Esodo 19 - Iaai Bible 1901 (New Caledonia)

¹ HNYI tehi a kuniny hwaban ûheny lakon Isaraela hnyi hnyei Aigupito, hnyi bong eling adre me o but hnyi hnyebuba Sinai.

² Kʼ adre me he ûheny Refidima, me o hnyi hnyebuba Sinai, me adre me hunuma hnyi hnyebuba; ke haba at Isaraela adre me hunuma cicö bucen.

³ Ke haba Mose ame ölö thö ka Khong, ke haba Iehova ame hongot kâu ethö hon bucen me ha kâu, ka habe, Walang hofuc u me he ka ha ka lap anyi Jekob, me thumeto lakon Isaraela, ka habe;

⁴ Öbun e wâ but hnök hna ânyâ ka at Aigupito, a oge köp öbun hon labenyin aeto, me hum öbun könya.

⁵ Ke walang ang öbun e ne he ka löng hoton hok hofuc me vheno anyik uhihinyköu, mʼ öbun e he ka helâ me omjeû ae ûnyi hnathu hon ta je hnyei hia: anyin a anyik hmeledrany hia:

⁶ kʼ öbun e he ka dökuk dökhu a je at bihut, me hnyei ae kap könya. Wale hofuc u me he ka ha ka lakon Isaraela.

⁷ Kʼ ame o but Mose me hâwâ wahingatiny hnyei, me haimemenâ ködra hofuc eling a hûna Iehova kâu.

⁸ Kʼ ame thu tavat hia me ha, ka habe, Ohmun e he ka ânyâ ta je ûnyi hia ame ha Iehova. Haba Mose ame thumetu Iehova hofuc hwan tavat.

⁹ Ke haingö Iehova kö Mose, ka habe, Wâ bi oge me o but köu hnyi ûlâ ae khot, me me he tavat ka löng anyik ûhnenamö möu, mʼ adre me labageju bala köu. Haba Mose ame thumeta Iehova hofuc hwan tavat.

¹⁰ Ke Iehova ame ha kö Mose, ka habe, He thö ka tavat, me okabi odra hnyi bong ang, me bong nyi, kʼ adre me he ka hneû anyidra je ûkhaû:

¹¹ mʼ adre me penapena hobi kâu bong a kuniny: anyin a haba hnyi bong a kuniny ame he Iehova ka utut hnyi hnyimakan tavat hia thithö hon bucen Sinai.

¹² Kʼ u me he ka si hnyi-göulen hnyei igigilö, me habe, Wâ eâu öbun ne he ka öliâ bucen, me kâlâ haten: haba at ama kâlâ bucen adre me he ka hlingâ:

¹³ e ba hnyamen ke at ame he ka kâlâ, ke so bi adre me he ka lûâ ge veto, ame ne daoâ; ame ca he ka möt, ame ne meno, ame ne at bi: ke ka fuc beû hmâ trutru, me adre me he ka öliâ bucen.

¹⁴ Haba Mose ame utut hon bucen ka tavat me okabi odra; kʼ adre me hneû anyidra je ûkhaû.

¹⁵ Ke haingen ka tavat, ka habe, Penapena thʼ öbun hnân bong a kuniny: ca he ka kâlâ momo.

¹⁶ Ke haba hnyi bong a kuniny hnyi hnyomakatu, e hu hendreng, me je hucuce, me ûlâ ae khöt, me hwan trutru ae gan hmönyin; kʼ ame öbubuny tavat hia hnyi hna hunuma.

¹⁷ Ke haba Mose ame hom tavat ûheny hnyi hna hunuma he ka ûkhanö me Khong; kʼ adre me tot hmelen bucen.

¹⁸ Kʼ ame sâ bucen Sinai hia, anyin a Iehova ame ut hnyin meic kâ e: kʼ ame ölö görany ai sân helâ me sân inyâ ji: kʼ ame ûk hwege bucen hia.

¹⁹ Ke gan tot hwan trutru, me Mose ame fuc, ke Khong ame thu kâu hnyi hofuc.

²⁰ Kʼ ame utut Iehova ka hnyi bucen Sinai, ka hnyi bân bucen: ke Iehova ame hao Mose ka hnyi bân bucen: me Mose ame ölö thö.

²¹ Ke haingö Iehova kö Mose, ha habe, Utut, he ka thawâ tavat wâ adre nye hanyâûâ he ka ö Iehova, me me mokcu tavat ae se hia gadra.

²² Ke haba tavat bihut odrin e hakekeny kö Iehova, e so odrin e okabi odrin bi, wâ enyi gâ but Iehova ködrin.

²³ Ke haba Mose ame ha kö Iehova, ka habe, E ca khana tavat he ka öliâ bucen Sinai: anyin a u je hûna köhmun, ka habe, Si hnyigöulen dö bucen, me okâbâ.

²⁴ Ke Iehova ame ha kâu, ka habe, He thö, utut: ke u ma he hmetu me Arona ka ölö: ke ca ʼ hna tavat bihut me tavat he ka hanyâûâ he ka ölö kö Iehova wâ e nye he ka gâ ködra.

²⁵ Ke haba Mose ame utut ka tavat me ha ködra.