Deuteronomi 34 - Iaai Bible 1901 (New Caledonia)

¹ KE haba Mose ame ölö ûheny hnyi dok ae thahon hnyi Moaba, ka hnyi hon bucen Nebo, ka hnyi ban Pisega, cicö Jeriko. Ke Iehova ame omanenâ kâu hnyei Gileada hia ke ne o but Dana;

² me Nafatali hia, me hnyei Eferaima me Manase, me hnyei Juda hia, ke ne o but köiö e jio;

³ me Hwaiöu, me Dok ae tha hon hnyi hnyigöulen bucen e Jeriko, tauniny je ûö pama, ke ne o but Zoara.

⁴ Ke Iehova ame ha kâu, ka habe, Walang hnyei oge me khemanyin kö Aberahama, me Isaaka, me Jekob, me ha, ka habe, Oge me he ka ham e ka ta je mâtrânâm: oge hia but omanenâ e ka hnyi li emâkâm, ke u me ca hnyi he bi ka hnyin.

⁵ Me haba Mose, a athnyabai Iehova ame mokcu eling, hnyi hnyei Moaba, hoton hofuc ho Iehova.

⁶ Ke adre me konâm e hnyi hnyigöulen bucen hnyi hnyei Moab cicö Beth-peora; ke ba at ae khana hnen hon ke ne o but hnyi bong ang.

⁷ Ke haba ta je hunai Mose hnyi ûen e ame mokcu, me, wan haded ke twente: ke ca hadedak li emakan, ke ca hia tang hwegeien.

⁸ Ke haba lakon Isaraela, me adre me tengiö Mose hnyi je dok ae tha hon hnyi Moaba, hnyi je bong a thote: me adre me um dö je bong bonginy hnyamoki Mose.

⁹ Ke ame unöngötö Josua nöku Nuna ge hanu ae metâ; anyin a hia but Mose ip li hnyamen hon: ke haba lakon Isaraela me adre me löng kâu, me ânyâ helâ me Iehova ame hûna ko Mose.

¹⁰ Ke ba ke perofeta bala helâ me Mose ame o hmetu hnyi Isaraela, wale hnö Iehova hna iohnyimak mē;

¹¹ wale hnyi ta je haten me ta je ûöman hia, waleji Iehova ame kunâ he ka ânyâ hnyi hnyei Aigupito, ko Farao, me lathnyabainy hia, me iny hnyei hia thithö;

¹² ke ûnyi hnyi hwegien hnyamen hia, me hnyi ûnyi hia hnân outen ae gan hmâ, waleji a ânyâ Mose hnyi hnyimakan at Isaraela hia thithö.