Deuteronomi 6 - Iaai Bible 1901 (New Caledonia)

¹ KE walang hna hûna, me je hnanyibu, me je hna owisa, waleji a hûna Iehova Khongubun he ka nʼ öbun, mʼ öbun e he ka ânyâ hnyi hnyei öbun e he ka hnyin me me hu:

² mʼ u me he ka outö Iehova Khongom he ka vheno anyin ta je hnanyibu hia, me hnen je hna hûna, wale oge me hûna köu, u, me nokom, me öbem hnyi ta je bong laungon ânyâm möt hia, me me se hia bongom.

³ Isaraela lö, löng ju, me tuö he ka ânyâ: mʼ ume so, me öbun e he ka ti se hia, helâ me hna ha bânâ köu hnö Iehova Khongon lakâmâm hnyi hnyei ame di hnyin debai me hani.

⁴ Isaraela lö, löng ju: haba Iehova Khonguta, me Iehova a khaca;

⁵ ke hamâm he ka hnyok kö Iehova Khongom ge hnyekom ae bekhöt, me hanom ae bekhöt, me tang hwegiâm ae bekhöt.

⁶ Ke haba ta je hofuc eang oge me huna köu hnyi bong ang, me ame be ka e bi hnyi hnyekom:

⁷ ke u me he ka labö nâ e ka lakom, me ûhnenamö gan u ka laba hnyin umâm uma, me he eû hnyi gethen, me u ka mokut, me u ka köûö hmetu.

⁸ Ke u me he ka ca hofuc eling hnân haten hnyi hnyamâm, ke wale minya hnân wen bariny wanben li emakâm.

⁹ Ke u me he ka sihnalimen ta je hofuc e hnyi je ut hwanumen umâm uma, me hnyi je homagöulem.

¹⁰ Ke ka hum u hnö Iehova Khongom ka hnyi hnyei waleji e ame khemanyin ka lakâmâm, a Aberahama, me Isaaka me Jekob, he ka ham köu, a je taun ae gan me so wale u je ca op,

¹¹ me je uma ae ûnöngöt ge ta je ûnyi hia ae so, wale u je ca ounöngötâ, me je hna khû an, wale u je ca koû, je hnyei vine me je hnyei elaio, wale u je ca ta, ke u me he ka han sekon;

¹² awe, wâ eâu, wâ u nye hnying Iehova at ame hum u ûheny hnyi hnyei Aigupito, ûnyi hnyi hnyaba ae ûthaluo.

¹³ U me he ka outö Iehova Khongom; me bi athnyabainy, me khemanyin hnyi ien.

¹⁴ Ca he öbun ka hnu hoton je khong a je khongon tavat igigili öbun;

¹⁵ anyin a haba Iehova Khongom unyâm, me, Khong ame ciâ; wâ e nye ubâhlâ hmönvin anyi Iehova Khongom köu, ke e ame ohiö u but ûnji hnyi hon kânâ.

¹⁶ Ca he öbun ka cubic Iehova Khongubun, helâ me hnobun hna cubic e hnyi Masa.

¹⁷ Öbun e he ka tuö wia je hna hûna hnö Iehova Khongubun, me hnen je hna ohnatho, me anyin je hnanyibu, wale e ame hûna köu.

¹⁸ Ke u me he ka ânyâ ûnyi ae wisa me so hnyi hnyimakö Iehova; mʼ u me so, mʼ u me he me hu gam hnyei ae so waleji Iehova ame khemanyin ka lakâmâm,

¹⁹ a gʼ ame he ka obâ je iwahnaihmiony möu hia hnyi hnyimâkâm, hoton hna ha hnö Iehova.

²⁰ Ke e ka he nokom ka hnei u nyiele, la habe, Ieû bongon je hna ohnatho, me je hnanyibu, me je hna owisa, waleji Iehova Khonguta ame hûna köbun!

²¹ awe u me he ka ha ka nokom, ka habe, Haba ohmun lathnyabai Farao hnyi Aigupito ehac; me Iehova ame hum ohmun ûheny Aigupito ge hnyam ae hwege:

²² ke Iehova ame omanenâ je haten, me je ûnyi hnân lâiâ ae gan me kong ka at Aigupito, me kö Farao, me hnyaban hia hnyi hnyimaköhmun:

²³ ke e ame hum ohmun ûheny e, me me hum ohmun ka hnyin me ham köta hnyei waleji e ame khemanyin ka lakamöta.

²⁴ Ke Iehova ame hûna kohmun he ka inyâ ta je hnanyibu eang, he ka outö Iehova Khonguta, mʼ ate me so bala, me e ame omeli öta, helâ me hnyi bong ang.

²⁵ Ke ame he ka hnân hwakecita ae wisa ate me ne wâ wia he ka ânyâ hna hûna eang ae bekhöt hnyi hnyimakö Iehova Khonguta, hoton hnen hna hûna köta.