Esetera 1 - Iaai Bible 1901 (New Caledonia)

¹ HABA hnyi je bong bongu Asueru (haba Asueru ling ame musi hwân hnyi India ke ne o but hnyi Aithiope, ke hnyi je ke keihen hnyei a wan haded ke twente seven:)

² haba hnyi ûen eling ame laba Asueru than hon theroniny dokhon dokhu, hnyi Susani hnyaban than,

³ hnyi huna a kuniny anyin musi, me e ame ânyâ bijeû ka anyin je taben, me lathnyabainy; ke e unyin hmanenanginy Peresi me Madai, je taben me latuhan ta je hnyei:

⁴ me e ame omanenâ tang omjeûiny dokhon dokhu ae hmanenang, me meciny anyin musi ae so, hnyi je bong ae se, a wan haded ke eite je bong.

⁵ Ke ame um dö je bong eling, me haba than ame ânyâ ke bijeû ka tavat hia a ödra hnyi Susani hnyaban than, ka tavat ae gan me tavat ae ûhnyûkong, hnyi seven ta bong, hnyi hnyeuleny utkânâhnyi ama umen than;

⁶ adre me uhno mano ae hau, me udrudrâ löhau, me udrudrâ, me ohmâ ge je tö ae hau a lino ae ûhnyû kong nân me udrudrâ hlit ka hnyi je otru sileva, me je hmolom veto oût ae hau; ke gol me sileva je hna mokut ame tot bon hna bi dek veto ae dra, me hau, me mat, me hlit.

⁷ Ke adre me habelidrin hnyi je kaia gol, (ke ve bongon je kaia,) me waina ae gan anyin than, hoton ibetengiö anyin than.

⁸ Ke adre me ic bi hoton hnanyibu; a gʼ adre me ca ûjengö: anyin a helâe hna owisa hnen than ka hnyat musi hnyi umen uma, a ödrin e he ka ve ânyâ helâ me weny ke at me ke at.

⁹ Ke haba momo than a Vaseti ame ânyâ bijeû anyin omomo hnyi uma umo Asueru than.

¹⁰ Ke haba hnyi bong a seveniny, kʼ ame senyin hnyekon than ge waina, me e ame ha ko Meuman, me Bizetha, me Harebona, me Bigetha, me Abagatha, me Zethar, me Karekas je eunuka a seven, hnyat ödrin e huliwa hnyi hnyimakö Asueru than,

¹¹ he ka hum Vaseti momo than ka hnyi hnyimakan than ame bicâ korona anyin than, he ka omanenâ hmanenanginy momo ka tavat, me je taben: anyin ae so hmainy momo.

¹² Ke haba Vaseti momo than ame höcö he ka he hoton hofuc hwan than a deny anyin je eunuka: anyin a wale ame hmonyin than, kʼ ame ubâhlâ anyin hmonyin.

¹³ Me haba than ame ha ka tavat ae metâ, tavat adre me wâhmakhmetoâ je ûen, (anyin a wale hwakecin than ködrin hia thithö tavat adre me wâhmakhmetoâ hnanyibu, me hna owisa;

¹⁴ ke haba ûtangköu më, Karesena, me Sethar, me Adematha, me Tasesa, me Meres, me Maresena, me Memukan je taben anyin at Peresi me Madai a ödrin seven, tavat adre me wâ hnyimakan than, me laba beönua hnyi dokhu:)

¹⁵ Ieû otin e he ka ânyâ kö Vaseti momo than hoton hnanyibu, anyin a ca ânyâ helâ me hna hûna hnö Asueru than a deny anyin je eunuka!

¹⁶ Haba Memukan ame thu hnyi hnyimakan than me anyin je taben, ka habe, a ca monu Vaseti momo than ka than thibi, ke so bi ka je taben hia, me tavat hia ae hnyi je ke keihen hnyei hia i Asueru than.

¹⁷ Anyin ame he omomo hia ka long hwakecin momo than, me ödrin e he ka hûkotiâ laöiödrin obaga, ödrin ka long a Asueru than ame ûkhûnöng he ka hawo Vaseti momo than ka hnyi hnyimakan, ke ame ca he bi.

¹⁸ Me ame he je momo than hnyi Peresi me Madai, adre me long hna ânyâ hnen momo than he ka ha helâe ka je taben hia anyin than. Me ame he ka gan ûhöciö me hmonyin.

¹⁹ Ame ne so ka than, e so he ka kunâ hofuc hwan than ûnyi gam, me sihnalimen e hnyi je hnanyibu anyin at Peresi me Madai, me me ca wia bi, a gʼ ame ca he hmetu bi Vaseti ka o hnyi hnyimakö Asueru than; ke ame he than ka ham hanymen momo than ka ke at ae so hon.

²⁰ Ke hnyi ûen adre me he ka omanenâ hofuc hwan than wale e ame he ka ha hnyi dokhon dokhu hia, (anyin ae gan hmâ,) me ame he omomo hia ka oganâ laöiödra, tavat ae gan me tavat ae ûhnyûkong.

²¹ Ke so hofuc eling ka than me je taben; ke haba than ame ânyâ helâ me hofuc ho Memukan:

²² anyin a e ame kunâ je tusi ka hnyi je ke keihen hnyei hia iny than, hnyi ke keihen me ke keihen, hoton hna sihnalimen, me ke hnyei me ke hnyei hoton hwan hnyei, mʼ adre me ve musi obaga hnyi umödra je uma, me omanenâ e hoton hwan idrin je hnyei.