Esetera 7 - Iaai Bible 1901 (New Caledonia)

¹ ME ame o but than me Hamana he ka ic unyi Esetera momo than.

² Ke haba than ame ha hmetu kö Esetera hnyi bong a loiny hnyi ûen ic waina, ka habe, Ie ûnyi u me he ka sumâtâ, Esetera, momo than? mʼ adre me he ka ham köu: ke ieû wem? mʼ adae me he ka ânyâ ke ne o but hnyi hafiny dokhu.

³ Haba Esetera momo than ame thu me ha, ka habe, Than lö, oge ne hia but wâ ibetengiö hnyi hnyimakâm, ke ame ne so ka than, e so he ka omeli nya hoton hnok hna khöû, me ik hnyei Hoton hnok hna sumat:

⁴ ânyin a adre hia but ûcû ohmun, inya me ik hnyei, he ka ohia, me hlingâ, me oba. Ke adre ne hia but ûcû ohmun hnân lathnyaba obaga me omomo, me oge me ne he ka laba hnyibû, ke so bi, ae ca ûcû iwahnaihmiony, me je omjeû anyin than ame he ka hia.

⁵ Haba Asueru than ame ha kö Esetera momo than, ka habe, Ie at, ke ewa, at ame bi gan hnyi hnyekon he ka ânyâ helâe?

⁶ Haba Esetera ame ha, ka habe, Haba at beûkûc, me iwahnaihmiony, wale Hamana at ang ae kong. Me ame ot Hamana hnyi hnyimakan than me momo than.

⁷ Me ame todrö than hnyi hmonyin ûheny hnyi hna ic waina me be ka hnyi utkânâiny umen than: ke haba Hamana ame tot mê khöûâ e bi kö Esetera momo than; anyin a ga wâ but a ga kong ut ge than.

⁸ Ke ame hmetu than ûheny hnyi utkânâiny umen than ka hnyi dok adre ic waina hnyin; ke wale Hamana ame ta hon hna mokut hnen Esetera. Me haingen than, ka habe, E ame he minya ka lelö momo than unyik hnyi uma? Kʼ ame tiga he but hofuc ûnyi hnyi hnyimen than, me adre me tube hnyimakö Hamana.

⁹ Me haingö Harebona a eunuka hnyi hnyi makan than, ka habe, Wâ bi minya tap utö a ânyâ ga Hamana hobi kö Modikai, at ame ha so hobi kâu than, kʼ ame tot bi hnyi uma umo Hamana, ke fifte kubit ibeûen goranyai. Me haba than ame ba, ka habe, Uhno thö e hnyin.

¹⁰ Me ödrin e uhni Hamana hnyi tap uto waleji e ame penapena hobi kö Modikai. Me ame hia ju hmonyin anyin than.