Efeso 3 - Iaai Bible 1901 (New Caledonia)

¹ ANYIN a wale inya Paulo, a cö nya Keriso Iesu hobi köbun Aten ta je hnyei,—

² öbun e ne hia but long hanymök, wale ibetengiö baû anyin Khong adre ham könya hobi köbun:

³ waleji ge hnödra hna omanenâ könya ûnyi ae iyong hnen hna omanenâ, helâ me hnok hna bök ka set okhulitâ,

⁴ ke öbun e ne aû, öbun e he ka wâ anyik metâ hnyi ûnyi ae iyong anyin Keriso;

⁵ waleji adre ca omanenâ ka tavat hnyi ta je dö adrem, helâ me hnödra hna omanenâ kohmun walang ang a je aposetolo ae kap, me ta je perofeta ûnyi ge Hanu;

⁶ a gʼ ame he Aten ke je hnyei ka hnyi hu minya, me hnyi hanen unyin, me hnyi kap ta je ûnyi adre ha bânâ ge Keriso ûnyi ge ûthumetu ae so,

⁷ waleji adre wiö nya hnân athnyabainy hoton bwihlany wale ibetengiö baû anyin Khong a ham könya hoton huliwainy maniny man.

⁸ Ke haba ibetengiö baû eang adre ham könya, wale at ae ûhnyûkong hmonyin hmelen tavat ae ûhnyûkong hnyi wakap hia, me inye he ka khetâ ka Aten ta je hnyei tang omjehen Keriso, ae ca hnân ha bi ûganiny;

⁹ me he ka omelamâ tavat hia, mʼ adre me he ka wâ hna penapena ae iyong adre ikhâlâ adrem unyin Khong wale at ame op ta je ûnyi hia thithö;

¹⁰ mʼ adre me he ka omanenâ walang ang ka ta je than me ta je musi hnyi je dok ethö hnyi drany, metâiny Khong ae ve bongon, a deny ekalesia,

¹¹ hoton hnen hna ûnykûme bânâ, kâû adrem balua, he ka ânyâ ûnyi ge Keriso Iesu a Tuhöta:

¹² e hu but gata ûnyi gan tang hwege me gethen he ka didro, me gejon ûnyi ge labageju kâu.

¹³ Anyin a wale inya oge me sumat mʼ öbun e ca he ka sënyin hnyi anyik ta je vec hobi köbun, wale hnân hobelöû köbun.

¹⁴ Anyin a wale inya oge me cibouca ka Kamen,

¹⁵ ke ûnyi gan adre wenyö ien ta je lap hia ethö hnyi drany, me eang hmeledrany,

¹⁶ me me he ka ham köbun, hoton ûganiny anyin hmanenang, he ka ohwegi öbun ge man ûnyi hnyi Hanu hnyin at eû hnyi hnyibun;

¹⁷ me me he Keriso ka laba eû hnyi je hnyekubun hnen labageju; me me he ka hu iwânibun me taben hnyi ibetengiö,

¹⁸ me me khanʼ öbun he ka tha wâ wia me wakap hia bongon ûlauen, ke ibeûen, ke ûgöranyin, ke ûdiliny,

¹⁹ me he ka khanʼ öbun ibetengiö anyin Keriso ae beönua eling hon metâ, me me he ka ounö-ngöti öbun hnen Khong.

²⁰ Haba at ae khana ânyâ ta je ûnyi hia ae beönua hon hnöta hna sumâtâ me ûnykûme ka hnyin, hoton man at ame huliwa eû hnyi je hnyekuta,

²¹ me so adre ogânâ e hnyi ekalesia me hnyi Keriso Iesu hnyi ta je dö hia nyiele nyiele balua. Amen.