Esodo 1 - Iaai Bible 1901 (New Caledonia)

¹ WALANG ta je ien laku Isaraela, waleji ödrin e o Aigupito ai; ödrin hia me anyidrin je lap ödrin e tha o me Jekob.

² Jia Reubena, me Simeona, me Levi, me Juda;

³ me Isakara, me Zebulona, me Beniamina;

⁴ me Dana, me Nafatali, me Gada, me Asera.

⁵ Haba je hnyat hia a je mâtrâni Jekob, me ödrin sevente: ke Josefa bi hnyi Aigupito.

⁶ Ke a mokcu Josefa me je liamekeiny mē hia, me dö hia eling.

⁷ Ke ame dudu me si but ta je lakon Isaraela, me se hia, kʼ adre me hwege tot; ke unöngötö hnyei gadra.

⁸ Ke a o thö ke thaniny Aigupito a teb ûnyi, at ae ca khana Josefa.

⁹ Ke haingen ka lakeiny, ka habe, Wâ bi, haba tavat ûnyi ge laku Isaraela, ödra se hia but me hwege huta:

¹⁰ ai öbun, ötin e he ka ânyâ metâ ködra; wâ adre nye se but, ke ame ne o thö vat, me adre me he ka utut ka ta je iwahnaihmiöny niötin, me tet metâ köta, me kec ûnyi hnyi hnyei.

¹¹ Anyina wale, adre roe otilâ hudrin ta je tuhan hu-liwa, hnân he ka oveci ödra ge anyidrin ta je huliwa ae hmak. Ke adre me otilâ li hnyaba hobi kö Farao, Pithoma me Ramese, hnân ip omjeû hnyin.

¹² Ke e gan hna okongu ödra, ke gan minya ûdudui ʼdrin me si. Ke hmak je hnyekudrin can lakon Isaraela.

¹³ Ke haba at Aigupitoadre me musö hwegiâ je lakon Isaraela:

¹⁴ kʼ adre me oveci ödra hnyi je bong ge ta je huliwa ae hmak, wale dröu me veto kânâ, me ta je huliwa hia ae ve man hnyi hnyei, haba anyidrin ta je huliwa hia adre me musi ödra hwegiödra hnyin.

¹⁵ Ke haba thaniny Aigupito ame ha ka li at tuö erkin anyin at Heberu, Sifera ien ke at, ke Pua ien ke at:

¹⁶ ke haingen, ka habe, Öbu ka he ka tuö erkin anyin at Heberu, me ô ʼdrin adre me he ka hnokoâ; ke ame ne baga hlingâ but: kʼ ame ne hlu, me ame he ka möt.

¹⁷ Ke outen Khong li at tuö erkin, kʼ ödru me ca ânyâ hna hûna ködru hnen thaniny Aigupito, kʼ ödru me omelö je wainda.

¹⁸ Ke haba thaniny Aigupito, ame hawâ li at tuö erkin, me ha ködru, ka habe, Ieû öbe ânyâ gan ûnyi e, me omelö je wainda?

¹⁹ Ke haba li at tuö erkin ödru me ha, ka liabe, E ca tha ûcû omomo Heberu me omomo Aigupito; anyin a ödrin hwege, me ie hnokoâ, ke tiga ca o but ködrin at tuö erkin.

²⁰ Ke Khong ame ohnahicâ li at tuö erkin: kʼ ame dudu but tavat, me ti se hia hmönyin.

²¹ Ke haba li at tuö erkin ödru me outen Khong, me e ame otilâ anyidru li lap.

²² Ke Farao ame hûna ka lakeiny hia, ka habe, Öbun e he ka khûâ ka hnyi wagewe je wainda hia adre hnokoâ, ke omelö ju je waindusem hia.