Esodo 10 - Iaai Bible 1901 (New Caledonia)

¹ KE haba Iehova ame ha kö Mose, ka habe, He thö kö Farao: anyin a oge hia but onâkâ hnyekon, me hnyekon lathnyabainy, mʼ inye he ka omanenâ hnyi hnyimaködrin ta je hatök eang:

² mʼ u ma he ka ha hnyi li hnyikönyen nokom, me öbem, ta je ûnyi oge hia but ânyâ ka Aigupito, me ta je hatök oge hia but ânyâ hnyi wanbödra; me me khanʼ öbun dö a inya Iehova.

³ Ke haba Mose me Arona ödru me he kö Farao, me ha kâu, ka habe, Walang hna ha hnö Iehova Khongon at Heberu, ka habe, Ke ne o but kehö u ma he ka höcö öûhnyûkongi u hnyi hnyimakök? hna but lakeik mʼ adre me he ka bi athnyaba könya.

⁴ Ke u je ne höcö hna lakeik wâ bi, haba nyi, oge me he ka kunâ je wahamon ka hnyi em hnyei:

⁵ kʼ adre me he ka khavâ kânâ, me me ca khana at i he ka wâ kânâ: kʼ adre me he ka an je kolon biju ae möt, wale ta je kolon unyibun, hwaban we ae wahma, kʼ adre me he ka an ta je ûö hia ame kû hobi köbun hnyi hnyei:

⁶ kʼ ame be ka öûnöngötâ umâm je uma, me je uma umen lathnyabaem, me; je uma umen at Aigupito hia; ke ame ca wâ helâe hnen je lakâmâm me je lakibâm, hwân hnyi bong adre me laba eang hmelen; ke ne o but hnyi bong ang. Ke ame hwiö me he ûheny unyi Farao.

⁷ Ke haingen je lathnyabai Farao kâu, ka habe, Ame he ka hnân knewe köta at eang ke ne o but kehö? hna but tavat mʼ adre me he ka bi athnyabai Iehova Khongudrin: hawa e ca khatö u bala a ga kong ut Aigupito?

⁸ Ke adre me hao Mose me Arona hmetu kö Farao: me ame ha ködru, ka habe, He thʼ öbun ka bi athnyabai Iehova Khongubun: ke ie je hnyat adre ma he?

⁹ Ke haingö Mose, ka habe, Ohmun e he ka tha he me je wanakat, me wahingatihmun, me je lakuhmun obaga, me wahlu, me je hnahat mamoe, me halehmun je kau; anyin a hamöhmun he ka bi jeu kö Iehova.

¹⁰ Ke ame ha ködru, ka habe, E so e he ka tha e mʼ öbun Iehova helâ me hnök hna hnʼ öbun, me je lakubun ae ûhnyûkong: ke wâ eaû; anyin ae hu monu hnyi hnyimaköbun.

¹¹ Ca he ka helâe: he so bi he thʼ öbun obaga he ka bi athnyabai Iehova; anyin a waleling webun. Kʼ adre obʼ ödru ûheny unyi Farao.

¹² Ke haba Iehova ame ha kö Mose, ka habe, Hai thö hnyamâm hon hynei Aigupito, me me o thö je wahamon ka hnyi hnyei Aigupito, me an ta je khölak hia hnyi hnyei, a kolon biju hwaban we ae wahma.

¹³ Ke haba Mose ame inâ anyin uci hon hnyei Aigupito, ke Iehova ame oâ ang hwei ka hnyi hnyei hnyi bong eling ae bekhöt me lit ae bekhöt; ke hnyi hnyomakatu haba ang hwei ame hom je wahamon.

¹⁴ Kʼ ame ölö je wahamon ka hnyi Aigupito hia, me tabâ je hnyigöulen hnyei Aigupito hia; e ti se hia hmönyin; e ba wahamon helâe ehac, kʼ ame ca he hmetu ka helâe.

¹⁵ Kʼ adre khavâ hon kânâ hia, kʼ ame lit ut hnyei; kʼ adre me an ta je khölakiny hnyei, me je wan ûö hia je kolon hwaban we ae wahma: ke ba hmetu lan hnyot, wale ûö me khölakiny kânâ, hnyi hnyei Aigupito hia.

¹⁶ Me haba Farao ame ie hao Mose me Arona, me ha, ka habe, Oge hia but monu kö Iehova Khongubun, me köbu.

¹⁷ Ke walang ang ö u na okhaca thibi hna degecâ anyik monu, ke khöû thʼ öbu kö Iehova Khongubun, me me he ka hom ûnyi gak mok eang.

¹⁸ Ke ame he ûheny unyi Farao, me khöû kö Iehova.

¹⁹ Ke haba Iehova ame kunâ hwegiâ ang hnyi köiö, kʼ ame kap goranyai je wahamon me hom kâû ka hnyi Köiö ae i Dra; me ba hmetu wahamon me khaca hnyi hnyei Aigupito hia.

²⁰ Ke Iehova ame onâkâ hnyeku Farao, kʼ ame ca hna bala lakon Isaraela.

²¹ Ka haba Iehova ame ha kö Mose, ka habe, Hai thö hnyamâm goranyai, me me menekholom but hnyei Aigupito, ke menekholom ae kböt.

²² Me haba Mose ame hai hnyamen goranyai, me menekholom ae khöt ut hnyei Aigupito hia hnyi kun ta bong;

²³ adre me ca iodraköu, ke ba at ame höhöi hnyi hnen hnyi je bong a kun: i ke so bi e hu lany hnyi je hnyaban lakon, Isaraela hia.

²⁴ Ke Farao ame hao Mose me ha kâu ka habe, He thʼ öbun ka bi athnyabai Iehova; ke hnen biju ta je hnahat mamoe, me halebun je kau: ke so ame tha he mʼ öbun je lakubun ae ûhnyûkong.

²⁵ Ke haingö Mose, ka habe, Hâmâm he ka hna ka hnyi je hnyamöhmun je hut, me je hudiny leû, mʼ ohmun e he ka bi hut kö Iehova Khonguhmun.

²⁶ Ke ohmun e he ka hom minya halehmun je hnahat: ame ca he ka hnen biju hotuhmun ai ke boûjimen can a khaca; anyin ohmun e he ka hom keihen gadrin he ka bi athnyabai Iehova; ke ca khanʼ ohmun ûnyi ae ûcû he ka bi athnyabai Iehova, ohmun ka tiga ca o eling.

²⁷ Ke Iehova ame ouâkâ hnyeku Farao, me ame höcö he ka hnʼ odra.

²⁸ Ke haingö Farao kâu, ka habe, He thö ûhem unyik, ke ō u âu, ca he hmetu ka wâ hnyimakök; anyin a u me he ka mok hnyi bong u me he hmetu ka wâ hnyimakök hnyin.

²⁹ Ke Mose ame thu, ka habe, E so hnâm hna ha, oge me ca he hmetu bala ka wâ hnyimâkâm.