Esodo 15 - Iaai Bible 1901 (New Caledonia)

¹ KE haba Mose me lakon Isaraela adre me tha khumöngö khumöng eang, ka habe, Oge me he ka khumöng kö Iehova anyin a e ame ti hom dökhu: A hia but khûâ hos me at ame tabâ ka hnyi köiö.

² Ja, a tang hwegiök me anyik khumöng, Ke e thibi ûhömelik: Wale thibi e Khonguk, ke oge me he ka haisoâ; Khongu cica, kʼ oge me he ka ogöranyâ.

³ Iehova thibi at vat: Iehova ien.

⁴ E ame hia but khûâ ka hnyi köiö je kariota anyi Farao, me anyin je vat; Kʼ ame û but eû hnyi Köiö ae Dra anyin je tuhan vat adre ûca.

⁵ A hûlûlû odra hnen je dok ae dit; Adre me û but kâ û helâ me veto.

⁶ Iehova lö, e mec hnyamâm a metâm ae man; Iehova lö, a hia but hnyamâm a metâm kot omomono iwahnaihmiony.

⁷ Ke ûnyi hnyi ûganiny ibeönuaiâm u je hagutʼ odra tavat adre me tot köu: U je kunâ ânyâm hmönyin, mʼ adre me aû but helâ me tiren.

⁸ Ame kakap goranyai köiö ûnyi ge homenâiny li hnyingoiâm, Ame tot wisa je di helâ me khölöki; Ame wahma thö köiö eû hnyi dok ae dit.

⁹ Haingen iwahnaihmiony, ka habe, Oge me he ka hnu, oge me he ka homtilâ, oge me he ka khenâ hna hûgûnâ: Oge me he ka sekuk ûnyi gadra; Oge me he ka oc anyik hele vat, ame he hnyamok ka ohiʼ odra.

¹⁰ U je kunâ ânyâm ang, me ame hûlûlû odra hnen köiö: Adre me û but eû hnyi köiö ae man, helâ me veten kuha.

¹¹ Iehova lö, ewa at ae tha ûcû möu unyin ta je khong? Ia ae tha ûcû möu, e hmanenang hwakecâm ae kap, Ke hnân outen, odra ka ogânö u, at ame ânyâ ta je ûnyi hnân lâiâ?

¹² U je inâ hnyamâm a metâm, Me ame ön odra dut hnen kânâ.

¹³ Hnyi ânyâm ibetengiö u je lelö tavat u je hia but omelö: U je lili odra ge tang hwegiâm ka hnyi hnyabam ae kap.

¹⁴ A löug ut ta je hnyei, adre me öbubuny: Vec ae gan ame o ka tavat adre me labâ Filisiti.

¹⁵ Ame uthmok ta je tuhan hnyei Edoma; Ame öbubun tavat hwege hnyi Moaba: Kʼ ame aû tavat hia adre me laba Kanana.

¹⁶ Ame o but ködra ot me öbubuny; Ûnyi ge ihwegeiny benyâm adre me laba hmâ helâ me veto; Ke ne o but ame hanyâûâ lakem, Iehova, Ke ne o but ame he thö tavat u je hia but ûco.

¹⁷ U ma he ka hum odra, me tʼ odra hnyi bucen, wale hwajekom, Iehova lö, wale hnâm u je ânyâ hnân hnyabam, Iehova lö, wale dok ae kap u je hia but ohmâ hnen li hnyamâm.

¹⁸ Ame he Iehova ka musi nyiele nyiele balua.

¹⁹ Anyin ame tha utut kâ û ka hnyi köiö je hos hale Farao me anyin je kariota me tavat tabö hos, ke haba Iehova ame okhuto hmetu köiö hudra; ke haba lakon Isaraela adre me he hnyi wanben li köiö hnyi dok ae mada.

²⁰ Ke Miriama perofeta momo, hani Arona, ame hom bwinybet hnyi hnyamen; ke omomo hia ae ve hu bwinybet odrin e he hoton me bibiâ.

²¹ Ke haba Miriama ame thu me ha, ka habe, Khumöngö thʼ öbun kö Iehova, anyin a e ame ti hom dökhu; A hia but khûâ hos me at ame tabâ ka hnyi köiö.

²² Ke haba Mose ame hom dö at Isaraela ûnyi hnyi Köiö ae Dra, kʼ adre me o ka hnyi hnyebuba e Sura; ke kun bongudra hnyi hnyebuba ke ba köiö adre me wâ.

²³ Kʼ adre me o but Mara, ke ca khan odra ijem an eling Mara, anyin ae hiny: waleling mʼ adre me hwenyi ien e Mara.

²⁴ Ke haba tavat adre me etrö Mose, me habe, ohmun e he ka ic ieû?

²⁵ Me ame tenge kö Iehova, ke Iehova ame omanenâ kâu ke ûö, me ame khûâ ka hnyi an, me ame hnam but an. Ke waleling e ame otilâ hobi ködra hnanyibu me hna owisa, kʼ ame cubic odra eling;

²⁶ ke haingen, ka habe, U ka he ka löng wia hofuc ho Iehova a Khongom, me ânyâ ûnyi ae wisa hnyi hnyimakan, me tevehlöng hnen hna hûna, me tuö anyin je hnanyibu hia, oge me ca he ka kunâ köu ta je mok waleji oge kunâ ka at Aigupito: anyin a inya Iehova at ame osoi u.

²⁷ Kʼ adre me o hnyi Elima, ke eling je an a twelv, me ta je ûö pama a sevente: kʼ adre me hunuma hnyi je an.