Deuteronomi 31 - Iaai Bible 1901 (New Caledonia)

¹ KE haba Mose ame he me ha ta je hofuc eang ka at Isaraela hia.

² Haingen ködra, ka habe, Wan haded ke twente but je hunaik hnyi bong ang; ke ca khanö nya hmetu he ka didrut me didrö: ke Iehova ame hia but ha könya, ka habe, U me ca he ka hanyâûâ Joridano eang.

³ Ke haba Iehova Khongom me e ame he ka bân ka hanyâûâ hnyi hnyimâkâm; ke e ame he ka ohia je hnyei eang hnyi hnyimâkâm, me me em biju: haba Josua me e ame he ka hanyâûâ hnyi hnyimâkâm, helâji me Iehova ame ha.

⁴ Ke ame he Iehova ka ânyâ ködra helâ me e ame ânyâ kö Sihona me Oga, a li thaniny at Amora, me lakeidru; waleji e ame ohia.

⁵ Kʼ ame he Iehova ka hnʼ ödra hnyi hnyimaköbun, mʼ öbun e he ka ânyâ ködra hoton je hna hûna hia oge, hia but hûna köbun.

⁶ Hwege thʼ öbun me hnyok baga but, ca ot bi, ke ca öbubuny bi gadra: anyin a Iehova Khongom me e at ame tha he möu; e ame ca he ka hia unyâm, me hna degeci u.

⁷ Ke Mose ame hawo Josua me ha kâu hnyi hnyimakan at Isaraela hia, ka habe, Hwege thö, me hnyok baga but, anyin a u me he ka hom tavat eang ka hnyi hnyei waleji a khemanyin Iehova ka lakamödra, he ka ham ködra; ke u me he ka ohuâ e ködra.

⁸ Ke haba Iehova me wale at ame he hnyi hnyimâkâm; ke e ame he ka tha e bi möu, e ame ca he ka hia unyâm, me hna degeci u: ca ot ke ca öbubuny bi.

⁹ Ke haba Mose ame sihnalimen hnanyibu eang me ham e ka hnyat bihut a laku Levi, tavat adre me vadren tangen ûhihinyköu anyi Iehova, me wahingatiny at Isaraela hia.

¹⁰ Ke Mose ame hûna ködra, ka habe, Hnyi obiny je huna a seven, hnyi ûen adre thu, a cicö hunainy hna baûâ, hnyi bijeûiny je uma hunuma,

¹¹ e ka o at Isaraela hia he ka manen hnyi hnyimakö Iehova Khongom, hnyi dok e ame he ka ûca, me u me he ka aû hnanyibu eang hnyi hnyimakan at Isaraela hia, ke hnyi je hnyikönyidra.

¹² Ûkbacaköuâ tavat, obaga me omomo me tavat ae ûhnyûkong, me atkanyua unyâm hnyi ânyâm je lap, mʼ adre me löng, me nâ, me outö Iehova Khongubun, me wâ wia he ka ânyâ ta je hofucin hia hnanyibu eang;

¹³ me me löng hnen lakudra á hnyat adre tiga ca löng, we nâ he ka outö Iehova Khongubun, hnyi je bong hia öbun e laba hnyi hnyei öbun e he ka hanyâûâ Joridano ka hnyin he ka hu e.

¹⁴ Ke Iehova ame ha kö Mose, ka habe, Wâ bi, e hakekeny jut bong u me he ka mok hnyin: hawo Josua, mʼ öbu me he ka tha tot hnyi uma hnân ûkhacaköu, me oge me he ka hûna kâu. Me haba Mose me Josua, me, ödru me tha he me tot hnyi uma hnân ûkhacaköu.

¹⁵ Ke Iehova ame manen dut hnyi uma hnyi ûlâ ame tot wisa: ke haba ûlâ ame mokut hnyi hwanumen uma.

¹⁶ Ke haba Iehova ame ha kö Mose, ka habe, Wâ bi u me he ka mokut unyin lakâmâm; kʼ ame he tavat ang ka köûö me bi ûnyi monu me ke je khongon hnyei adre me he ka hnyin he ka tha laba mödra, kʼ adre me he ka hna degeci nya, me oûnyibâûâ hnok hna ûhihinyköu mödra.

¹⁷ Ke ame he ka ubâhlâ anyik hmönyin ködra hnyi bong eling, ke oge me he ka, hna degeci ödra, me ikhâlâ hnyimakök gadra, kʼ adre me he ka ön ödra, ke ame he ka o ködra je hulö me vec ae se; mʼ adre me he ka ha hnyi bong eling, ka habe, Hawa, ame ca o köta je hulö ang can Khong a ca tha e möta?

¹⁸ Ke oge me he ka ikhâlâ hnyimakök hnyi bong eling, can ta je hulö hia adre me he ka ânyâ, anyin a hnyimaködra bi ka ta je khong.

¹⁹ Ke wâlang ang sihnalimen ju khumöng ang hobi köbun, me nâ e ka lakon Isaraela: ip ju hnyi je hnyimödra, me me ohnathu nya khumöng ang ka lakon Isaraela.

²⁰ Ke iny ka hia but hum ödra ka hnyi hnyei waleji oge khemanyin ka lakamödra, ame di ge debai me hani; ke ödra ka hia but han sekon me pipikhenya; me adre me he ka hnyimakodra ka ke je khong, me bi athnyabaidrin, me höciö nya, me oûnyibâûâ hnok hna ûhihinyköu.

²¹ Ke ka o ködra je hulö me je vec ae se, me ame he khumöng ang ka ohnatho ködra; anyin a e ame ca he ka hia hnyi hnyimen je mâtrânidra: anyin ae khanö nya ûnykûmenödra adre me he ka ânyâ, a walang ang, kʼ iny tiga ca hia but hum ödra ka hnyi hnyei waleji oge khemanyinâ.

²² Ke haba Mose ame sihnalimen khumöng eang hnyi bong eling me nâ e ka lakon Isaraela.

²³ Ke e ame hûna kö Josua nöku Nuna, ka habe, Hwege thö ke hnyok baga thö; anyin a u me he ka hom lakon Isaraela ka hnyi hnyei oge khemanyin ködra: me oge me he ka tha inya möu.

²⁴ Ke Mose ame umo sihnalimen ta je hofucin hnanyibu eang hnyi tusi, ke ne o but ame um dö,

²⁵ me haba Mose ame huna ka at Levi, a tavat adre me vadren tangen ûhihinyköu anyi Iehova, ka habe,

²⁶ Hom dö tusiny hnanyibu eang, me ip e hnyi tangen ûhihinyköu anyi Iehova Khongubun, kʼ ame he ka hnen ling hnân ohnatho gam.

²⁷ Anyin a oge wâ but hnâm hna ûkhin fuc, ke hwege nyem: wâ bi, iny tiga möt unyibun hnyi bong ang, me öbun e hia but ûkhin fuc me Iehova; ke hawa bi iny ka mokcu?

²⁸ Ûkhacaköu thö könya wahingatiny hia anyibun je tribu, me je homakan gabun, mʼ oge me he ka ha ta je hofuc eang ka hnyi je hnyikonyödra, me hawâ drany me hmeledrany he ka ohnathoâ ködra.

²⁹ Anyin ae khanö nya a iny ka mokcu, me öbun e he biju ka oikiki öbun, me sâû ûnyi hnyi gethen waleji oge hûna köbun; ke ame he ka o kong köbun hnyi ta je bong a biliny; anyin a öbun e he ka ânyâ ûnyi ae kong hnyi hnyimakö Iehova, he ka ohmönyinâ e ge je huliwa ae kong anyin li hnyamöbun.

³⁰ Ke Mose ame ha hnyi je hnyikonyen ûkhacaköu hia anyin at Isaraela, hofucin khumöng ang, ke ne o but ame um dö.