Esetera 5 - Iaai Bible 1901 (New Caledonia)

¹ KE haba hnyi bong a kuniny, haba Esetera ame khavâ je ûkhaûen than, me tot hnyi hnyeule eio hnyin uma umen than, cicö uma umen than: ke haba than ame laba hon anyin theron hnyi uma umen than, cicö hwânuma.

² Ke than ame o Esetera momo than ame tot hnyi hnyeule, ke e ame hnyok kâu: me haba than ame inâ kö Esetera uci gol ae hnyi hnyamen. Me Esetera ame hakekeny dö, me kâlâ hnyi ban uci.

³ Haba than ame ha kâu, ka habe, Ieû wem Esetera lö, momo than? ke ieû hnâm hna sumat? adre me he ka ham köu hia ke ne o but hafiny dokhu.

⁴ Haba Esetera ame thu, ka habe, Ame ne so ka than, ame he than me Hamana ka hnyi hanen bijeû oge hia but penapena hobi kâu, hnyi bong ang.

⁵ Haba than ame ha, ka habe, Ûjongi Hamana thö me me ânyâ helâ me hofuc ho Esetera. Me haba than me Hamana ödru me he me hnyi hanen bijeû a penapena Esetera.

⁶ Ke haba than ame ha kö Esetera, hnyi ûen ame ic waina, ka habe, Ieû wem? ke adre me he ka ham köu: ke ie ûnyi u me he ka sumâtâ? ke adre me he ka ânyâ ke ne o but hnyi hafiny dokhu.

⁷ Me haba Esetera ame thu me ha, ka habe, Walang wek me ûnyi oge me he ka sumâtâ;

⁸ oge ne hia but wâ ibete-ngiö hnyi hnyimakan than, ke ame ne so ka than he ka ham wek, me ânyâ ûnyi oge me he ka sumâtâ, ame he than me Hamana ka hnyi hanen bijeû oge me he ka penapena hobi ködru, ke nyi oge me he ka ânyâ helâ me hofuc hwan than. ʼ

⁹ Haba Hamana ame he me senyin hnyi bong eling me hobâ hnyi hnyekon: ke Hamana ame ō Modikai hnyi homagouleny than, ke ame ca tot, me ca bwebwet gan, me ame unöngötö Hamana ge hmonyin ga Modikai.

¹⁰ Ke so bi Hamana ame hokhnyok, me he but ka hnyi umen uma; me e ame ûkhûnöng he ka hawâ je lahanen me Zeres a âiân.

¹¹ Ke haba Hamana ame omanenâ ködrin hmanenanginy anyin tang omjeû, me ûseiny je lakon, me ta je ûnyi hia than ame oganâ hnyin, me hnen hna ogöranyâ e hon je than me lathnyabainy than.

¹² Haingö Hamana minya, ka habe, Haba Esetera momo than ame ca tha hawâ ke at me than ka hnyi bijeû wale ame ânyâ, ke hake inya thibi; ke e ame he ka hawo nya nyi tha inya me than.

¹³ Ke ca ûnyi hnathu könya ta je ûnyi hia thithö e, hnyi ûen oge me ō Modikai at Juda ame laba hnyi homagouleny than.

¹⁴ Me ame ha kâu Zeres a! âiân me je lahanen hia, ka habe, E so he ka penapena tap uto a fifte je kubit ibeûen goranyai, me nyi u me he ka ûhuenamö me than, mʼ adre me he ka uhni Modikai hnyi hon: ke hwaban e, he senyin dö ka hnyi tha han me than. Ke so hofuc eling kö Hamana; me ame ûkhûnöng he ka ânyâ tap utö.