Esodo 11 - Iaai Bible 1901 (New Caledonia)

¹ HABA Iehova ame ha kö Mose, ka habe, Khaca biju vec oge me he ka oâ kö Farao me Aigupito; hwaban eling e ame he ka hnʼ öbun ûheny ang: ke ka he ka hnʼ öbun, me ame he ka obʼ öbun ûheny ang.

² Ha thö walang ang ka hnyi je hnyikönyen tavat, me me he obaga me omomo ka ve sumâtâ unyin tavat adre me laba ûhakekenyi mʼ odra, ta je hmanenanginy gol me ta je hmanenanginy sileva.

³ Ke Iehova ame okûâ ibetengiö ka tavat hnyi hnyimakan at Aigupito. Ke haba khaca, Mose ame lung hnyi hnyei Aigupito, me unyin lathnyabai Farao, me unyin tavat.

⁴ Ke haingö Mose, ka habe, Walang hna ha hnö Iehova, ka habe, Hnyi wanbenset oge me he ka he hnyi wanben hnyei Aigupito:

⁵ kʼ ame he ka mokcu ta je atö hia hnyi hnyei Aigupito, hwân ge atö noku Farao at ame tabâ anyin theron, ke ne o but ka atö nokon momo at ame khenyö hwit; ke je atö minya lakon je meno hia.

⁶ Kʼ ame he ka hu tenge ae gan hmâ hnyi hnyei Aigupito hia, e ba helâe ehac, kʼ ame ca he hmetu ka helâ.

⁷ Ke ame ca he ke kuli ka bwebwelâ bohmen ka lakon Isaraela hia, wale ka at me meno: me me khanʼ öbun thö a hnö Iehova hna ve obongonâ at Aigupito me at Isaraela.

⁸ Kʼ ame he lathnyabaem hia eang ka he könya, me nom ju könya, me habe, He thö me tavat hia adre me hnu hotom: ke hwaban e oge me he ka he. Ke e ame he ûheny unyi Farao me hmönyin ae gan hmâ.

⁹ Ke haba Iehova ame ha kö Mose, ka habe, Ame ca he Faroa ka ling öbu, mʼ adre me he ka osehia, anyik ta je ûnyi hnân lâiâ hnyi hnyei Aigupito.

¹⁰ Ke Mose me Arona ödru me ânyâ ta je ûnyi hnân lâiâ hnyi hnyimakö Farao: ke Iehova ame onâkâ hnyeku Farao, me ame ca hna lakon Isaraela ûnyi hnyi iny hnyei.