Deuteronomi 7 - Iaai Bible 1901 (New Caledonia)

¹ E KA hia but Iehova Khongom hum u ka hnyi hnyei wale u me he ka hnyin he ka hu e, ke e ka hia but oc degecâ je hnyei ae se hia hnyi hnyimâkâm, a at Heth, me Girigasa, me Amora, me Kanana, me Perizi, me Hivi, me Jebusi, wale seven je hnyei ae gan me hwege hom;

² ke e ka he Iehova Khongom ka hnʼ ödra hnyi hnyimâkâm; awe, u me he ka kuc ödra me ti ohiʼ ödra hia; u me ca he ka ûhihinyköu mödra, me betenge gadra:

³ ke haba khaca u me ca he ka ûhok ta momo mödra; u me ca he ka ham nokom hlu ka nokon baga, ke u me ca he ka hom nokon hlu hobi kâu nokom baga.

⁴ Anyin a e ame he ka okâ nokom unyik, me me he ka bi athnyabainy ke je khong: me ame he ka ubâhlâ hmönyin anyi Iehova köbun, ke e ame he ka ie ohiö o.

⁵ Ke walang ûnyi öbun e ha ka ânyâ ködra; öbun e he ka kia anyidra je taben hut, me thö amamâ anyidra je veto ame tot, me sö degecâ anyidra je Aseira, me thong degecâ anyidra je hnatheat ge meic.

⁶ Anyin a u hnyei ae kap ko Iehova Khongom: ke Iehova Khongom ame ûcö, u, me me iny hnyei ae ke bongon ae nua hon ta je hnyei hia hnyi hon kânâ.

⁷ Haba Iehova ame ca betenge köbun, me ucʼ öbun can öbun se hia hon je hnyei hia: anyin a öbun tavat ae ûhnyûkong hmönyin ehac:

⁸ ke so bi ûnyi hnyi ibetengiö anyi Iehova köbun, ke hnyi weny he ka oûnyihnathö hnen hna khemanyin ka lakamöbun, waleling me me hum öbun hnö Iehova ge hnyam ae hwege, me omeli öbun ûnyi hnyi hnyaba ae ûthaluo, a ûheny hnyi hnyamö Farao than Aigupito.

⁹ Khanö u thö a Iehova Khongom, e thibi Khong; Khong ae hnathu, at ame tuö ûhihinyköu me ibetengiö ka tavat adre me hnyok kâu, me tuö anyin je hna hûna ka ta je dö a thauzan;

¹⁰ ke ame bi hwaban manenâ ka tavat adre me hûkötiâ e he ka ohiʼ ödra: e ame ca he ka bec ka at ame hûkötiâ e, kʼ ame he ka bi hwaban manenâ kâu.

¹¹ Anyin a wale u me he ka tuö hna hûna, me je hnanyibu, me je hna owisa, wale oge me hûna köu hnyi bong ang, he ka ânyâ.

¹² Ke ame he ka e bi, a u je ne löng je hna owisa eang, me tuö, me anyâ, a gʼ ame he Iehova Khongom ka tuö mou ûhihinyköu me ibetengiö waleji e ame khemanyin ka lakâmâm:

¹³ me e ame he ka hnyok köu, me ohnahici u, me osehiö u: kʼ ame he minya ka ohnahicâ je wan hnyekom, me wan kânâm kânâ, wale ânyâm hwit, me ânyâm waina, me ânyâm wakaco, me lakon halem je kau, me je hnahat halem je mamoe, hnyi hnyei e ame khemanyin ka lakâmâm he ka ham köu.

¹⁴ Ame he ka beönua ânyâm hnahic hon ta je hnyei hia: kʼ ame ca he ka toûnyi ke baga me momo unyibun, me halem omeno.

¹⁵ Ke ame he Iehova ka ohia unyâm ta je mok hia, ke e ame ca he ka ip hom ke mekiny Aigupito ae kong, wale ae khanö u, kʼ ame he ka ip e hon hudrin hia a tavat adre me hûkötiö u.

¹⁶ Ke u me he ka ohia ta je hnyei hia ame he Iehova ka hna köu; kʼ ame ca he emakâm ka betenge gadra: ke u ma ca bi athnyabainy anyidra je khong; anyin â wale hnân nuc u.

¹⁷ U je ne ha hnyi hnyekom, ka habe, E gan je hnyei eling huk, kʼ oge ma kâmâu ka he ka hnyi hnödra!

¹⁸ awe, u me ca he ka outʼ ödra: ke u ma he ka ûnykûme wia ta je ûnyi waleji a ânyâ Iehova Khongom kö Farao me at Aigupito hia;

¹⁹ a ta je ûcûbic ae gan a wâ li emakâm, me je haten, me je ûnyi hnân lâiâ, me hnyamen ae hwege, me benyin adre hai, waleji hnö Iehova Khongom hna hum u kâu: kʼ ame he Iehova Khongom ka ânyâ helâe ka ta je hnyei hia wale u me outen.

²⁰ Ke haba khaca, ame he Iehova Khongom ka kunâ wahankânâ ködra, ke ne o but ame hia but je kolon tavat adre me lubaduöng gam.

²¹ U ma ca he ka outʼ ödra, anyin a e bi unyâm Iehova Khongom, Khong ae gan me hnân outen.

²² Ke ame he Iehova Khongom ka obâ ûsa ûhnyûkong je hnyei eling hnyi hnyimâkâm: u me ca he ka okhaca obʼ ödra, wâ ödra nye se hia but hom omenoiny hnyot.

²³ Ke ame he Iehova Khongom ka hnʼ ödra köu, me okongu ödra ge hna okongoâ ae gan, ke ne o but adre ohiʼ ödra.

²⁴ Ke e ame he ka hna anyidra je than ka hnyi hnyamâm, ke u ma he ka ohia je iödrin eang hmeledrany: e ba at ae khana he ka tot hnyi hnyimâkâm, ke ne o but u je hia but ohiʼ ödra.

²⁵ Ke öbun e he ka thong degecâ ge meic ta je hnatheatiny anyidra je khong: ke u me ca he bi ka behnyekon sileva me gol wale adre tube kâu, me hom e me ânyâm bi, wâ e nye nuc u hnen ûnyi eling: anyin a haba ûnyi e me ûnyi ae ikiki kö Iehova Khongom:

²⁶ ke u me ca he ka hom ûnyi ae ikiki ka hnyi umâm uma, wâ adre nye obnaûhangö u helâ me; ke u ma he ka ti ikikiâ e, me ti hûkötiâ, anyin a e ûnyi adre ohnaûhangoâ.