Efeso 6 - Iaai Bible 1901 (New Caledonia)

¹ JE wanakat lö, long ju hoton lakamöbun me lahinyöbun hnyi Than: anyin a wale Wisa.

² Ogânâ kâmâm me hinyâm (wale hnanyibu a bân ae hu hna ha bânâ hnyin),

³ me u me hnahic, me laba beûhmâ eang hmeledrany.

⁴ Ke haba öbun je kamen, ca okûâ bi hmonyin ka je lakubun: ke so bi he ka hat ödra hnyi hna nʼ ödra, me hna ûne ködra hnen Than.

⁵ Haba öbun je athnyaba, long ju hoton tavat adre me musi öbun hnyi unyin, ge ot me öbubuny hnyi hnyekubun ae hnathu, helâ me ka Keriso;

⁶ ca huliwa bi hnyi hwenenöu, helâ me tavat adre me osenyinâ at; ke so bi helâ me je athnyabainy Keriso, tavat adre me ânyâ weny Khong ûnyi eû hnyi hnyok;

⁷ me bi athnyaba me hnyok ae weny helâ me ka Than, ke ca ka at bi:

⁸ ke e khanʼ öta a haba ûnyi ae so ame ânyâ ke at, wale e ame he ka hu ûnyi ge Than, a ne athnyaba ke a ne at he baû.

⁹ Ke haba öbun je than, ânyâ helâe minya ju öbun ködra, ca ooti ödra: anyin ae khanʼ öbun a ethö hnyi drany tha Tuhöbun mʼ ödra, ke e ame ca wâhmakhmetoâ bi tavat.

¹⁰ Ke walang obiny, hwege thʼ öbun hnyi Than, ge tang hwegien maniny man.

¹¹ Khavâ ju öbun ûkhaûen vat anyin Khong, me me khanʼ öbun he ka tot metâ ka ta je bihihwakecin anyin diabolo.

¹² Anyin ate me ca ûsöu bi me at, ke ta je musi bi, me ta je man, me ta je tuhan hmeledrany eang ae menekholom, me ta je hanu ae kong hnyi ta je dok ethö hnyi drany.

¹³ Anyin a wale hom dʼ öbun je omjehen hia vat ûnyi ge Khong me me khanʼ öbun he ka tethmâ hnyi bonginy monu, ke at ka ânyâ ta je ûnyi hia thithö, tethmâ ju öbun.

¹⁴ Awe, tethmâ ju öbun, kʼ adre oweikʼ öbun ge hnathu, me tube ûlaibun ge ûkhaûen vat, wale hwakecin ae wisa,

¹⁵ ke adre bi taben tangen je hnyeûcabun ge hna penapena ûthumetu ae so hnyi ûsoköu;

¹⁶ ke tha e me ta je ûnyi hia e, hom minya thʼ öbun singiny labageju, mʼ öbun e hwege he ka omoko ta je ûdöiny meic anyin hulo.

¹⁷ Ke hom minya thʼ öbun hnabicen vat anyin ûhomeli, me hele vat anyin Hanu, wale hofuc hwan Khong:

¹⁸ ke labö hic bala ju öbun geʼ hic me sumat hia hnyi Hanu hnyi ta je ûen hia, me hmâkâ kâe hnen ûjöng hia, me sumat hnân hobi kâu wakap hia,

¹⁹ me hobi könya minya, mʼ adre me he ka ham könya he ka fuc, mʼ inye hwege thö he ka omanenâ ûnyi ae iyong hnyi ûthumetu ae so,

²⁰ inya metâ kʼ adre cö nya can e; me inye hwege thö he ka ha e, wale ae ûcû könya he ka ha.

²¹ Ame he Tukiko, ke liamekeiny a oûnykûmik me at huliwa ae hnathu unyin Than ka thumetu öbun ge ta je ûnyi hia, me me khanʼ öbun dö bonguk me anyik huliwa:

²² wale at oge me kunâ köbun hnân hobi kâu e, mʼ öbun e he ka wâhmakhmetoâ bonguhmun, me me he ka okahwa je hnyekubun.

²³ E so e unyin je liamekeiny ûsoköu me ibetengiö, me labageju, ûnyi ge Khong a Kamen me Than Iesu Keriso.

²⁴ E so e unyibun hia ibetengiö baû, wale a tavat a wedra hnathoâ ka Tuhöta Iesu Keriso.