Esodo 13 - Iaai Bible 1901 (New Caledonia)

¹ KE Iehova ame ha kö Mose, ka habe.

² Okâbâ thö köüya ta je atö hia, a lakon Isaraela adre bân hna hnokoâ, at me meno: wale hobi könya.

³ Ke haba Mose ame ha ka tavat, ka habe, Ûnykûme ju öbun bong eang, bong öbun e he but ûhebun Aigupito hnyin, ûnyi hnyi hnyaban at hwenbâ; anyin a ûnyi ge hwegien hnyamö Iehova, e ame hum öbun ûnyi hnyi dok e: adre me ca he ka han areto adre levenâ.

⁴ Hnyi bong ang öbun e he but, hnyi tehi Abiba.

⁵ Ke e ka he Iehova ka hum u ka hnyi hnyei Kanana, me Heth, me Amora, me Hivi, me Jebusi, waleji a khemanyin ka lakâmâm he ka hani köu, a hnyei ame di ge dân basin me hani, me u ma he ka ânyâ huliwa eang hnyi tehi eang.

⁶ Haba hnyi seven ta bong u ma he ka han areto adre ca levenâ bi, ke haba hnyi bong a seveniny adre me he ka bi jeû kö Iehova.

⁷ Adre me he ka han areto adre ca levenâ hnyi je bong hia a seven; kʼ ame ca he ka hu unyâm areto adre levenâ, kʼ ame câ he ka hu leven unyâm, hnyi em hnyei hia.

⁸ Ke u ma he ka thumeto nokom hnyi bong eling, ka habe, Adre me ânyâ ûnyi ang can hna ânyâ hnö Iehova hobi könya hnyi ûhek Aigupito.

⁹ Kʼ ame he ka bi haten köu ûnyi eling hnyi hnyamâm, me hnân oûnykûmeâ hnyi wanben li emâkâm, me me he hnanyibu anyi Iehova ka hnen hnyi hnyimâm: anyin a Iehova ame hum u ûhem Aigupito hnen hnyamen ae hwege.

¹⁰ Anyin a wale u ma he ka vheno hnanyibu eang hnyi ûen adre thu hnyi ke huna me ke huna.

¹¹ Ke e ka he Iehova ka hum u ka hnyi hnyei iny at Kanana, helâ me hnen hna khemanyin köu me lakâmâm me ham köu,

¹² me u ma he ka ip hobi kö Iehova ta je atö hia, me ta je atö nokon meno unyâm; hobi kö Iehova obaga.

¹³ Ke haba je atö hia nokon asina, me u ma he ka hom nokon mamoe me hwaban; ke u je ne ca he ka bi hwaban e, me u me he ka thu nyin: ke u ma he ka bi hwaban ta baga hia a bân a lakom.

¹⁴ Ke e ka he nokom nyiele ka hnei u, ka habe, Ieû e? U me he ka ba kâu, ka habe, Iehova ame hum ohmun ge hnyamen ae hwege ûhehmun Aigupito, ûnyi hnyi hnyaban at hwenbâ:

¹⁵ ke e höcö Farao hnʼ ohmun, haba Iehova ame hlingâ je atö hia hnyi hnyei Aigupito, a atö lakon at me atö lakon meno: anyin a wale inya oge me hudo ta je nokon a bân kö Iehova, a obaga; ke oge me bi hwaban je atö a lakuk hia.

¹⁶ Kʼ ame he ka bi haten köu ûnyi eling hnyi hnyamâm, me hnân wen bariny hnyi wanben li emakâm: anyin a Iehova ame hum ohmun ûheny Aigupito ge hnyamen ae hwege.

¹⁷ Ke a hia but Farao hna tavat, haba Khong ame ca su odra hnyi hnyei iny at Filisiti, ae hakekeny; anyin a haingen Khong, ka habe, Wâ adre nye he ka ietra, odra ka wâ vat, mʼ adre me he hmetu Aigupito ai:

¹⁸ ke Khong ame su odra hnyi getheniny hnyebuba haten Köiö ae Dra: kʼ ame he but lakon Isaraela ûnyi hnyi hnyei Aigupito me omjehen vat.

¹⁹ Haba Mose ame hom ta je jeiö Josefa: anyin a hia but khemanyin ka laku Isaraela, ka habe, E hnathu ame he Khong ka senʼ öbun; ke hamöbun he ka hom minya je jeiök ûnyi eang.

²⁰ Kʼ adre me he ûhedra Sukotha, me hunuma e Ethama haten hnyebuba.

²¹ Ke haba Iehova ame he hnyi hnyimaködra hnyi lany hnyi ûlâ ame tot wisa, he ka hum odra eû hnyi gethen, ke hnyi hnyinghet, ge meic ama tot wisa, he ka omelami odra; mʼ adre me he ka he hnyi lany me lit:

²² kʼ adre me ca hom hmetu ûlâ ame tot wisa hnyi lany, me meic ame tot wisa hnyi lit, ûnyi hnyi hnyimakan tavat.