Deuteronomi 32 - Iaai Bible 1901 (New Caledonia)

¹ DRANY lö, tevehlöng ju, ke oge me he ka fuc; Ke so hmeledrany ame löng ifucin hnyimök;

² Ame he ka khula bongon ûûneik helâ me we, Ame he ka ta ifucik helâ me hau; Helâ me we ae menyik hon je bö ae mita, Ke helâ me khukhula hon sa khölak:

³ Anyin oge me he ka omanenâ iö Iehova; He thʼ öbun ka ogânâ Khonguta.

⁴ E Kic, ke bekhöt anyin huliwa; Anyin a je deny hia, me hna owisa: E Khong ae hnathu, ke ba hnyikongon E wisa ke fâfâ.

⁵ Adre hia but iyawâ, ödra ca lakon, ke wale hnyikongudrin; Dö ae hwen höcö, ke hwali hwakecidru.

⁶ Hawa, öbun e bi hwaban kö Iehova helâe, Hnyei ae monu, ke ba metâ? Hawa, ca kâmâm bi at ame ûcû u? E ame up u, me otilö u.

⁷ Ûnykûme ju je bong ehac, Wâhmakhmeto je hunainy ta je dö ae se: Hnö thö kâmâm, me e ame he ka thumetu u; Wahingatâm minya, ke ödrin e he ka ha köu.

⁸ Hnyi ûen waleji Beönua ame ha idrin ka ta je hnyei hnyin, Kʼ ame oveseâ lakon tavat, Me wale e ame kia je hnyigöulen tavat, Hoton ûganiny lakon Isaraela.

⁹ Anyin a haba jekhöû Iehova, me iny hnyei bi, Ke Jekob iny hnyei adre tuluto.

¹⁰ E ame wâ e hnyi hnyebuba, Ke hnyi dok ae hnyot ke ba aten, ke je meno thibi adre me kuku; Me e ame igigilöâ, me nâ e, Kʼ ame tuö e helâ me wan li emakan.

¹¹ Helâ me man aeto ame ânyâwia hâuen, Ke ame gâ igigilö hon lakon, Me helâe e ame ulolo li labenyin, Me kaptilʼ ödrin hon li labenyin:

¹² Iehova thibi at ame lelö e Ke ba ke khong atkanyua unyin.

¹³ E ame otabâ e hon je dok ae görany eang hmelen, Kʼ ame han je troban hnyei, Ke e ame habelen e ge hani ûnyi hnyi kic, Me wakaco ûnyi hnyi oût;

¹⁴ Bata ûnyi ge kau, ke dân basin mamoe, Tha e me pipikenyainy lakon mamoe Me je mamoe baga ûheny Basana, me je got, Tha e me pipikhenyainy wan hwit; Ke u je ijem waina a dren wan vine.

¹⁵ Ke haba Jesuruna ame pipikhenya bi, kʼ ame nyikâ can: U pipikhenya but, me gan unyâm, me habubut: Waleling me me degec Khong at a op e, Me oûnyibâûâ Kic at a omelö e.

¹⁶ Adre me okûâ anyin ciâ ûnyi ge je khong atkanyua, Kʼ adre ohmönyinâ ge anyidra ta je ûnyi ae ikiki.

¹⁷ Adre me hudo ka ta je demoni, ke ca Khong bi, A je khong ae ca khanʼ ödra, Ae teb ûnyi kʼ ödrin e teb o, Kʼ ame ca outen ge lakamöbun.

¹⁸ U je hnying ge Kic, at ame hnöku u, Me ca ûnykûme hmetu ge Khong at ame up u.

¹⁹ Iehova ame wâ me höci ödra, Can hna ohmönyinâ e ge lakon baga me hlu.

²⁰ Me e ame ha, ka habe, Oge me he ka ikhâlâ hnyimakök gadra, Oge me he ka wâ ieû obiny ködra: Anyin a ödra me dö ae ûjöng, Je wanakat ae ba labageju.

²¹ Adre hia but okûâ anyik ciâ can ûnyi a ca Khong bi; Adre hia but ohmönyini nya ge anyidra ta je ûnyi baû: Me oge me he ka okûâ anyidra ciâ ge je hnyat a ca hnyei bi; Oge me he ka ohmönyini ödra ge hnyei ae monu.

²² Anyin adre hû meic hnyi anyik hmö nyin, Ke ame thong ke ne o but dok ae dit hmönyin, Me an hmeledrany me troban, Me thong ta je taben je bucen.

²³ Oge me he ka ûkhöûnâ hudra je ûnyi ae kong, Oge me he ka khûâ ködra anyik je fana hia:

²⁴ Adre me he ka delâ ge mekihnânem, me aû ge kahwainy unyidra, Me mok ae hiny; Ke oge me he ka kunâ ködra je meno ae ûhûlû, Me je oniny kânâ adre me mekiny.

²⁵ Ame he hele vat ka otengiâ eû hnyou, Ke ot eiö hnyin uma; Ame he ka hlingâ hidröu me hlu baû, Hendreng me at ae hûen.

²⁶ Oge ha, ka habe, Oge me he ka ovesei ödra, Oge me he ka bi obiny hna ûnykûmi ödra ge tavat:

²⁷ Ke so bi oge me outen hmönyin anyin iwahnaihmiony, Wâ e nye ca wâhmakhmeto iwahnaihmiöny mödra, Wâ adre nye ha, ka habe, Adre hia but hai hnyamöhmun, Ke Iehova ame ca ânyâ ta je ûnyi hia ang.

²⁸ Anyin a ödra hnyei ae ba ûne, Ke ba metâ unyidra.

²⁹ Ödra na metâ ju, me wâhmakhmeto ûnyi eang, Mʼadre me he ka ûnykûme obiny ködra!

³⁰ Ama kâmâu at a khaca he ka hnu thauzan, Me okecâ ten thauzan ge li at a lo, Ame ne ca bân anyidra Kic ka ûco degeci ödra, Me hna degeci ödra hnö Iehova?

³¹ Anyin ae ca tha ûcû anyidra kic me anyita Kic, Kʼ ame he ta je iwahnaihmiony möta ka ohnathoâ.

³² Anyin a haba anyidra vine, me ûnyi hnyi vineiny Sodoma, Me ûnyi hnyi ta hnyeiny Gomora: Wan vine anyin ûö hnân mekiny je wan anyidra vine, Ke hiny anyidra je thi vine.

³³ Haba anyidra waina me mekiny tanimo, Me dân ûdöiny asip a at ovecâ.

³⁴ Hawa, adre ca ip unyik ûnyi eang, Me okeceâ hmâ hnyi tang omjehek?

³⁵ Hamök he ka ip hwaban monu, me bi hwaban, Hnyi ûen ame he ka haû je cadra: Anyin ae hakekeny jut bonginy anyidra vec, Kʼ ame he ka logot ta je ûnyi ame he ka o ködra.

³⁶ Anyin ame he Iehova ka owisa lakeiny, Me ietra can lathnyabainy; E ka wâ ae ba manidrin man, Ke ba kolon, a hnyat adre ca, ke hnyat adre hna.

³⁷ Ke e ame he ka ha, ka habe, Ewa je khongudrin, A kic waleji ödrin e labageju kâu;

³⁸ At ame an pipikhenyainy anyidrin je hut, Me ijem wainainy je hudiny anyidrin ic? E so ödrin e köûö me hadruʼ öbun, Me bi hnabâ hnân hobi köbun.

³⁹ Wâ bi walang ang, a inya but ang, Ke ba ke khong unyik: Oge me hlingâ, ke oge me omelö; Oge hia but oâtâ, ke oge me ometo: Ke ba at ae khana he ka hûgûnâ ûnyi hnyi hnyamok.

⁴⁰ Anyin a oge me ogöranyâ hnyamok ka i hnyi drany, Me ha, ka habe, Inya oge me möt balua,

⁴¹ Ke oge ne khet anyik hele vat ae hadrongöc, Me hom hna owisa ge hnyamok; Awe, oge me he ka ip hna okongoâ ka; je iwahnaihmiony mönya, Me bi hwaban tavat adre me hûkötiö nya.

⁴² Oge me he ka habelen anyik je fana ge dra me me monu, Kʼ ame he anyik hele vat ka han utiö: Me dren tavat adre hlingâ, me je bâ, Hwân ge ban je taben iwahnaihmiony.

⁴³ Ta je hnyei lö, tha senyin me lakeiny: Anyin a e ame he ka bi hwaban dren lathnyabainy, Me ip hna okongoâ ka je iwahnaihmiony mē, Me ohia hwaban hulöiny iny hnyei, hobi kâu lakeiny.

⁴⁴ Ke haba Mose ame he but me ha ta; je khumöng ang ka hnyi hnyikonyen tavat, a e me Hoshea nöku Nuna.

⁴⁵ Ke Mose ame um dö ha ta je hofuc eang ka at Isaraela hia:

⁴⁶ me haingen ködra, ka habe, E so öbun e kong hnyekunâ ta je hofuc eang hia oge me ha köbun hnyi bong ang; wale mʼöbun e he ka ha ka je lakubun he ka wâ! wia me ânyâ ta je hofucin hia hnanyibu ang.

⁴⁷ Anyin a ca ûnyi bi e ae hâhâ köbun: anyin a e melibun, ke haba ûnyi ge ûnyi eling me öbun e he ka osehia bongubun je bong hnyi hnyei öbun e he ka hanyâûâ Joridano ka hnyin mʼ öbun e labā.

⁴⁸ Ke Iehova ame ha kö Mose hnyi bong eling, ka habe,

⁴⁹ Öliâ thö bucen eang a Abarima, ka hnyi bucen Nebo, wale hnyi hnyei Moaba, cicö Jeriko; me wâ hnyeiʼ Kanana, wale oge me ham ka lakon Isaraela me me idrin:

⁵⁰ me u me he ka mokcu hnyi hon bucen e u me he ka öliâ, me tha laba me lakâmâm; helâ me Arona tuhâm ame mok hnyi hon bucen Hora, ke e ame: tha laba me lakamen:

⁵¹ anyin a öbu monu könya hnyi wanben lakon Isaraela, hnyi an; Meriba hnyi Kadesi, hnyi hnyebuba Zin: can obe ca okabi nya unyin lakon Isaraela.

⁵² Ke u me he ka wâ hnyei hnyi hnyimâkâm; ke so bi u me ca he ka hnyi hnyei, wale oge me ham ka lakon Isaraela.