Esodo 14 - Iaai Bible 1901 (New Caledonia)

¹ KE haba Iehova ame ha kö Mose, ka habe,

² Ha thö ka lakon Isaraela, mʼ adre me he ka saû hmetu me hunuma cicö Pihahiroth wanben Migedola me köiö, cicö Baalazefona: öbun e he ka hunuma cicö e hnyi haten köiö.

³ Kʼ ame he Farao ka ha ge lakon Isaraela, ka habe, Odra adre me hnok dö hnyi hnyei, kʼ ame sing odra hnen hnyebuba.

⁴ Ke oge me he bi nya ka onâkâ hnyeku Farao, kʼ ame he ka hnu hotudra; kʼ ame he ka oganö nya ga Farao, me anyin je vat hia; kʼ ame he ka khana hnen at Aigupito a inya Iehova. Kʼ adre me ânyâ helâe.

⁵ Ke adre me thumeto than Aigupito a ga kec ut tavat: me ame wia thö hnyeku Farao me lathnyabainy ka tavat, me haingödrin, ka habe, Ieû hnötin hna ânyâ he ka hna at Isaraela adre me huliwa kötin?

⁶ Ke e ame penapena anyin kariota me tha be me lakeiny:

⁷ kʼ ame hom minya siks haded ta je kariota adre ûca, me je kariota hia hnyi Aigupito, me latuhödra hia.

⁸ Ke haba Iehova ame onâkâ hnyeku Farao than Aigupito, kʼ ame hnu lakon Isaraela: anyin a haba lakon Isaraela adre me he me tang hwege.

⁹ Kʼ ame hnu odra hnen at Aigupito, je hos hia me je kariota anyi Farao, me tavat adre me tabâ haleny je hos, me anyin vat, me homtilʼ odra adre me hunuma hnyi köiö cicö Baalazefona, hakekeny Pihahiroth.

¹⁰ Ke Farao ame hakekenyâ, me lakon Isaraela adre me wâ, ke wâ bi ame hnu hotudra at Aigupito; kʼ adre me ot gan hmâ: ke lakon Isaraela adre me tenge kö Iehova.

¹¹ Ke haingödra kö Mose, Hawa, e ba je erkemok hnyi Aigupito, mʼ u me hum ohmun ka mok ang hnyi hnyebuba? Ieû ang u je ânyâ köhmun, ka hum ohmun ûhehmun Aigupito?

¹² Hawa, ohmun e ca hia but ha köu hnyi Aigupito, ka habe, Hnʼ ohmun dut mʼ ohmun o he ka bi athnyabainy at Aigupito? Anyin ae so köhmun he ka bi athnyabainy at Aigupito, ke kong köhmun he ka mokcu eang hnyi hnyebuba.

¹³ Ke haba Mose ame ha ka tavat, ka habe, Ca ot, tot ju, me wâ ûhomeli anyi Iehova, wale ame he ka ânyâ hobi köbun hnyi bong ang: anyin a haba at Aigupito öbun e wâ hnyi bong ang, me öbun e ca he ka wâ hmetu nyiele balua.

¹⁴ Ame he Iehova ka vat sing öbun, kʼ öbun e he ha laba hayibû.

¹⁵ Ke haba Iehova ame ha kö Mose, ka habe, Ieû gam u me tenge könya? Ha thö ka lakon Isaraela mʼ adre me he thö.

¹⁶ Ke hai thö ânyâm uci, me inâ but hnyamâm hon köiö, me me khekhe lo but: kʼ ame he lakon Isaraela ka he wanben köiö hnyi dok ae mada.

¹⁷ Ke haba inya oge me he bi nya ka onâkâ hnyekon at Aigupito, kʼ adre me he ka hnu hotudra ka hnyin: kʼ oge me he ka oganö nya bi ga Farao, me anyin je vat hia, me anyin je kariota, me anyin je hnyat tabö hos.

¹⁸ Kʼ ame he ka khana hnen at Aigupito a inya Iehova, iny ka hia but oganö nya bi ga Farao, me anyin je kariota, me anyin tavat tabö hos.

¹⁹ Ke haba angela anyin Khong, at ame bân hnyi hnyimakan at Isaraela, ame biliny jut hotudra; ke haba ûlâ at ame tot wisa hnyi hnyi-maködra, e ame hwiö me tot hotudra:

²⁰ ke ame he me tot hnyi wanben hunuma anyin at Aigupito me hunuma anyin at Isaraela; ke wale bi eling ûlâ me menekholom minya, ke so bi ame omelamâ hnyinghet: kʼ ame ca hakekenyâ ke at ka ke at hnyi lit hia.

²¹ Ke haba Mose ame inâ hnyamen hon köiö; me Iehova ame okhuto köiö hnen ang hwei ae hwege hnyi lit ae bekhöt me omada e, ke haba köiö ame khekhe lo but.

²² Me ame he but lakon Isaraela hnyi wanben köiö hon kânâ ae mada: ke li hak ködra köiö hnyi ke keihen metödra me medra.

²³ Ke haba at Aigupito adre me hnu odra, me utut hotudra ka hnyi wanben köiö, a je hos hia hale Farao, me anyin je kariota, me anyin tavat tabö hos.

²⁴ Ke haba hnyi hmak hnyi hnyomakatu, Iehova ame selâdrâ hnyi meic ame tot wisa me ûlâ, me ame ovecâ vat anyin at Aigupito.

²⁵ Ke ame thang je waengen hnyi anyidra je kariota, me me hmak he ka lelö: waleling me me ha hnen at Aigupito, ka habe, E so ate me kec ge at Isaraela; anyin a Iehova ame bi hiödra, me iwahnaihmiony me at Aigupito.

²⁶ Ke haba Iehova ame ha kö Mose, ka habe, Inâ but hnyamâm hon köiö, me me he köiö ka hmetuhmetu but ka hnyi hon at Aigupito, hon anyidra je kariota me tavat adre me tabö hos.

²⁷ Ke haba Mose ame inâ hnyamen hon köiö, me ame khutu hmetu but köiö ka hnyi hnen, hnyi ioiny dö lany; ke haba at Aigupito adre me kec me ûkhöû me: ke Iehova ame khûâ at Aigupito ka hnyi wanben köiö.

²⁸ Ke ame khutu hmetu but köiö me hûlûlûâ je kariota me vat tabö hos, me utbavat hia anyi Farao adre me ut hotudra ka hnyi köiö, me ba ju köluidra e ba me khaca.

²⁹ Ke haba lakon Isaraela adre me vheno dok ae mada wanben köiö; ke li hak ködra köiö hnyi ke keihen metödra me medra.

³⁰ Helâng Iehova ame omelö at Isaraela hnyi bong eling ûnyi hnyi hnyamen at Aigupito; ke haba at Isaraela adre me wâ at Aigupito a mokcu hnyi hobat köiö.

³¹ Ke a wâ but at Isaraela huliwa ae gan ame ânyâ Iehova hon at Aigupito, me me outö Iehova tavat: ke adre me labageju kö Iehova me Mose a athnyabainy.