Esetera 9 - Iaai Bible 1901 (New Caledonia)

¹ KE haba hnyi tehi a twelv, wale tehi Adara, hnyi bong a thötininy, kʼ ame hakekeny dö he ûen he ka ohwâda hnanyibu me hna hûna hnen than, kʼ ame ûnykûme je iwahnaihmiony me at Juda he ka hu man hudrin; ke so bi adre me wia hmetu bi me me he ka hu man ge at Juda hon tavat adre me hûkötiʼ ödrin;

² me haba at Juda ödrin e ûkhacaköu hnyi anyidrin je taun, hnyi je ke keihen hnyei hia i Asueru than, mʼ ödrin e hinôbeny ködrin a hnyat adre me beokongu ödrin: ke ba at ame tot hnyi hnyimaködrin; anyin adre me outʼ ödrin hnyi ta ogo hnyei hia thithö.

³ Ke haba tavat muso je ke keihen hnyei, rae tavat musi ae beönua, me je gavena, me tavat adre me ânyâ je huliwa anyin than, me ödrin e hadruâ at Juda; anyin ame ta hudrin ot ga Modikai.

⁴ Anyin ae gan hmâ Modikai hnyi uma umen than, kʼ ame lung hnyi je ke keihen hnyei hia thithö: anyin ame gan tot at eling, wale Modikai.

⁵ Ke haba at Juda ödrin e kot je iwahnaihmiony mödrin hia thithö ge hele vat, kʼ adre me hlingâ, me ohia, me ânyâ wedrin bi ka tavat adre me hûkötiʼ ödrin.

⁶ Ke haba at Juda ödrin e hlingâ hnyi Susani hnyaban than me ohia je hnyat a faiv haded.

⁷ Me Pasanedata, me Dalefona, me Asepatha,

⁸ me Poratha, me Adalia, me Aridatha,

⁹ me Pamaseta, me Arisai, me Aridai, me Vaezatha,

¹⁰ je laku Hamana, noku Hamedatha, iwahnaihmiony me at Juda, ödrin ten, adre hlingâ; ke so bi ödrin e ca söh bi anyidrin ta je ûnyi.

¹¹ Haba hnyi bong eling adre me hom ka than ûseiny tavat adre hlingâ hnyi Susani hnyaban than.

¹² Haba than ame ha kö Esetera momo than; ka habe, A hia but at Juda hlingâ me ohia hnyi Susani hnyaban than ödrin faiv haded tavat, me je laku Hamana a ten; ke ieû la hnödrin hna ânyâ hnyi je ke keihen hnyei iny than! Ke ieû u me he ka sumâtâ? mʼadre me he ka ham köu: ke ieû hmetu wem? mʼ adre me he ka ânyâ.

¹³ Ke haingö Esetera, ka habe, Ame ne so ka than, e so he ka hna nyi ka at Juda hnyi Susani he ka ânyâ minya helâ me hnyi bong ang, ke adre me he ka uhno je laku Hamana a ten hnyi tap uto.

¹⁴ Haba than ame ha he ka ânyâ helâe: ke adre me otilâ hnanyibu hnyi Susani; me ödrin e uhno je laku Hamana a ten.

¹⁵ Ke haba at Juda ae hnyi Susani, ödrin e ûkhacaköu hmetu hnyi bong a fotininy tehi Adara, me hlingâ hnyi Susani ödrin theri haded tavat; ke so bi ödrin e ca söh bi anyidrin ta je ûnyi.

¹⁶ Ke haba ke keihen at Juda hnyi je ke keihen hnyei iny than, adre me ûkhacaköu, me tuʼ ödrin bi, me adre me menâ ju ge je iwahnaihmiony mödrin, me hlingâ tavat adre me ikiki ödra a ödrin sevente faiv thauzan; ke so bi adre me ca söh bi anyidrin ta je ûnyi.

¹⁷ Adre me ânyâ ûnyi e hnyi bong a thötininy tehi Adara; ke ödrin e menâ hnyi bong a fotininy, me wia e hnân bijeû me senyin.

¹⁸ Ke haba at Juda a ödra hnyi Susani adre me ûkhacaköu hnyi bong a thötininy, me bong a fotininy; ke haba hnyi bong a fiftininy ödrin e menâ, me wia e hnân bijeû me senyin.

¹⁹ Anyin a wale haba at Juda hnyi je taun ae ûhnyûkong, tavat adre me laba hnyi je taun ae ba haginy, adre me wia bong a fotininy tehi Adara hnân bong senyin me bijeû, me bong ae so, me hnân ûhamköuâ je jekhöû.

²⁰ Haba Modikai ame sihnalimen ta je ûnyi eling me kunâ je tusi ka at Juda hia a ödra hnyi je ke keihen hnyei hia i Asueru than, dok ae hakekeny me dok ae sâkâû,

²¹ he ka ha ködrin, mʼadre me he ka wia bong a fotininy tehi Adara, me bong a fiftininy minya, hnyi ke huna me ke huna,

²² wale li bong waleji hnen at Juda hna menâ ge je iwahnaihmiony mödrin, me tehi waleji adre me wia hmutu ködrin ûheny hnyi hna hmak hnyekon, me me senyin bi, ke ûheny hnyi hna tenge, me me bong bi ae so; mʼ adre me he ka ânyâ hnân li bong bijeû me senyin, me hnân ûhamköuâ je jekhoû, me ham je bwihlany ka tavat ae theduoc.

²³ Ke haba at Juda adre me ogâ he ka ânyâ waleji hoton hnödrin hna bi hwân, me hoton hna sihnalimen ködrin hnö Modikai;

²⁴ anyin a haba Hamana nöku Hamedatha, at Agaga, iwahnaihmiony me at Juda, ame ûnykûme ka at Juda he ka ohiʼ ödrin, me e ame khûâ Puro, wale ugleköb, be ka hlingʼ ödrin me ohiʼ ödrin;

²⁵ ke ame o but ûnyi e ka hnyi hnyimakan than, me e ame hûna hnyi je tusi, me me hmetu ka hnyi hon ban anyin bibiwhakecin ae kong, waleji e ame ûnykûme ka at Juda; me adre me he ka uhno e me je lakon hnyi tap uto.

²⁶ Anyin a wale ödrin e hwenyi ien je bong eling, me je Puro, hoton ien Puro. Anyin a wale can ta je hofuciny tusi ang, me hnödrin hna wâ hnyi ûnyi ang, me ûnyi a o ködrin,

²⁷ haba at Juda, ödrin e owisa, ke ödrin e ogâ, me je mâtrânidrin, me tavat ûkhacaköu mödrin hia, me me ca he ka onua bi, mödrin e he ka tuö li bong eling helâ me hna sihnalimen, me helâ me ûen adre hia but thu, hnyi ke huna me ke huna;

²⁸ me ödrin e he ka ûnykûme li bong eling me tuö hnyi ta je dö hia thithö, ge ta je lap hia, me ta je ke keihen hnyei hia, me ta je taun hia; me me ca he ka hia je bonginy Puro eling unyin at Juda, ke adre me ca he ka bi obiny ûnykûme e unyin je mâtrânidrin.

²⁹ Me haba Esetera momo than, nöku Abihaila me Modikai at Juda, ödru me sihnalimen hwegiâ he ka otilâ hmâ tusi Puro eang a loiny.

³⁰ Ke e ame kunâ je tusi ka at Juda hia thithö hnyi je ke keihen hnyeiny hia dokhu dokhu Asueru a wan haded ke twente seven, me je hofuc ae menyik me hnathu,

³¹ me me tot hmâ li bonginy Puro ang, hnyi li ûen adre me thu, helâ me Modikai at Juda me Esetera momo than ame hûna ködrin, ke haba khaca helâ me hnödrin hna owisa hnân hobi ködrin bi me ta je mâtrânidrin, a ta je ûnyi ge ca han me anyidrin tenge.

³² Ke haba hnanyibu hnö Esetera ame otilâ hmâ ta je ûnyi ge Puro; ke adre me sihnalimen hnyi ke tusi.