Esodo 16 - Iaai Bible 1901 (New Caledonia)

¹ KE adre me he ûhedra Elima, ke ame o but ûkhacaköu hia anyin lakon Isaraela ka hnyi hnyebuba Sina, wanben Elima me Sinai hnyi bong a fifitininy tehi a loiny hwaban ûhedra hnyi Aigupito.

² Ke haba ûkhacaköu hia anyin lakon Isaraela adre me etrö Mose me Arona hnyi hnyebuba:

³ ke haingen lakon Isaraela ködru, ka habe, Ohmun na mokcu hnen hnyamö Iehova hnyi hnyei Aigupito waleji ohmun e laba hnyi je hna öt meno, me han areto me sekuhmun; anyin a öbe hum ohmun ka hnyi hnyebuba eang he ka hlingâ ûkhacaköu ang hia ge mekihnânem.

⁴ Ke haba Iehova ame ha kö Mose, ka habe, Wâ bi oge me he ka ota köbun jeû helâ me we ûnyi hnyi drany; kʼ ame he tavat ka thigâ e hnyi je bong ae ûcû ka hnyi bong, mʼ inye he ka cubic odra, adre me ne he ka vheno anyik hnanyibu, ame ne ba.

⁵ Ke haba hnyi bong a siksiny, adre me he ka penapena hnödra hna hom, kʼ ame he ka tha ûcû me hnödra hna hom hnyi li bong a lo.

⁶ Ke haingö Mose me Arona ka lakon Isaraela hia, ka habe, Öbun e he ka wâhmakhmeto eâu sahac a ga hum öbun Iehova ûhebun huyi hnyei Aigupito:

⁷ ke haba hnyi hnyomakatu öbun e he ka wâ soi Iehova; anyin a e ame löng hna etrö Iehova gabun: ke ie li at ohmu, mʼ öbun e he ka etrʼ ohmu?

⁸ Ke haingö Mose, ka habe, Eâu sahac ame he Iehova ka ha öbun ge meno, me jeû hnyi hnyomakatu me me sekubun; anyin a löng ut Iehova hnöbun hna etra: ke ie li at ohmu? kʼ öbun e ca etrʼ ohmu, ke Iehova bi.

⁹ Haba Mose ame ha kö Arona, ka habe, Ha thö ka ûkhacaköu hia anyin lakon Isaraela, ka habe, Hakekeny dö ka hnyi hnyimakö Iehova: anyin a löng ut hnöbun hna etra.

¹⁰ Ke Arona ame tiga ha hofuc ka ûkhacaköu hia anyin lakon Isaraela, me adre me bwele hnyebuba ai, ke wâ bi, e manen soi Iehova hnyi ûlâ.

¹¹ Ke Iehova ame ha kö Mose, ka habe,

¹² Oge löng ut ietra anyin lakon Isaraela: ha thö ködra, ka habe, Eâu sahac öbun e he ka han meno, ke haba hnyi hnyomakatu ame he ka sekubun ge jeû; kʼ öbun e he ka wâhmakhmeto a inya Iehova Khongubun.

¹³ Ke haba hnyi sahac ame ölö thö ta je jûö me khavâ hnyei: ke hnyi hnyomakatu ame ta hau igigilö je hnyaba.

¹⁴ Ke wâ bi ame ölö goranyai hau, me e biju hnyi hnyebuba ke ûnyi ae ûhnyûkong ae wathalaba, e ûhnyûkong helâ me dân hau ae wahma hon kânâ.

¹⁵ Ke a wâ but e hnen lakon Isaraela, adre me ûhaköuâ, ka habe, Ieû ang? Anyin ae ca khanʼ odra bongon. Ke Mose ame ha ködra, ka habe, Wale jeû Iehova ame ham köbun.

¹⁶ Walang hofuc a huna hnö Iehova, ka habe, Ve thigâ oûcû öbun dö ka han; khaca omer hobi kâu at a khaca hoton numerainy tavat; he thʼ öbun ka ve hom hobi köbun ka hnyi umöbun je uma mano.

¹⁷ Ke haba lakon Isaraela adre me ânyâ helâe, ke haba keihen adre me thigâ gânâ, ke keihen ae ûhnyûkong.

¹⁸ Me adre me tuluto hnen omer, me haba at ame thigâ gânâ, me ba kolon, ke haba at ame thigâ ûhnyûkong, e ba ûnyi a hia gan; kʼ adre me thigâ e ve ûcû ödra ka han.

¹⁹ Ke haingö Mose ködra, ka habe, Ca he ke at ka hip kamec ke ne o but hnyomakatu.

²⁰ Kʼ adre me ca ling Mose; ke haba ke je hnyat odrin e hip kamec ke ne o but hnyomakatu me ame ahnyöng me meng: ke Mose ame hmönyin ködra.

²¹ Kʼ adre me thigâ hnyi je hnyomakatu e ve ûcû ka han: ke kahwa hwan seûnö, me ame köiö but.

²² Ke hnyi bong a siksiny adre me thigâ jeû ae ûco lo li bong, wale li omer hobi kâu at a khaca: ke ame he but je taben ûkhacaköu hia me thumetu Mose.

²³ Me e ame ha ködrin, ka habe, Walang hna ha hnö Iehova, ka habe, haba bong nyi me hnân menâ ae ûnyi hnathu, sabath ae kap kö Iehova: haba hnöbun hna he ka thân, thân ju, ke haba hnöbun hna he ka ölâ, ölâ ju; ke hip kamec ju kolon hobi köbun hnyi hnyomakatu.

²⁴ Kʼ adre me hip kamec ke ne o but hnyomakatu helâ me hna hûna hnö Mose: kʼ ame ca meng bi, ke ba minya ahnyöng hnyin.

²⁵ Ke haingö Mose, ka habe, Han dʼ öbun e hnyi i bong ang; anyin a sabath anyi Iehova bong ang: öbun e ca he ka wâ ûnyi e hnyi kânâ hnyi bong ang.

²⁶ Ke hnyi siks ta bong öbun e he ka thigâ e; ke hnyi bong a seveniny, wale sabath, ame he ka ba but hnyin.

²⁷ Ke haba hnyi bong a seveniny ame he ke je hnyat ka thigâ, me ba.

²⁸ Ke haba Iehova ame ha kö Mose, ka habe, Ke ne o but kehö öbun e he ka höcö ka tuö hnök hna hûna me anyik je hnanyibu?

²⁹ Wâ bi, Iehova ame ham köbun sabath, waleling me me ham köbun hnyi bong a siksiny jeû ae ûco lo li bong; ve laba ju öbun hnyi je hnöbun, ame ca he ka he ke at ûheny hnyi hnen hnyi bong a seveniny.

³⁰ Waleling me me menâ ju tavat hnyi bong a seveniny.

³¹ Ke haba lap anyi Isaraela adre me hwenyi ien ûnyi eling, me, Mana: ke ûcû e me önyen gada, ke hau; ke ûcû useneminy me je ong salawa adre ûthueniken me hani.

³² Ke haingö Mose, ka habe, Walang hna ha hnö Iehova, ka habe, Ounöngötâ ju omeriny me tuö hobi kâu anyibun ta je dö, mʼ adre me he ka wâ jeû oge ha öbun gan hnyi hnyebuba hnyi hnök hna hum öbun ûhebun hnyi hnyei Aigupito.

³³ Haba Mose ame ha kö Arona, ka habe, Hom dö kaia me bi önyen ju e ge mana a khaca omer me ip hnyi hnyimakö Iehova, mʼ adre me he ka tuö hobi kâu anyibun je dö.

³⁴ Me Arona ame ip e hnyi hnyimakan tang hnân ohnatho, mʼ adre me he ka tuö helâ me Iehova ame ha kö Mose.

³⁵ Ke haba lakon Isaraela adre me han mana hnyi je huna a fâte, ke ne o but adre me o ka hnyi hnyei ae hu aten; adre me han mana ke ne o but adre me o but ka hnyi je hnyigöulen hnyei Kanana.

³⁶ Haba omer me wale ke keihen a libenyitainy efa.