Deuteronomi 33 - Iaai Bible 1901 (New Caledonia)

¹ KE walang hnahic waleji hnö Mose hna hahnahicâ lakon Isaraela ke tiga ca mok.

² Ke e ame ha, ka habe, A o thö Iehova ûheny Sinai, Me köûö ködra ûheny Seira; E ame umumelam but ûheny hon bucen Parana, Ke e ame o ûheny je ten thauzan tavat ae kap: Ke e hnyi hnyamen a metân hnanyibu ae meic hobi ködra.

³ Eke, e ame betenge ge je tribu; E hnyi hnyamâm laten ae kap hia. Ke adre me laba ju hmelen li cam; Adre me he ka ve kap hwâm je hofuc.

⁴ Mose ame huna köta hnanyibu, A jekhon ûkhacaköu anyi Jekob.

⁵ E than hnyi Jesuruna, Hnyi ûkhacaköuiny je taben hnyei, A je tribu Isaraela hia thithö.

⁶ E so e he Reubena ka möt, ke ca mok bi; Ke so e wakhalet ut lakeiny.

⁷ Ke walang hna hahnahici Juda: kʼ ame ha, ka habe, Iehova lö, löng ju ifuci Juda, Me hom e ka hnyi iny hnyei: E ame ka vat hobi kâu ge li hnyamen; Ke u me he ka hadruâ can je iwahnaihmiony mē.

⁸ Ke e ame ha ga Levi, ka habe, E bi unyin ânyâm at ae kap ânyâm Thumim me Urim, At eji u je cubic hnyi Masa, At u je ivinö mē hnyi an Meriba;

⁹ At ame ha ge kamen me hinyen, ka habe, Oge ca wâ e; Kʼ ame ca wâhmakhmeto je liamekeiny mē, Ke ca khana je hing lakon: Anyin adre me hia but wâ wia hwâm hofuc, Me tuö ûhihinyköu möu.

¹⁰ Adre me he ka nö Jekob hnyi ânyâm je hna owisa, Me nö Isaraela hnyi ânyâm hnanyibu: Ödrin e he ka ip utö ae bo so hnyi hnyimâkâm, Me hudiny le adre ca subâ hon ânyâm taben hut,

¹¹ Iehova lö, ohnahicâ tang omjehen, Ke kap huliwa anyin li hnyamen bi: Kot oâ ju je hnyin tavat adre me tot metâ kâu. Me tavat adre me hûkötiâ, mʼ adre me ca tot hmetu.

¹² Ke e ame ha ga Beniamina, ka habe, Ame he ka laba khötkic unyin hnyat a betenge ködrin Iehova; E ame tube e hnyi bong hia, Kʼ ame laba hnyi wanben li bajebenyin,

¹³ Ke e ame ha ga Josefa, ka habe, E so e hnahic bi iny hnyei ga Iehova; Ge ta je ûnyi hnathuiny drany, ke ûnyi ge hau, Me dok minya ae dit ame mokut eû,

¹⁴ Me ta je ûnyi hnathu a waniny seûno, Me ta je ûnyi hnathu a kû ge je tehi,

¹⁵ Me ta je ûnyi ae beönua hnyi je bucen kâû ehac, Me ta je ûnyi hnathu hnyi je dok ae hut nyiele balua,

¹⁶ Me ta je ûnyi ae ûnyi hnathuiny kânâ, me unöngötiny, Me ibetengiö anyin at waleji ame laba hnyi ûö ae ûdedö: E so e o hnahic ka hnyi hon bö Josefa, Ke hon wanben ban at waleji adre ûsâkâûöâ me je liamekeiny mē.

¹⁷ E hmanenang nokon haleny bolok a bân; Ke haba li faoiny, me wale faoiny bolok ae hiny: Ge li ûnyi e e ame he ka hukâ je hnyei hia ke ne o but je obiny hmeledrany: Ke haba ödra, me, je ten thauzan anyi Eferaima, Ke ödra je thauzan anyi Manasi.

¹⁸ Ke e ame ha ga Zebulona, ka habe, Zebuloua lö, senyin dö hnyi hnâm hna didrut; Ke u Isakara, hnyi umâm je uma mano.

¹⁹ Ödru me he ka hawâ tavat ka hnyi bucen; Kʼ adre me he ka hudo eling je hudiny hwakecin ae wisa: Auyin a ödru me he ka hu tang omjeû unyi eû hnyi köiö, Me ta je omjeû adre ikhâlâ hnyi öny.

²⁰ Ke e ame ha ga Gada, ka habe, Hnahic hnen at ame okhulelaûo Gada: E ame laba helâ me liona momo, E at ame oloû usukia benyin, me wanben ban.

²¹ Ke e ame ip ke keihen a bân hobi kâu e bi, Anyin adre ip eling jekhon at me at ham hnanyibu; Ke e ame tha o me je taben hnyei, Kʼ ame ânyâ hna owisa hnö Iehova, Me hnen je hna owisa kö Isaraela.

²² Ke e ame ha ga Dana, ka habe, Haba Dana, me, nokon liona At ame gâ ûheny Basana.

²³ Ke e ame ha ga Nafatali, ka habe, Nafatali lö, u sekom ge ibetengiö Me unöngötö ge hnahic ûnyi ga Iehova: U me he ka tren ke keihen e jio me hwaiöu.

²⁴ Ke e ame ha ga Asera, ka habe, E so e hnahic Asera ge lakon; E so ame kap soâ e hnen je liamekeiny mē, Ke so e ame hneû can hnyin wakaco.

²⁵ Ame he ka fao me bras ânyâm je venyâ; Ke haba bongom je bong me ame he ka tha ûcû me tang hwegiâm.

²⁶ Jesuruna lö, e ba at ae ûcû me Khong, At ame tabâ drany me me hadruo u Ke hon je ûlâ hnyi anyin hmanenang.

²⁷ Haba hnyabam, me, Khong a nyiele balua; Ke eû hmelâm li benyin a nyiele balua; E ame obâ iwahnaihmiony hnyi hnyimâkâm, Ke haingen, ka habe, Ohia but.

²⁸ Ke Isaraela ame laba khötkic, Hake e pupuainy Jekob, Hnyi hnyei ae hu hwit me waina; Eke, ame ta hau ûnyi hnyi anyin drany.

²⁹ Isaraela lö, u hnahic; Ewa at ae tha ûcû möu, a hnyei Iehova ame omelö; E beciny ûhadruo u, Ke wale hele vatiny ânyâm so! Kʼ ame he je iwahnaihmiony möu ka nom ju köu; Ke u me he ka uto anyidra je dok ae görany.