Deuteronomi 5 - Iaai Bible 1901 (New Caledonia)

¹ KE haba Mose ame hawâ lakon Isaraela hia, me ha ködra, ka habe,. Isaraela lö, löng ju je hnanyibu, me je hna owisa oge me haimemenâ ka hnyi je hnyikönyöbun hnyi bong ang, me me khanʼ öbun e, me tuö, me ânyâ.

² Haba Iehova Khonguta ame ûbihinyköu möta hnyi Horeba.

³ Iehova ame ca ânyâ ûhihinyköu eang me; lakamöta, ke möta bi, ota hia tavat ae möt hnyi bong ang.

⁴ Iehova ame fuc ûhnyimaköu möbun hon bucen hnyi meic,

⁵ (ke oge me tot hnyi wanbö Iehova möbun hnyi ûen eling, me thumetu öbun ge hofuc ho Iehova: anyin a öbun ot ge meic, kʼ öbun e ca öliâ bucen:) kʼ ame ha, ka habe,

⁶ Inya Iehova Khongom, at ame hum u ûheny hnyi hnyei Aigupito, ke ûheny hnyi hnyaban ûthaluo.

⁷ U me ca he ka ânyâ ke khong hnyi hnyimakök.

⁸ U me ca he ka bi hnatheat hobi köu bi, me oûco ke ûnyi ethö hnyi drany, me eang hmelen, me hnyi köiö hmelen hnyei:

⁹ u me ca he ka khudrung me bi athnyabainy ta je ûnyi e: anyin a inya Iehova Khongom, Khong ame ciâ, at ame bi hwaban monu anyin je kamen ka je mâtrânidrin ke ne o but ka hnyi dö a kuniny me dö a vakiny a tavat adre hûkötiö nya:

¹⁰ kʼ oge me omanenâ ibetengiö ka ta je dö a thauzaniny tavat adre me hnyok könya, me vheno anyik je hnanyibu.

¹¹ U me ca he ka ha bâûâ iö Iehova Khongom: anyin ame ca he Iehova ka ha ae ba kongon at ame ha mono ien.

¹² U ma tuö bong sabath he ka okabâ e, helâ me Iehova Khongom ame hûna köu.

¹³ Siks ta bong u me he ka huliwa hnyin, me ânyâ ânyâm ta je huliwa hia:

¹⁴ ke haba bong a seveniny, me, wale sabath anyi Iehova Khongom: ke ba huliwa u me he ka ânyâ hnyin, a u, me nokom baga, me nokom hlu, me athnyabaem a baga, me momo, me halem bolok, me halem asina, me halem je meno hia, me atkanyua unyâm hnyi je homagöulem; me me tha menâ möu athnyabaem a baga, me momo.

¹⁵ Ke u me he ka ûnykûme a gʼ adre thaluö u hnyi hnyei Aigupito, ke haba Iehova Khongom ame hum u ûheny e ge hnyam ae hwege me benyin adre hai: anyin a wale Iehova Khongom ame hûna köu he ka tuö bong sabath.

¹⁶ Ogânâ thö kâmâm me hinyâm, helâ me Iehova Khongom ame hûna köu, me me se hia je bongom, mʼ u me so hnyi hnyei Iehova ame ham köu.

¹⁷ U ca he ka ûhlingö.

¹⁸ U ca he ka bi ûnyi monu.

¹⁹ U ca he ka venöu.

²⁰ U ca he ka thoiâ ke at.

²¹ U ca he ka behnyekom âiân ke at; kʼ u me ca he ka beweny uma umen ke at, me iny hnyei, me athnyabainy a baga, me athnyabainy a momo, me halen bolok, me haleny asina, me ta je ûnyi hia anyin ke at.

²² Wale je hofuc a ha Iehova ka anyibun ûkhacaköu hia hon bucen ûnyi hnyi wanben meic, me ûlâ, me menekholom ae gan, ke gan hmâ hwan: ke e ame ca bi hanen. Ke e ame sihnalimen e hnyi li veto ae lau, me ham könya.

²³ Ke haba hnyi ûen öbun e löng hwan ûnyi hnyi wanben menekholom, ke tiga hiâ thö bucen ge meic, me öbun e he könya, a je taben hia anyibun je tribu me wahingatibun;

²⁴ ke öbun e ha, ka habe, Wâ bi, Iehova Khonguta ame omanenâ köta hmanenanginy me ûganiny, kʼ ate me hia but löng hwan ame fuc ûnyi hnyi wanben meic: ate me wâhmakhmeto but hnyi bong ang a Iehova ame ûhnenamö me at, kʼ ame möt bi.

²⁵ Anyin a wale geû ate me he but ka mok? anyin ame he meic eang ae gan he ka thung ota: ate me ne löng hmetu hofuc ho Iehova Khonguta, me ate me he ka mokcu.

²⁶ Anyin a ewa at unyin tavat hia ame löng hwan Khong ae möt ame fuc hnyin meic helâ me hnöhmun hna löng, kʼ ame möt bi?

²⁷ U ma hakekenyâ me löng hofuc hia ame he Iehova Khonguta ka ha: ke u me he biju ka omanenâ kohmun hofuc hia ame he Iehova Khonguta ka ha köu: kʼ ohmun e he ka löng me ânyâ.

²⁸ Me haba Iehova ame löng hobun hofuc, waleji öbun e ha könya; ke Iehova ame ha könya, ka haba, Oge löng ut ifucin tavat eang, wale adre me ha köu: ke so hia hnödra hna ha.

²⁹ E na hu ju gadra hnyok ae ûcû mʼ adre me outö nya, me löng bala hnok ta je hna hûna hia, mʼ adre me so me je mâtrânidra nyiele balua!

³⁰ He thö ka ha ködra, ka habe, Hmetu ju öbun ka hnyi umöbun je uma mano.

³¹ Ke u me he bi u ka tot eang unyik, ke oge me he ka omanenâ hia köu ta je hnanyibu, me hna hûna, me je hna owisa, wale u me he ka nʼ ödra, mʼ adre me he ka ânyâ hnyi hnyei oge me he ka ham ködra me me idra.

³² Ke wâ wia ju öbun he ka ânyâ helâ me Iehova Khongubun ame hûna köbun: ca he öbun ka saû ka hnyi ke keihen metâ me me.

³³ Öbun e he ka vheno hia gethen wale Iehova Khongubun ame hûna köbun, mʼ öbun e möt, me so, me se hia bongubun je bong hnyi hnyei öbun e he ka hu.