Esodo 18 - Iaai Bible 1901 (New Caledonia)

¹ KE a wâ but Jethero at bihut e Midiana, ûngu Mose, ta je ûnyi hia Khong ame ânyâ hobi kö Mose, me at Isaraela a lakeiny, waleji a Iehova ame hom at Isaraela ûheny Aigupito.

² Ke haba Jethero, ûngu Mose, ame hum Zipora öiö Mose, hwaban dö hnen hna kunâ hmetu,

³ me lakon li baga; haba ien khaca Geresoma; anyin a haingen, ka habe, Oge hia but atkanyua hnyi ke hnyei bi:

⁴ ke haba ien khaca, me, Eliezera, anyin a haingen, ka habe, Khongon cica at ame hadruo nya, me omeli nya ûnyi hnyi hele vat anyi Farao:

⁵ ke haba Jethero, ûngu Mose, ame hom li lakon me âiân kö Mose hnyi hnyebuba, hnyi dok e ame hunuma hnyin, hnyi bucen anyin Khong:

⁶ ke ame ha kö Mose, ka habe, Inya Jethero ûngom oge me o köu me âiâm me lakom li baga a tha ödru me.

⁷ Ke haba Mose ame he ka ûkhanö me ûngon, me nom kâu, me ûcumhnyimak me; kʼ ödru me ûhnököuâ li ve bongudru, kʼ ödru me didrö ka hnyin uma ʼmano.

⁸ Ke Mose ame thumeto ûngon ge ta je ûnyi hia a ânyâ Iehova kö Farao me at Aigupito hobi kâu at Isaraela, me ta je vec hia a o ködra eû hnyi gethen, me hna omeli odra ga Iehova.

⁹ Ke Jethero ame senyinâ je so hia a ânyâ Iehova ka at Isaraela, waleji hna omeli odra ûnyi hnyi hnyamen at Aigupito.

¹⁰ Ke haingö Jethero, ka habe, Ole kö Iehova at ame omeli öbun ûnyi hnyi hnyamen at Aigupito, me hnyamö Farao; at ame omelö tavat ûnyi hnyi hmelen hnyamen at Aigupito.

¹¹ E khanö nya walang ang ae gan hmâ Iehova hon ta je khong hia: eke e beönua hudrin hnyi ûnyi ödrin e bi gânâ.

¹² Ke Jethero, ûngu Mose, ame hom hut adre le me je hut ka Khong: ke ame o Arona me wahingatiny Isaraela hia he ka tha han me ûngu Mose hnyi hnyimakan Khong.

¹³ Ke nyi ame laba Mose he ka owisa tavat: ke ame tot tavat hnyi hnyimakö Mose hwân hnyomakatu ke ne o but sahac.

¹⁴ Ke a wâ but ûngu Mose ta je ûnyi hia e ame ânyâ hobi kâu tavat, me e ame ha, ka habe, Ie ûnyi u me ânyâ ka tavat? Ieû gam u me hake laba, kʼ ame ûtitilen hnyi hnyimâkâm tavat hia hwân hnyomakatu ke ne o but sahac?

¹⁵ Ke haba Mose ame thu ka ûngon, ka habe, Anyin ame labö he könya tavat he ka hnö Kkong:

¹⁶ a ne hu ke ûnyi gadra adre me he könya; ke inya oge me owisa ka ke at me ke at, ke inya oge me thumetu odra ge ta je hna hûna hnen Khong me anyin je hnanyibu.

¹⁷ Ke haingen ûngu Mose kâu, ka habe, E ca so hnâm hna ânyâ.

¹⁸ U ma he ka aû tot, u, me tavat eang unyâm; anyin ae hmak köu ûnyi eang; e ca khanö u he ka hake ânyâ.

¹⁹ Löng ju walang ang hok, inya oge me nö u, kʼ ame he Khong ka tha e möu: u ma tot hnyi hnyimakan Khong hobi kâu tavat, ke u ma he ka oâ ta je ûnyi ka Khong:

²⁰ ke u ma he ka nʼ odra ge ta je hna hûna me ta je hnanyibu, me omanenâ ködra gethen adre me he ka he hnyin, me huliwa adre me he ka ânyâ.

²¹ Ke haba khaca u me he ka ûca ûnyi ge tavat hia hnyat ae metâ, ödrin e outen Khong, a hnyat ae hnathu, odrin e hûkötiâ troban thoi; ke otilʼ odrin hon tavat, hnân je taben thauzan, me je taben haded, me je taben fifte, me je taben libenyita:

²² ke so odrin e he ka owisa tavat hnyi ta je ûen hia: kʼ odrin e he ka hom köu ta je ûnyi ae gan, kʼ odrin e he biju ka owisa ta je ûnyi ae ûhnyûkong hia: waleling me me hâhâ köu, kʼ odrin e hadruo u.

²³ U je ne he ka ânyâ ûnyi e, me ame ne he Khong ka köp u hnyin, me u me he ka tethmâ, kʼ ame he tavat ang ka hnyi hnyabadra hnyi hnahic.

²⁴ Ke haba Mose ame löng ifucin ûngon, me ânyâ hia hnen hna ha.

²⁵ Ke Mose ame ûca hnyat ae metâ unyin at Isaraela hia, me otilʼ odrin me je homakan tavat, a je taben thauzan, me je taben haded, me je taben fifte, me je taben libenyita.

²⁶ Kʼ odrin e owisa ka tavat hnyi ta je ûen hia: ke haba ta je ûnyi ae hmak odrin e hom kö Mose, kʼ odrin e owisa biju ta je ûnyi ae ûhnyûkong hia.

²⁷ Ke haba Mose ame hna but ûngon; kʼ ame he ka hnyi iny hnyei.