Deuteronomi 8 - Iaai Bible 1901 (New Caledonia)

¹ HABA ta je hna hûna hia wale oge me hûna köu hnyi bong ang, me, öbun e he ka wâ wia he ka ânyâ, mʼ öbun e möt, me se biâ, me he, me hu hnyei waleji Iehova ame khemanyin ka lakamöbun.

² Ke u ma he ka ûnykûme gethen hia waleji a hum u hnyin Iehova Khongom, hnyi je huna a fâte hnyi hnyebuba, me me oûhnyûkongi u, he ka cubic u, me me wâhmakhmetoâ ûnyi eû hnyi hnyekom, hawa, u me ne he ka tuö hnen je hna hûna, kʼ u je ne höcö bi.

³ Ke e ame oûhnyûkongi u, me omekihnânemi u, me hâm ge mana, wale ûnyi ae ca khanö u, ke ca khana minya lakâmâm; me me khanö u thö a gʼ ame ca möt at hnen thibi areto, kʼ ame möt bi at hnen ta je ûnyi hia ame o ûnyi hnyi hnyimö Iehova.

⁴ Ame ca bobot ânyâm je ûkhaû waleji u me khavâ, kʼ ame ca khibi cam hnyi ta je huna eling a fâte.

⁵ Ke u me he ka ûnykûme eû hnyi hnyekom a gʼ ame kuc u hnö Iehova Khongom helâ me at ame kot nokon.

⁶ Ke u me he ka tuö je hna hûna hnö Iehova Khongom, he ka vheno deny je gethen me outen e.

⁷ Anyin a Iehova Khongom ame hum u ka hnyi hnyei ae so, a hnyei ae hu je wagewe hnyin, a je hna pupua me je köiö ae dit, kʼ ame ve pupua hnyi je hnyi göulen bucen me hnyi je bucen;

⁸ a hnyei ae hu hwit, me bali, me vine, me ometâ, me rimona; a hnyeiny wakaco me elaio me hani;

⁹ a hnyei u me he ka han hnyin, ke ba hmiâ, ke ba ke ûnyi ae hia hnyin e unyâm; a hnyei ae hu fao hnyi hnen vetoiny, ke u me he ka hiny bras hnyi je buceniny.

¹⁰ Ke u me he ka han sekon, me u me he ka hasoi Iehova Khongom ge hnyei ae so e ame ham köu.

¹¹ Ke wâ eâu, wâ u nye hnying Iehova Khongom, me ca tuö bi hnen hna hûna, me anyin je hna owisa, me anyin je hnanyibu, wale oge me huna köu hnyi bong ang:

¹² wâ u nye he bi ka han sekon, me bi uma ae so, me labā;

¹³ ke e ka se hia but halem je kau me halem je mamoe, ke e ka gan dut ânyâm sileva me gol, ke ka se hia but ânyâm je ûnyi hia;

¹⁴ me wale ame bi gan hnyekom, me u me hnying Iehova Khongom at ame hum u ûheny hnyi hnyei Aigupito, ûnyi hnyi hnyaba ae ûthaluo:

¹⁵ at ame lili u tilö u hnyi wanben hnyebuba ae gan me hnân outen, dok ae hu on hnyin ae kahwa, me je sekopio, dok ae mada me ba köien; at ame oâ köu köiö ûnyi hnyi kic a oût;

¹⁶ at ame hâm ge mana hnyi hnyebuba ûnyi a ca wâ hnen lakâmâm; me me oûhnyûkongi u, me cubic u, he ka ohnahici u hnyi obiny:

¹⁷ ke u je ne he ka ha eû hnyi hnyekom, ka habe, A o könya omjeû eang ûnyi ge manik man me tang hwegien hnyamok.

¹⁸ Ke so u ma ûnykûme ko Iehova Khongom, anyin a e at ame ham köu tang hwege he ka hu tang omjeû; me me ohmâ anyin ûhihinyköu waleji e ame khemanyin ka je lakâmâm, helâ me hnyi bong ang.

¹⁹ Ke u je ne hnying Iehova Khongom, me hnu hoton ke je khong bi, me bi athnyabaidrin, me khudrung ködrin, awe, inya oge me ha wia köbun hnyi bong ang a gʼ adre me he ka ohiʼ öbun.

²⁰ Adre me he ka ohiʼ öbun helâ me je hnyei ame he Iehova ka ohia hnyi hnyimaköbun; anyin a öbun e höcö löng hoton hofuc bo Iehova Khongubun.