Esetera 8 - Iaai Bible 1901 (New Caledonia)

¹ HABA hnyi bong eling Asueru than ame ham ko Esetera momo than uma umo Hamana, iwahnaihmiony me at Juda. Ke Modikai ame o hnyi hnyimakan than; anyin a Esetera ame ha kâu a ödru tha at.

² Ke haba than ame uny jut wen banyen, wale e ame hom ûnyi ga Hamana, me ham bi kö Modikai. Ke haba Esetera ame otilö Modikai hon hnyaba Hamana.

³ Ke haba Esetera ame fuc hmetu hnyi hnyimakan than, kʼ ame ta hnyi li can, me tenge me khöû kâu he ka ohia hna he ka okongoâ ga Hamana at Agaga, me anyin bihihwakecin e ame ûnykûme ka at Juda.

⁴ Me haba than ame inâ kö Esetera uci gol. Me Esetera ame höhöi thö me tot hnyi hnyimakan than.

⁵ Ke haingen momo than ka habe, Ame ne so ka than, ke oge ne hia but wâ ibetengiö hnyi hnyimâkâm, ke ame ne wisa ûnyi e hnyi hnyimakan than, ke ame ne senyin könya, awe, e so adre me he ka sihnalimen mʼ adre me he ka thawâ je tusi wale a ûnykûme Hamana nöku Hamedatha at Agaga, waleji e ame sihnalimen he ka ohia at Juda hnyi je ke keihen hnyei hia iny than:

⁶ anyin oge me he ka kâmâu ka wâ hna okongoâ ame o ka hnyi hon ik hnyei? ke oge me he ka kâmâu ka wâ hnödra hna he ka ohia lahanök?

⁷ Me haba than ame ha kö Esetera momo than, me Modikai at Juda, ka habe, Wâ bi, oge hia but ham uma umo Hamana kö Esetera ke adre hia but Uhno e hnyi tap uto, can e ame inâ hnyamen ka at Juda.

⁸ Ke öbu me he ka sihnalimen ka at Juda helâ me ûnyi ae so köbu, hnyi ien than, me ohmâ haten ge wen banyen than: anyin a haba tusi adre sihnalimen hnyi ien than, me ohmâ haten ge wen banyen than, e ca khana ke at he ka wia hmetu.

⁹ Me adre me hawâ tavat sihnalimen anyin than hnyi ûen eling, hnyi tehi a kuniny wale tehi Sivan, hnyi bong a twente theriny; ke adre me sihnalimen helâ me hna hûna hia ga Modikai ka at Juda, me tavat musi ae beönua, me je gavena, me je taben hnyi je ke keihen hnyei, hwân hnyi India ke ne o but Aithiope, wan haded ke twente seven je ke keihen hnyei, ka hnyi je ke keihen hia hoton hna sihnalimen me ka at Juda hoton hna sihnalimen, me ifucidrin.

¹⁰ Ke e ame sihnalimen hnyi iö Asueru than, me ohmâ ge wen banyen than, me kunâ tavat ae logot adre me tabö hors, me je tusi, wale adre tabô hors ae logot wadring hanen je hors haleny than, adre hnokoâ unyin:

¹¹ haingen tusi, ka habe, haba than ame hna ka at Juda hnyi ke taun me ke taun, he ka ûkhacaköu mʼ adre me tuʼ ödrin bi, he ka okongoâ, me hlingâ, me ohia man maniny tavat hia, me ke keihen hnyei adre me he ka kuc ödrin, me anyidrin tavat ae ûhnyûkong me omomo, me he ka söh anyidrin ta je ûnyi,

¹² hnyi bong a khaca, hnyi je ke keihen hnyei hia i Asueru than, wale hnyi bong a thötininy tehi a twelv, wale tehi Adara.

¹³ Haba hna oc hna sihnalimen, adre me omanenâ ka hnyi je hnyei hia, mʼ adre me he ka ham hnân hnanyibu hnyi je ke keihen hnyei hia, me me laba penapena at Juda hnyi boug eling he ka bi hwaban ka je iwahnaihmiony mödrin.

¹⁴ Me ame he but tavat ae logot adre tabô hors ae logot wadring adre me labö he hnyi huliwa anyin than, adre ûjengö me ologotâ hnen hofuc hwan than; ke adre me ânyâ hnanyibu hnyi Susani hnyaban than.

¹⁵ Ke haba Modikai ame he ûheny unyin than kʼ ame khavâ ûkhaûen than ae udrudrâ me hau, me korona gol ae gan, me ûkhaû a mano lino ae udrudrâ hlit: kʼ adre me senyin me hobâ hnyi taun hnyi Susani.

¹⁶ Ke e unyin at Juda melam, me senyin, me hobâ, me oganâ

¹⁷ Ke haba hnyi je ke keihen hnyei hia, me je taun hia a o ka hnyin hnanyibu me hofuc hwan than, me ame senyin me hobâ at Juda, ke e hu bijeû me bong ae so. Ke se hia tavat aten hnyei adre me hnyi hanen hmi Juda; kʼ adre me outen at Juda.