Deuteronomi 30 - Iaai Bible 1901 (New Caledonia)

¹ KE e ka o köu ta je ûnyi hia eling, wale hnahic me hnaûhangö oge hia but ip hnyi hnyimâkâm, ke u me he ka ûnykûme gan hnyi je hnyei hia wale Iehova ame obö u ka hnyin,

² ke u me he ka hmetu kö Iehova Khongom, me löng hoton hwan hofuc helâ me ta je ûnyi hia oge me hûna köu hnyi bong ang, a u me lakom, tha e me hnyekom ae bekhöt, me hanom ae bekhöt:

³ awe, ame he Iehova ka ohmetu u ûnyi hnyi hna bâ, me betenge gam, me he hmetu ka ûkhacaköuö u ûnyi hnyi ta je hnyei hia wale Iehova ame hia but oveseiö u ka hnyin.

⁴ Eja ke ne adre ne obâ keihen ka hnyi obiny drany, me ame he Iehova Khongom ka ûkhacaköuö u ûheny, me hum u ûheny:

⁵ ke ame he Iehova ka hum u ka hnyi hnyei a labā lakâmâm mʼ u me he ka labā, ke e ame he ka osoi u, me osehiö u hon je lakâmâm.

⁶ Ke ame he Iehova Khongom ka peritomonâ hnyekom, me hnyekon je mâtrânâm, mʼ u me we Iehova Khongom ge hnyekom ae bekhöt me hanom ae bekhöt, mʼ u me möt bi.

⁷ Ke ame he Iehova Khongom ka ip je hnaûhangö hia eling hon je iwahnaihmiony mou, me tavat adre me hûkötiö u adre oveci u.

⁸ Ke u me he ka hmetu me löng hoton hofuc ho Iehova me ânyâ anyin je hnanyibu wale oge me hûna köu hnyi bong ang.

⁹ Ke ame he Iehova ka osehiö u hnyi ânyâm ta je huliwa hia, hnyi wan hnyekom me wan halem je meno, me wan kânâm kânâ, me me so bi; anyin ame he hmetu Iehova ka senyin gam hnyi so, helâ me e ame senyin ka lakâmâm:

¹⁰ u je ne he ka löng hoton hofuc ho Iehova Khongom, he ka tuö anyin je hnanyibu me hnen je hna otilâ wale adre sihnalimen hnyi tusiny hnanyibu ang: ke u je ne hmetu kö Iehova Khongom me hnyekom ae bekhöt, me hanom ae bekhöt.

¹¹ Anyin a haba hnanyibu ang wale oge me hûna köu hnyi bong ang, me e ca hmak köu, ke ca sâkâû.

¹² Ca e bi hnyi drany, mʼ u me he ka ha, ka habe, Ie at ame he ka ölö hnyi drany ai hobi köta, me me hom e köta, mʼ ate me löng me ânyâ?

¹³ Ke haba khaca, ca e bi hnyi hoton köiö, mʼ u me he ka ha, ka habe, Ie at ame he ka kâcâ köiö hobi köta, me hom e köta, mʼ ate me löng me ânyâ!

¹⁴ Ke so bi e hakekeny hmönyin hofuc köu, a hnyi hnyimâm me hnyi hnyekom, mʼ u me he ka ânyâ.

¹⁵ Wâ bi oge hia but ip hnyi hnyimâkâm hnyi bong ang möt me hnahic, ke mok me hulö;

¹⁶ anyin a inya oge me hûna köu hnyi bong ang, he ka hnyok kö Iehova Khongom me vheno deny je gethen, me tuö anyin je hnanyibu, me hnen je hna otilâ, me hnen je hna owisa, mʼ u me möt me osehia, me ame he Iehova Khongom ka ohnahici u hnyi hnyei u me he ka hnyin he ca labā.

¹⁷ Ke e ka hwio hnyekom, ke u me ca löng bi, ke adre me ne lili u, he ka khudrung ka ke je khong me bi athnyabaidrin;

¹⁸ awe, inya oge me ha hwegiâ köbun hnyi bong ang a öbun e he ka mok; kʼ öbun e ca he bi ka laba beû hnyi hnyei öbun e he ka hanyâûâ Joridano me he ka hnyin he ka labā.

¹⁹ Inya oge me hawâ drany me hmeledrany hnyi bong ang he ka ohnatho köbun, a oge hia but ip hnyi hnyimâkâm möt me mok, ke hnahic me hnaûhangö: anyin a wale ûca thö möt mʼ u me möt a u me je mâtrânâm:

²⁰ me hnyok ju kö Iehova Khongom, me löng hoton hwan hofuc, me kece kâu; anyin a e melam, ke at ame osehia bongom je bong: mʼ u me he ka labā hnyei Iehova ame khemanyin ka lakâmâm, jia Aberahama, me Isaaka, me Jekob, he ka ham ködrin.