Deuteronomi 4 - Iaai Bible 1901 (New Caledonia)

¹ ISARAELA lö, löng ju u walang ang je hnanyibu me je hna owisa, oge me nʼ öbun he ka ânyâ; mʼ öbun e he ka möt, me he but me labā hnyei a ham köbun Iehova Khongon lakamöbun.

² Ca he öbun ka bi hanen ka hnyi hofuc oge me hûna köbun, ke ca ohia ke hanen, mʼ öbun e he ka löng hoton je hna hûna hnö Iehova Khongubun wale oge me hûna köbun.

³ Öbun e hia but wâ ge je emaköbun ûnyi a ânyâ Iehova can Baala-peora: anyin a haba tavat hia adre me hnu hoton Baal-peora, me Iehova Khongom ame hia but ohiʼ ödra unyâm.

⁴ Ke haba tavat hia gabun adre kece hmâ kö Iehova Khongubun, me öbun e möt hia hnyi bong ang.

⁵ Wâ bi, oge hia but ûne köbun je hnanyibu me je hna owisa, helâ me Iehova Khonguk ame hûna könya, mʼ öbun ehe ka ânyâ helâe hnyi hnyei öbun e he ka hnyin he ka labā.

⁶ He thʼ öbun ka tuö me ânyâ; ke waleling anyibun metâ me anyibun wâhmakhmeto hnyi hnyimakan ta je hnyei, a tavat adre me he ka wâ je hnanyibu eang, me ha, ka habe, E hnathu hnyei ae metâ, me hnyei wâhmakhmeto hnyei eang ae gan.

⁷ Anyin a ewa hnyei ae gan ae hu khongon ame hakekeny ködra, helâ me Iehova Khonguta ame ânyâ hnyi je ûen hia ate me hongot kâu!

⁸ Ke ewa hnyei ae gan ae hu je hnanyibu me je hna owisa ae so, helâ me je hnanyibu hia eang oge me ip hnyi hnyimaköbun hnyi bong ang?

⁹ Ke so bi o u âu, me tuö u wia, wâ u nye hnying ta je ûnyi u je wâ, ke wâ e nye hia ta je ûnyi e hnyi hnyekom, hnyi ta je bongon ânyâm möt; ke u me he ka ûnö e ka lakom me laöbem;

¹⁰ waleji hnyi bong u je tot hnyi hnyimakö Iehova Khongom hnyi Horeba, kʼ ame ha könya Iehova, ka habe, Ûkhacaköu thö könya tavat, mʼ adre me he ka löng hok je hofuc, me me khanʼ ödra he ka outö nya hnyi ta ogo bong bongon anyidra möt hnyi hnyei, mʼ adre me he ka ûnö ka lakudra.

¹¹ Ke öbun e hakekenyâ me utitilen hmelen bucen; ke haba bucen ame hiâ ge meic ke ne o but ka hnyi drany, ke menekholom, me ûlâ, me lit ae gan.

¹² Ke Iehova ame ha köbun ûnyi hnyin meic: öbun e löng hwan kʼ öbun e ca wâ bi unyin; ke hwan hofuc thibi.

¹³ Ke e ame omanenâ köbun anyin ûhihinyköu, waleji e ame hûna köbun he ka ânyâ, a libenyita je hnanyibu, ke e ame sihnalimen hnyi li veto ae lau.

¹⁴ Ke Iehova ame hûna könya hnyi ûen eling he ka nʼ öbun ge je hnanyibu me hna owisa, mʼ öbun e he ka tuö hnyi hnyei öbun e he ka hnyin he ka labā.

¹⁵ Ke wâ eâu ju öbun; anyin ae ba unyin öbun e wâ hnyi bong ame fuc köbun Iehova e Horeba hnyi meic:

¹⁶ wâ öbun nye okongu öbun, me bihnatheat hobi köbun adre oûco ke ûnyi, ame ne baga, ame ne momo,

¹⁷ ame ne helâ me meno ame he eang hmelen, ame ne helâ me meno ae hu labenyin at ame gâ ethö,

¹⁸ ame ne helâ me ke meno at ame iyâû eû hnyi kânâ, ame ne helâ me ke wâ eû hnyi köiö hmelen hnyei:

¹⁹ ke wâ u nye bwele thö hnyi drany ai, ke u je wâ seûno, me tehi, me je okhû, a je ûnyi ae se hia hnyi drany, kʼ adre me hum u he ka khudrung me bi athnyabainy ta je ûnyi e, waleji Iehova ame ip hobi kâu ta je hnyei hia eang hmeledrany.

²⁰ Ke a hia but Iehova hum öbun, me su öbun ûheny hnyi hnyin inyâ fao, a ûheny Aigupito, mʼ öbun e lakeiny ae hu hwajekhon, helâ me hnyi bong ang.

²¹ Ke haba khaca, Iehova ame hmönyin könya ca ʼbun, me ame khemanyin a oge me ca he ka hnyi he hanyâûâ Joridano, me hnyi he ka hnyi hnyei ae so, wale a ham Iehova Khongom hnân em;

²² ke so bi oge me he ka mokcu hnyi hnyei eang, kʼ oge me ca he ka he hanyâûâ Joridano: ke öbun e he biju ka he hanyâûâ, me hu hnyei ae so eling.

²³ Wâ eâu, wâ öbun nye hnying ûhihinyköu anyi Iehova Khongubun, waleji e ame ûhihinyköu möbun, kʼ öbun e bi hnatheat hobi köbun he ka oûco ke ûnyi a thawâ köu hnö Iehova Khongom.

²⁴ Anyin a meic ae han Iehova Khongom, Khong ame ciâ.

²⁵ Ke e ka hu lakom me laöbem, ke beû ulabaibun hnyi hnyei, kʼ öbun ka okongu öbun bi, me bi hnatheat, he ka oûco ke ûnyi, me ânyâ ûnyi ae kong hnyi hnyimakö Iehova Khongom, me ohmönyinâ:

²⁶ awe, oge me hawâ drany me hmeledrany he ka ohnathoâ gabun hnyi bong ang, a gʼ adre me he ka ie ohiʼ öbun ûnyi hnyi hnyei wale öbun e hanyâûâ Joridano he ka hu gabun; kʼ ame ca he ka se hia bongubun je bong hnyin, kʼ adre me he ka ti ohiʼ öbun.

²⁷ Ke ame he Iehova ka ovesei öbun ka hnyi ta je hnyei, kʼ ame he ka wakhalet biju kolon gabun unyin ta je hnyei ame he Iehova ka lili öbun ka hnyin.

²⁸ Ke öbun e he ka bi athnyabainy eling je khong, wale a ânyâ ge hnyamen at, utö me veto, a ta je ûnyi ame ca wâ, me ca löng, me ca han, me ca bubune.

²⁹ Ke so hi öbun ka he eling ka elöm Iehova Khongom, me u me he ka wâ, u je ne elâm ge hnyekom ae bekhöt, me hanom ae bekhöt.

³⁰ Ke ka o köu vec, kʼ ame ne aat köu ta je ûnyi hia eling, me u me he ka hmetu kö Iehova Khongom hnyi je bong a biliny, me löng hoton hwan hofuc;

³¹ anyin a haba Iehova Khongom me Khong ame betenge; e ame ca he ka hna degeci u, me ohiö u, me hnying anyin ûhihinyköu me lakâmâm, waleji e ame khemanyin ködrin,

³² Ke he thö u ka elâm je bong ehac, ke tiga hiö u, hwân hnyi bong waleji Khong ame op at eang hmelen hnyin, ke hwân hnyi ke keihen drany ke ne o but ka hnyi ke keihen, hawa e hu ûnyi ae gan helâng, kʼ adre me ne löng helâ me ûnyi aug!

³³ Hawa, e hu ke hnyei ame löng hofuc hwan Khong ame fuc hnyin meic, helâ me hnâm hna löng, ke möt bi?

³⁴ Ke hawa, hwakecin Khong he ka he me hom hnyei hnân hobi kâu ûnyi hnyi ke hnyei, ge je ûcûbic, me je haten, me je ûnyi hnân lâiâ, me vat, me hnyam ae hwege, me benyin adre hai, me je ûnyi ae gan hnân outen, hoton ta je ûnyi hia waleji a ânyâ Iehova Khongubun hobi köbun hnyi hnvimaköbun hnyi Aigupito?

³⁵ Adre me omanenâ ûnyi eling köu, me me khanö u thö a Iehova Khong; hake e ke ba ke at.

³⁶ E ame hna köu he ka löng hwan hofuc ûnyi ethö hnyi drany, me me nö u: ke e ame omanenâ köu eang hmelen anyin meic ae gan; ke u je löng hwan je hofuc ûnyi hnyin meic.

³⁷ Ke can anyin e ame betenge ge lakâmâm, waleling me e ame ûca je mâtrânidrin hwabödrin, me hum u ûheny Aigupito ge maniny man ae hwege, kʼ ame tot unyâm;

³⁸ he ka obâ hnyi hnyimâkâm je hnyei ae gan me hwege hom, me hum u he ka ham bi köu idra hnyei me me em, helâ me hüyi bong ang.

³⁹ Ke khanö u thö hnyi bong ang, ke ip hmâ eû hnyi hnyekom a haba Iehova me Khong ethö hnyi drany me eang hmelen; hake e ke ba ke at.

⁴⁰ Ke u me he ka tuö anyin je hnanyibu, me hnen je hna hûna, wale oge me hûna köu huyi bong ang, mʼ u me so, me lakom hwabâm, me me se hia bongom je bong hnyi hnyei a ham köu Iehova Khongom nyiele balua.

⁴¹ Ke haba Moso ame kû je taun a kun hnyi ke keihen Joridano a o hnyin seûno;

⁴² me me kec ka hnyin at ame hlingâ at, wale at ame hlingâ at ame laba hakekeny kâu a utöteta kâu, kʼ ame ca hûkötiâ ehac; me me he ka möt e ka kec ka hnyi ke taun eling:

⁴³ hobi kâu at Reubena, e ame ip Bezeri hnyi hnyebuba, hnyi hnyei a tha hon; me Ramotha hnyi Gileada, hobi kâu at Gada; me Golana hnyi Basana, hobi kâu at Manase.

⁴⁴ Ke walang hnanyibu ame ip Mose hnyi hnyimakan lakon Isaraela:

⁴⁵ ke walang je ohnathoâ, me je hna otilâ, me je hna owisa hnö Mose hna omanenâ ka lakon Isaraela, ödra ka o but ûheny Aigupito;

⁴⁶ hnyi hoton Joridano, hnyi hnyigöulen bucen cicö Bethe-peora, hnyi hnyei i Sihona thaniny at Amora, at ame laba e Hesebona, waleji ame kot hnö Mose me lakon Isaraela, ödra ka o but ûheny Aigupito:

⁴⁷ ke adre me labā iny hnyei, me hnyei i Oga thaniny Basana, a li tuhan at Amora, a walʼ ödru hnyi hoton Joridano hnyi hna o hnen seûno;

⁴⁸ hwân Aroera hnyi baten hnyigöulen bucen e Arenona ke ne o but hnyi bucen Siona (wale Heremona),

⁴⁹ me hnyei ae tha hon hia hoton Joridano e deiö, ke ne o but hnyi köien je hnyei ae tha hon hmelen hwatapkoluiny Pisega.