hnen hna ânyâ ka lakon je hlu.

¹⁰ Ke ame ne hom ke momo bi; me ame ca he ka oûhnyûkongo an, me khaûen, me ûnyi ae ûcû ka momo ae hu âiân.

¹¹ Kʼ ame ne ca ânyâ kâu ta ûnyi eling a kun, hawe e ame he ka he baû kʼ ame ca he ka ham mone.

¹² Haba at ame kot moko at adre me he ka hlingâ.

¹³ Ke ame ne ca ikhölö bi, ke ame ne hna ka hnyi hnyamen hnen Khong, me oge me he ka bi hnen hnân he ka kec ka hnyin.

¹⁴ Ke ame ne he ke at ame sihnân ke at he ka hlingâ hnen anyin tang iyawö, u ma he ka hom e ûnyi hnyi anyik taben hut me me mokcu.

¹⁵ Haba at ame kot kamen me hinyen, adre me he ka hlingâ.

¹⁶ Haba at ame venâu at me ûco hwaban mone, kʼ adre me ne wâ e unyin, me, adre me he ka hlingâ e.

¹⁷ Kaba at ame hangâ kamen me hinyen adre me he ka hlingâ e.

¹⁸ Ke a ne û li at, me ame he ke at ka lûâ ke at hnen veto, ke ame ne kot ge hnyamen adre vhec, ke ame ca mokcu bi, kʼ ame mokut hon hna mokut:

¹⁹ ke ame ne tot hmetu thö, me he eû ame ci, me waleling ame he ka he baû at ame kot e: ke so bi e ame he ka bi hwaban ta je bong e ame ûâ hnyin, me ti osoâ.

²⁰ Ke a ne he ke at ka kot athnyabainy baga, ame ne momo, ge osö, me ame mokcu hnyi hmelen hnyamen: adre me he ka bi hwaban kâu.

²¹ Ke a ne tiga möt hwaban khaca bong ame ne lo, me adre me ca he ka bi hwaban kâu, anyin a anyin mone e.

²² Ke a ne û li at me okongoâ momo a erkin, me ame köluhabû nokon, ke so bi e ca kong momo, me adre me he ka bi hwaban kâu hoton hna ha hnen âiân; kʼ ame he ka bi hwaban helâ me hna ha hnen hnyat owisa.

²³ Ke a ne kong ut hnyi obiny, me adre me he ka ham möt me hwaban möt,

²⁴ ecmak hwaban ecmak, nyu hwaban nyu, hnyamen hwaban hnyamen, can hwaban can,

²⁵ hna thong hwaban hna thong, aat hwaban aat, okhaca hna hwaban okhaca hna.

²⁶ Ke a ne he at ka kot emakan athnyabainy baga, ame ne emakan athnyabainy a momo, me ohia e; me adre me he ka hna baûâ but e hnân hwaban emakan.

²⁷ Ke a ne he ka kot hmetro nyona thnyabainy baga me momo, mʼ adre me he ka hna baûâ but e me hnân hwaban nyon.

²⁸ Ke a ne he kau ka dâ at, a ne baga a ne momo, me me mokcu, me adre me he ka lûâ ge veto, kʼ adre me ca he ka an utiöiny: kʼ adre me he ka hna baûâ at ae tren kau.

²⁹ Ke a ne hwakecin kau eling e hac he ka ûdö, kʼ adre hia but omanenâ e ka at ae tren kau, kʼ ame ca tuö e, me ame hlingâ at, a ne baga a ne momo; me adre me he ka lûâ kau ge veto, kʼ adre me he minya ka hlingâ at ae tren kau.

³⁰ Ke adre ne ip hon hwaban, me ame he ka ham hwaban anyin möt, wale ta ûnyi hia adre ip hon.

³¹ Ke a ne dâ baga nokon ke at, ke a ne momo, me adre me he ka ânyâ kâu helâ me hna owisa e.

³² Ke a ne he kau ka dâ athnyaba baga ame ne momo; me ame he at ae tren kau ka ham ka tuhan je sekel sileva a thöti, ke haba kau adre me he ka lûâ ge veto.

³³ Ke a ne he ke at ka jien thop, ame ne hiny thop, ke ame ca tube e, ke a ne kölu but kau, ame ne asina,

³⁴ me ame he at ae tren thop ka bi hwaban e, me ham mone ka at a haleny; ke haba meno a mok ame he ka anyin biju.

³⁵ Ke a ne kot moko kau haleny ke at hnen kau haleny ke at; me ödru me he ka ûco kau ae möt, me khenâ tang mone; kʼ ödru me he minya ka khenâ meno a mok.

³⁶ Ke a ne manen a gʼ ame labö ûdö e hac kau eling, kʼ ame ca tuö e bi hnen at a haleny; me e ame he ka ham ke kau hwaban ke kau, ke anyin biju meno ae mok.