Deuteronomi 9 - Iaai Bible 1901 (New Caledonia)

¹ ISARAELA lö, löng ju: u me he ka he hanyâûâ Joridano hnyi bong ang, he ka he me hûgûnâ je hnyei ae gan me hwege hom, je taun ae gan kʼ adre up haginy ke ne o but ka hnyi drany,

² a tavat ae gan me beû, je laku Anaka, tavat ae khanö u, kʼ u je löng hnödra hna ha gadra, ka habe, Ie at ame he ka tot hnyi hnyimakan je laku Anaka?

³ Ke ame he ka khanö u hnyi bong ang a Iehova Khongom ame hnyimakan ânyâm bunyen, e meic ae han; ke e ame he ka ohiʼ ödra, me oûhnyûkongu ödra: ke u me he ka obʼ ödra, me ie ohiʼ ödra, helâ me Iehova ame ha köu.

⁴ Ke e ka hia but Iehova Khongom obʼ ödra hnyi hnyimâkâm, me u me ca he ka ha eû hnyi hnyekom, ka habe, Can hwakecik ae wisa, Iehova ame hum nya me inye he ka hu hnyei ang: ke so bi can hwakecin ae kong anyin tavat eling, Iehova ame obʼ ödra hnyi hnyimâkâm.

⁵ Ca ûnyi: ge hwakecâm ae wisa, me wisainy hnyekom, wale me u me he me hûgûnâ idra hnyei: ke so bi can hwakecin ae kong anyin tavat eling Iehova Khongom ame obʼ ödra hnyi hnyimâkâm, me me hwâdâ hofuc waleji a khemanyin Iehova ka lakâmâm, a Aberahama, me Isaaka, me Jekob.

⁶ Anyin a wale, u ma wâhmakhmetoâ a ca ûnyi ge wisainy hwakecâm me ame ham köu hnyei eang ae so hnö Iehova Khongom me me em: anyin a haba u me hnyei ae hwege nyin.

⁷ Ûnykûme ju, me ca he ka hnying hi ge hnâm hna ohmönyini Iehova Khongom hnyi hnyebuba: hwân hnyi bong u je hna but hnyin hnyei Aigupito, ke ne o but iöbun ang, me öbun e labö ûkhin fuc me Iehova.

⁸ Ke öbun e ohmönyini Iehova hnyi Horeba, me Iehova ame hmönyin köbun kʼ ame he ka ohiʼ öbun.

⁹ Hnyi ûen oge me öliâ bucen he ka kap li veto ae hu, a li vetoiny ûhihinyköu waleji a ânyâ Iehova möbun, ke oge me laba hnyi bucen fâte je lany ke fâte je lit; kʼ oge me ca han me ic.

¹⁰ Ke Iehova ame ham könya li veto ae lau a sihnalimen ge banyen Khong; kʼ adre sihnalimen hnyi li ûnyi eling hofuc waleji a ha köbun Iehova hon bucen hnyin meic, hnyi bong adre ûkhacaköu hnyin.

¹¹ Ke a um dö je lany a fâte me je lit a fâte me haba Iehova ame ham könya li veto ae lau, a li vetoiny ûhihinyköu.

¹² Ke Iehova ame ha könya, ka habe, Todrö, ie utut ûhem ang; anyin ae kong ut ânyâm tavat wale u je hom ûheny Aigupito; adre me saû logot ûnyi hnyi gethen waleji oge hûna ködra; kʼ adre ânyâ hobi ködra hnatheat adre oköiâ.

¹³ Ke haba khaca Iehova ame ha könya, ka habe, Oge wâ but tavat ang, ke wâ bi, ödra tavat ae hwege nyin:

¹⁴ Ca thao nya me oge me he bi nya ka ohiʼ ödra, me kot degecâ iödra ûheny eang hmelen, ke oge me he bi nya ka wiö u me me hnyei ae gan me man hudra.

¹⁵ Waleling me oge me hwio me utut ûhek hon bucen, ke ame hiâ thö bucen ge meic: ke e bi hnyi li hnyamok li vetoiny ûhihinyköu.

¹⁶ Me oge me bwele, ke wâ bi e kong hwakecibun kö Iehova Khongubun; kʼ öbun e ânyâ nokon kau adre oköiâ hobi köbun; kʼ öbun e logot saû ûnyi hnyi gethen waleji a hûna köbun Iehova.

¹⁷ Me oge me kât li veto, me khûâ degecâ ûnyi hnyi li hnyamok me thu hnyi hnyimaköbun.

¹⁸ Ke oge me ta ju hnyi hnyimakö Iehova helâ me a bân, fâte je lany, ke fâte je lit; kʼ oge me ca han me ic; can anyibun ta je hulö hia, waleji öbun e ânyâ hwakecibun ae kong hnyi hnyimakö Iehova me ohmönyinâ.

¹⁹ Anyin oge me outen hmönyin me hwahwacit waleji ame hmönyin köbun Iehova he ka ohiʼ öbun. Ke so bi Iehova ame löng könya minya hnyi ûen eling.

²⁰ Ke Iehova ame hmönyin gan hmâ kö Arona he ka ohia e; ke so bi oge me khawei Arona minya hnyi ûen eling.

²¹ Ke oge me hom anyibun hulö, wale nokon kau öbun e ânyâ, me thong ge meic, me kokot e, me oamamâ ke ne o but ame sesâ but: ke oge me khûâ sesâiny ka hnyi wagewe ame di ûnyi hnyi bucen.

²² Ke öbun e ohmönyini Iehova hnyi Tabera, me Masa, me Kiberoth-atava.

²³ Ke hnyi ûen Iehova ame kunʼ öbun ûheny Kadesi-banea, kʼ ame ha, ka habe, Ölö thʼ öbun, me hom hnyei oge me ham köbun; me öbun e hanyâûâ musi anyi Iehova Khongubun ke öbun e ca labageju kâu, me löng hwan hofuc.

²⁴ Öbun e hia but ûkhin fuc me Iehova hwân hnyi bong oge ibi iouny möbun hnyin.

²⁵ Me waleling oge me ta ju hnyi hnyimakö Iehova hnyi ta je lany a fâte ke je lit a fâte waleji oge to hnyin; anyin a Iehova ame ha he ka ohiʼ öbun.

²⁶ Me oge me hic kö Iehova me ha, ka habe, Than Iehova lö, u me ca he ka ohia lakem me hwajekhom, waleji u je omelö ge manâm man, me hom ûheny Aigupito ge hnyam ae hwege,

²⁷ ûnykûme ju lathnyabaem, Aberahama, me Isaaka, me Jekob; e so u me ca wâ hwakecin ae ûjöng anyin tavat eang, me hwakecidra ae kong, me anyidra hulö:

²⁸ wâ e nye ha hnen hnyei wale u je hum ohmun ûheny hnyin, ka habe, E ca khanö Iehova he ka hum ödra ka hnyi hnyei waleji e ame ha bânâ ködra, ke e ame hûköti ödra, waleling me e ame hum ödra he ka hlingʼ ödra hnyi hnyebuba.

²⁹ Ke so bi em hnyei ödra, ke hwajekhom, waleji u je hom ge manâm man ae gan, me benyâm adre hai.