Esetera 6 - Iaai Bible 1901 (New Caledonia)

¹ HABA hnyi lit eling ame ca mokut bi than; me e ame ûkhûnöng he ka hom tusi hnân oûnykûmeâ ka hnyi ta je bong eji, me adre me aû e hnyi hnyimakan than.

² Ke adre me wâ hna sihnalimen hnyin waleji a omanenâ hwakeci Modikai ga Bigethan, me Teres, ke li eunuka anyin than, a li at hanen hnyat tuö hwanuma, a li at ödru me heleû deny he ka hlingö Asueru than.

³ Me haingen than, ka habe, Ieû hnödra hna ogânâ me ogöranyi Modikai hnyi ûnyi ang? Me haingen lathnyabainy than a hnyat adre me huliwa kâu, ka habe, E ba ûnyi adre me ânyâ kâu.

⁴ Haba than ame ha, ka habe, Ie at hnyi hnyeule? Anyin ame o but Hamana hnyi hnyeuleny uma umen than eio, he ka ha ka than he ka uhni Modikai hon tap uto wale ame hia but penapena hnân hobi kâu.

⁵ Me haingen lathnyabainy than kâu, ka habe, Wa bi, wale Hamana ame tot hnyi hnyeule. Me haingen than, ka habe, E so e ame he jem.

⁶ Me ame didro Hamana. Me haba than ame ha kâu, ka habe, Ieû adre me he ka ânyâ ka at hnen than hna beogânâ? Ke haingö Hamana eû hnyi hnyekon, ka habe, Ame he than ka beoganö ia, hawa ca inya la?

⁷ Me Hamana ame thu ka than ka habe, Haba at hnen than hna beoganâ,

⁸ me so adre me hom but ûkhaûen than waleji ame labö khavâ kâu than, me hors waleji ame labö tabâ than, me bicâ korona anyin than:

⁹ ke adre me he ka hna ûkhaû me hors ka hnyi hnyamen ke taben ae ûnyi hnathu, me me khavâ at hnen than hna beogânâ, me otabâ hon hors me me vheno getheniny taun, me kuku tot hnyi hnyimakan, ka habe, Adre me he ka ânyâ helâe ka at wale hnen than hna beogânâ.

¹⁰ Haba than ame ha kö Hamana, ka habe, Logötö, hom but ûkhaû me hors helâ me hnâm hna ha, me ânyâ helâe kö Modikai at Juda, at ame laba hnyi homagouleny than: ca he ka degec ke ûnyi wale u je ha.

¹¹ Haba Hamana ame hom ûkhaû me hors, me khaûö Modikai, me otabâ e me me he hnyi wanben taun, me kuku tot hnyi hnyimakan, ka habe, Adre me he ka ânyâ helâe ka at hnen than hna beoganâ.

¹² Ke haba Modikai ame hmetu ka hnyi homagouleny than. Ke haba Hamana ame he logot ka hnyi umen uma, ame hmak hnyekon me tube ban.

¹³ Ke Hamana ame thumetu Zeres a âiân me je lahanen hia ge ta je ûnyi hia a o kâu. Ke ame ha kâu hnen tavat unyin ae metâ me Zeres a âiân, ka habe, Ame ne at Juda Modikai waleji u je hwân he ka ta hnyi hnyimakan, u me ca he ka hwege hon, ke u me he bala bi ka ta hnyi hnyimakan.

¹⁴ Me ödrin e tiga ûhnenamö më, me ame o but je eunuka anyin than he ka ie hawo Hamana ka hnyi bijeû a penapena Esetera.