Efeso 1 - Iaai Bible 1901 (New Caledonia)

¹ INYA Paulo, aposetolo anyin Keriso Iesu ûnyi ge weny Khong, oge me sihnalimen ka wakap hnyi Efeso, me tavat adre me labageju ka Keriso Iesu:

² E so e unyibun ibetengiö baû me hnahic ûnyi ge Khong a Kamöta, me Than Iesu Keriso.

³ Haisoâ Khong me Kamen Tuhöta Iesu Keriso, at ame hia but ohnahici öta ge ta je hnahicin hanu hia hnyi ta je dok hnyi drany ûnyi ge Keriso:

⁴ helâ me hnen hna ûcʼ öta kâu, kʼ adre me tiga ca bi taben hmeledrany, mʼ ate me he bi ka kap me ba hnyikonguta hnyi hnyimakan hnyi ibetengiö:

⁵ ke e ame ip öta adrem hnân wiʼ öta me lakon a deny Iesu Keriso, hoton weny ae so,

⁶ hnân ogânâ hmanenanginy anyin ibetengiö baû, waleji a betenge baû köta ûnyi ge Oûnykûminy:

⁷ ke hu but gata deny e, hna ûco möt ûnyi ge dren, wale he ka thang ta je hulo, helâ me ûganiny anyin ibetengiö baû,

⁸ waleji e ame ham gânâ köta hnyi metâ hia, me wâ wia hia,

⁹ ke e ame omanenâ köta ûnyi ae iyong hnyi weny, hoton weny ae so, waleji e ame bân ka ûnykûme ûnyi gan

¹⁰ hnyi hna penapena bekhötâ ta je ûen, me me khaca thibi ta je ûnyi hia ka Keriso, wale ta je ûnyi ethö hnyi drany, me ta je ûnyi eang hmeledrany; hnân hobi kâu,

¹¹ ke hu minya jekhöûta unyin, ke adre ip öta adrem helâ me weny, wale at ame huliwan ta je ûnyi hia hoton ûnykûmenen weny;

¹² mʼ adre me he ka wiʼ öta hnân ogânâ anyin hmanenang, a öta hnyat a böta ka gejon ka Keriso:

¹³ waleji öbun minya, öbun e long hofuc ae hnathu, wale ûthumetu ae so hnân hobi kâu anyibun möt, —waleji öbun e labageju kâu, kʼ adre me otethmʼ öbun hnen Hanu Kap waleji adre me ha bânâ,

¹⁴ waleji haten hnân ohnathoâ jekhöûta, ke ne o but adre me he ka omelö tavat adre ûco, hnân ogânâ anyin hmanenang.

¹⁵ Waleling, inya oge me long anyibun labageju ka Than Iesu, ke manen e ka wakap hia,

¹⁶ me oge me ca menâ ole gabun, oge me bai öbun hnyi hijik je hic:

¹⁷ me me he Khongon Tuhöta Iesu Keriso, Kamen ae hmanenang, ka ham köbun hanuiny metâ me hna omanenâ, mʼ öbun e he ka wâhmakhmeto e:

¹⁸ me obwela li emakan je hnyekubun, me me khanʼ öbun dö gejon hnyi hnen hna hawâ, me ûnyi hnathuiny hmanenanginy jekhon unyin wakap,

¹⁹ me maniny man ae ti gan hmâ hobi köta tavat adre me labageju, hoton ihuliwainy maniny man ae gan hmâ,

²⁰ waleji a huliwa hnyi Keriso, hnyi hnen hna omelö hmetu thö ûnyi hnyi hna mok, me olaba e hnyi ke keihen a metân ethö hnyi drany,

²¹ e beönua bala hon je than hia thithö, me musi, me man, me dokhu, me je ien hia adre me ha, ca hake thibi eang hmeledrany, ke minya bi hnyi ûen ame he ka o:

²² ke e ame ip ta je ûnyi hia hnyi hmelen li can, me hna but kâu he ka bi ban ta je ûnyi hia thithö hobi kâu ekalesia,

²³ wale unyin, a anyin unöngöt, at ame öunöngötâ hia ge ta je ûnyi hia.