Esodo 12 - Iaai Bible 1901 (New Caledonia)

¹ KE haba Iehova ame ha kö Mose me Arona hnyi hnyei Aigupito, ka habe,

² Haba tehi ang ame he ka hnyimakan ta je tehi köbun: kʼ ame he ka tehi a bân i hnyi huna köbun.

³ Ha thʼ öbu ka tavat Isaraela hia adre ûkhaeaköu, ka habe, Haba hnyi bong a libenyitainy tehi ang, adre me he ka ve hom nokon mamoe hoton je lap anyin lakamödra, ûsa khaca nokon mamoe hobi kâu ke lap me ke lap:

⁴ kʼ ame ne ûhnyûkong ke lap ke ca ûcû nokon mamoe, e ame he ka tha hom me at ame laba hakekenyâ hoton ûseiny tavat; kʼ öbun e he ka aû tavat me me ûcû ködrin nokon mamoe.

⁵ Haba nokon mamoe hobi köbun ame he ka ba kongon, ke baga a khaca hunainy: öbun e he ka hom ûnyi hnyi je mamoe, ame ne je got:

⁶ kʼ öbun e he ka ânyâ ke ne o but hnyi bong a fortininy tehi eling: kʼ ame he ka ve hlingâ hnyi sahac hnen ûkhacaköu anyin lakon Isaraela hn.

⁷ Kʼ adre me he ka hom dra me bi hnalimen hnyi li uthwanuma, me hon hwanumen ta je uma adre me he ka han hnyin.

⁸ Ke haba utiö adre le hnyi meic, adre me he ka tha han hnyi lit eling, me areto adre ca levenâ bi; kʼ adre me he ka han me bi uten ge ta je bö ae hiny.

⁹ Ca he öbun ka han hât, kʼ ame ne ölâ hnyi köiö, ke so bi he ka le ge meic; wale ban me je can me önyen hnyekon.

¹⁰ Ke ca he ka ip ke keihen ke ne o but hnyomakatu; ke ka hu kolon bi hnyi hnyomakatu öbun e he ka le degecâ hnyi meic.

¹¹ Ke öbun e he ka han helâng, ka habe, öbun e he ka ca je hnyekubun, me bi taben je hnyeûcabun, me kât anyibun je uci: kʼ öbun e he ka han logot: wale paseka anyi Iehova.

¹² Anyin oge me he ka vheno hnyei Aigupito hnyi lit eling, me kot ta je atö hia hnyi hnyei Aigupito, wale at me omeno; ke oge me he ka bi hwaban ta je khong, hia hnyi Aigupito: inya Iehova.

¹³ Ke haten köbun dra hnyi ta je uma öbun e laba hnyin: ke iny ka wâ but dra, me oge me he ka hanyâûʼ öbun, kʼ ame ca he ka o köbun mok at ame ohia, iny ka he ka kot hnyei Aigupito.

¹⁴ Ke ame he bong ang ka oûnykûmi öbun, mʼ öbun e he ka ânyâ hnyin bijeû kö Iehova: hnyi anyibun je dö hia öbun e he ka bijeû helâ me hnanyibu nyiele balua.

¹⁵ Seven ta je bong öbun e he ka han areto hnyin adre ca levenâ bi: haba hnyi bong a bân öbun e he ka degec leven ûnyi hnyi umöbun ta je uma: anyin a haba at ame he ka han areto adre levenâ hwân hnyi bong a bân ke ne o but ka hnyi bong a seveniny, me adre me he ka subâ degecâ at e unyi Isaraela.

¹⁶ Ke haba hnyi bong a bân ame he ka hu unyibun ûkhaeaköu ae kap, ke hnyi bong a seveniny minya ame he ka hu ûkhaeaköu ae kap unyibun; e ba huliwa adre me he ka ânyâ hnyi je bong eling, ke so thibi jeû an at, wale thibi ûnyi öbun e he ka ânyâ.

¹⁷ Ke öbun e he ka bijeûâ areto adre ca levenâ bi; anyin a haba hnyi bong eling, oge hia but hom köiöbun je köiö ûnyi hnyi hnyei Aigupito: anyin a wale öbun e he ka tuö bong e helâ me hnanyibu nyiele balua.

¹⁸ Hnyi tehi a bân, hnyi bong a fortininy tehi hnyi sahac, öbun e he ka han areto adre ca levenâ bi, ke ne o but hnyi sahaciny bong a twente waniny tehi.

¹⁹ Adre me ca he ka wâ leven hnyi umöbun je uma hnyi je bong a seven: anyin a haba at ame he ka han areto adre levenâ, me adre me he ka subâ degecâ at eling ûnyi hnyi ûkhaeaköu anyin at Isaraela, ame ne atkanyua, ame ne at adre hnokoâ hnyi hnyei.

²⁰ Öbun e ca he ka han ûnyi adre levenâ; kʼ öbun e he ka han areto adre ca levenâ bi hnyi je hnyababun hia.

²¹ Ke haba Mose ame hawâ wahingatiny at Isaraela hia, me ha ködrin, ka habe, Ve ûca thö me hom ta je nokon mamoe hobi kâu anyibun je lap, ke hlingâ ju paseka.

²² Ke hom dʼ öbun ta je thi hisop, me hneû hnyi dra hnyi utkaia, me sa hon hwanuma me li uthwanuma ge dra ûnyi hnyi utkaia; kʼ ame ca he ke at gabun ka dit kâ û ûnyi hnyi umen uma ke ne o but ka hnyi hnyomakatu.

²³ Anyin ame he Iehova ka he hnyi wanben hnyei me kot at Aigupito; ke e ka wâ but dra hnyi hon hwanuma me li uthwanuma, me ame he Iehova ka hanyâûâ hwanuma, kʼ ame ca he ka hna at ûhlingö he ka didrö ka hnyi umöbun je uma he ka kuc öbun.

²⁴ Kʼ öbun e be ka tuö ûnyi e hnân hnanyibu hobi köu me je lakom nyiele balua.

²⁵ Ke öbun ka o ka hnyi hnyei ame he Iehova ka ham köbun helâ me hnen hna ha bânâ, me öbun e ha ka tuö huliwa eang.

²⁶ Ke e ka ha köbun lakubun, ka habe, Ieû bongon huliwa eang?

²⁷ mʼ öbun e he ka thu, ka habe, Wale hut paseka kö Iehova, waleji at ame he hanyâûâ ta je uma umen lakon Isaraela hnyi Aigupito hnyi hnen hna kot at Aigupito me omelö anyitinʼta je lap. Ke haba tavat adre me nom ju me khudrung.

²⁸ Kʼ ame he but lakon Isaraela me ânyâ helâe; adre me ânyâ helâ me Iehova ame hunö Mose me Arona.

²⁹ Ke haba hnyi wanbenset Iehova ame kot ta je atö hia thithö hnyi hnyei Aigupito, hwân ge atö noku Farao a tabâ anyin theron, ke ne o but ka je atö lakon je bâ hnyi uma ceat; me je atö lakon je meno hia.

³⁰ Ke haba Farao ame höhöi thö hnyi hnyinghet, e me lathnyabainy hia, me at Aigupito hia; ke e hu tenge ae gan hmâ hnyi Aigupito; anyin ae ba uma ae ba komok hnyin.

³¹ Ke e ame hao Mose me Arona hnyi hnyinghet, me ha, ka habe, Todrö, he but ge lakeik, öbu me lakon Isaraela; ke he thʼ öbun ka bi athnyaba Iehova helâ me hnöbu; hna ha.

³² Ke hom minya thö ta je hnahat mamoe me halebun je kau, helâji me hnöbu hna ha, ke he thö; ke ha hnahici nya minya thö.

³³ Ke at Aigupito adre me ûjengö hwegiâ tavat mʼ odrin e ie hna but hnyei; anyin a haingödrin, ka habe, Ate me mok hia but.

³⁴ Ke haba tavat adre me hom anyidra salawa adre op kʼ odra tiga ca levenâ, ke anyidra je kumete hnân up salawa hnyin adre lan kâu ge anyidra je ûkhaû, me hijen.

³⁵ Ke je lakon Isaraela adre me ânyâ helâ me hofuc ho Mose; me adre me sumâtâ at Aigupito ge ta je hmanenanginy sileva, me ta je hmanenanginy gol, me ta je ûkhaû:

³⁶ ke Iehova ame okûâ ibetengiö anyin at Aigupito ka tavat, inʼ adre me hna but ta je ûnyi adre me sumâtâ. Mʼ adre me öba ta ûnyi anyin at Aigupito.

³⁷ Ke haba lakon Isaraela adre me he ûhedra Ramase Sukotha ai, ame ne siks haded thauzan tavat adre he, kʼ adre ca aû bi ta je wanakat.

³⁸ Kʼ ame tha he mödra tavat ae se hia ae ve bongon bi, me ta je hnahat mamoe me kau, a omeno ae se hia hmönyin.

³⁹ Kʼ adre me le salawa adre op waleji adre hom ûnyi Aigupito, je ong areto adre ca levenâ bi, anyin adre ca levenâ: anyin adre obʼ odra ûnyi Aigupito, ke ca khanʼ odra bi he ka halubahingen, kʼ adre me ca bi kamec.

⁴⁰ Ke haba je hunainy laba a lakon Isaraela hnyi hnyei Aigupito, me foa haded ke thöte.

⁴¹ Ke haba hnyi obiny je huna a foa haded ke thöte, hnyi bong eling ame he but ta je köiö anyi Iehova hia ûhedra hnyi hnyei Aigupito.

⁴² Ke walang hnyinghet hnân he ka ûnykûmi Iehova hnen lakon Isaraela hia hnyi anyidra ta je dö.

⁴³ Ke Iehova ame ha kö Mose me Arona, ka habe, Walang hnanyibuiny paseka, ka habe, Ame ca he atkanyua ka hnyi an e:

⁴⁴ ke haba athnyabainy tavat hia adre ûco ge mone, u me he ka peritomonâ, me ame he ka hnyi han.

⁴⁵ Ame ca he ka hnyi han hnen atkanyua me athnyaba ame kap hwaban.

⁴⁶ Adre me he ka han e hnyi uma a khaca; ke u me ca he ka hom utiöiny hnyöu ai; ke ca he öbun ka thu ke jeien.

⁴⁷ Ke ame he ka ânyâ e hnen ûkhacaköu hia anyin at Isaraela.

⁴⁸ Ke a ne hu atkanyua ame laba unyâm ame weny he ka hnyi hanen paseka kö Iehova, e so bân peretomonâ obaga hia unyin, me hwaban e ame he ka hakekeny ka hnyi hanen; kʼ ame he ka helâ me at adre hnokoâ hnyi hnyei: ke ame ca he at adre ca peretomonâ ka hnyi han.

⁴⁹ Ame he ka khaca hnanyibu hobi kâu aten hnyei me atkanyua ame laba unyibun.

⁵⁰ Ke haba lakon Isaraela hia, adre me ânyâ helâ me hnö Iehova hna hûna kö Mose me Arona, adre me ânyâ helâi.

⁵¹ Me haba hnyi bong heling, Iehova ame hom lakon Isaraela ûnyi hnyi hnyei Aigupito hoton anyidra je dö.