Efeso 5 - Iaai Bible 1901 (New Caledonia)

¹ ANYIN a wale hnu ju öbun hoton Khong, helâ me je wanakat a oûnykûminy;

² ke he bala hnyi ibetengiö, helâ me Keriso ame betenge köbun, ame ka ham e hobi köta, hnân hut, ke hut adre hlingâ, wale ûnyi ae bo so ka Khong.

³ Ke haba bi ûnyi monu, ke ta je hwakecin hia ae ikiki, ke behnyekon, me ca he hmetu bi ka ha unyibun, anyin ae ca ûcû ka wakap;

⁴ helâe minya ûjao, ke ûhnenamoiny monu, ke ûhiö, wale ke ta je ûnyi ae ca ûcû, ke so bi ole.

⁵ Anyin ae ti khanʼ öbun ang, a haba at ame bi ûnyi monu, ke ikiki hwakecin, ke behnyekon, a at khudrung ka je hnatheat, me ame ca he ka hu hwajekhon hnyi dokhu dokhon Keriso me Khong.

⁶ Ca he ke at ka omonu öbun ge ta je hofuc adre hlo: anyin a ûnyi hnyi ta je ûnyi helâe ame o but tang hmonyin anyin Khong ka tavat adre me ca ûling.

⁷ Anyin a wale ca he öbun ka hanen hwakecidra;

⁸ anyin a öbun menekholom ehac, ke walang ang öbun e melam but hnyi Than: vheno bala ju helâ me ta je lakon melam,

⁹ (anyin a haba wan melam, hwakecin ae so hia, ke hwakecin ae wisa me hnathu),

¹⁰ ke elâm dʼ öbun ûnyi hnân osenyinâ Than;

¹¹ ke ca hnyi hanen öbun ta je huliwa hnyi menekholom ae ba wan, ke so bi he ka thawâ;

¹² anyin a haba ta je ûnyi adre me ânyâ duöngâ, me hnân ohmehma he ka ûsabö.

¹³ Ke haba melam, me wale at ame omanenâ ta je ûnyi hia adre thawâ: anyin ae manen hia hnen e.

¹⁴ Anyin a wale, e ame ha, ka habe, Hmak dö, u at ame mokut, ke tot hmetu thö ûhem hnyi hna mok, me ame he Keriso ka omelami u.

¹⁵ Anyin a wale, wâ wia ûhebun, ca he bi ka helâ me tavat ae monu, ke so bi helâ me tavat ae metâ;

¹⁶ ke oûnyihnathoâ ta je ûen, anyin ae kong ta je bong.

¹⁷ Anyin a wale, ca hwen monu bi öbun, ke wâ ûnykûme weny Than.

¹⁸ Ke ca monu bi Öbun ge waina wale ame okûâ hulo, ke so he ka ounöngöti öbun ge Hanu;

¹⁹ ke ûhnenamö thʼ Öbun hnyin ta je salamo, me ta je khumöng, me ta je fehuainy hanu, ke khumöng dö me senyin hnyi je hnyekubun ka Than;

²⁰ ke ole bala ju ta je ûnyi hia ka Khong hnyi ien Tuhöta Iesu Keriso;

²¹ ke ûlingköu öbun ju hnyi ot ka Keriso.

²² Omomo lö, long ju hoton laöiöbun, helâ me ka Than.

²³ Anyin a ban momo baga, helâ me Keriso a ban ekalesia, ke e thibi omelen unyin.

²⁴ Ke haba hwakecin hna long hoton Keriso hnen ekalesia, me so e helâe minya omomo ka laöiödra hnyi ta je ûnyi hia.

²⁵ Obaga lö, betenge ju ka laöiöbun, helâ me hnen Keriso hna betenge ge ekalesia, ame ka bâm e bi hobi kâu e;

²⁶ me me he ka okâbâ, me ânyâwia ge hna hneû hnyi köiö hnen hofuc,

²⁷ me me he ka hom kâu bi ekalesia ae hmanenang, ae ba hnyikongon me ca hwehweti me ke ûnyi helâe: ke ame he ka kap me ba hnyikongon.

²⁸ Helâe hamen obaga he ka betenge ge laöiödra helâ me ka je unyidra bi. Haba baga at ame betenge ge âiân, e ame ka betenge bi kâu;

²⁹ anyin ae ba bala bi at ame hociâ unyin bi; ke ame hân me tuö e, ke helâe Keriso ka ekalesia;

³⁰ anyin a öta ang je ong outhunyin Keriso.

³¹ Anyin a wale, ame he baga ka hna but kamen me hinyen, me kece ka âiân, me me khaca thibi unyidru.

³² Ûnyi e ae iyong hmonyin: ke oge me ha ge Keriso me ekalesia.

³³ Ke so bi e so öbun e ve betenge ge laöiöbun helâ me öbun bi; ke haba momo e so e ame he minya ka ogânâ baga.