Deuteronomi 3 - Iaai Bible 1901 (New Caledonia)

¹ ME ate me khenyi me he hnyi gethen ûhenyʼ Basana: me ame o but Oga than Basana ûcûta, a e me lakeiny he ka vat hnyi Ederei.

² Ke Iehova ame ha könya, ka habe, U me ca he ka outen e, anyin a oge me hna e, me lakeiny hia, me iny hnyei ka hnyi hnyamâm; ke u me he ka ânyâ kâu helâji me hnâm hna ânyâ kö Sihona thaniny at Amora at ame laba e Hesebona.

³ Ke Iehova Khonguta ame hnö Oga minya thaniny Basana me lakeiny hia ka hnyi hnyamöta, mʼ ate me kuc ödra, ke ne o but ame ba kolon.

⁴ Ke ate me hûgûnâ anyin ta je taun hia hnyi ûen eling; ke ba taun ate me ca hûgûnâ ûnyi gadra; a sikste je taun, wale hnyei hia hnyi Aregoba, dökhu dökhu Oga e Basana.

⁵ Haba je taun hia eling, adre si haginy goranyai igigilö, kʼ ame hu je homagouleny, me je venyâiny; ke ca ha bi je taun ae se hia ae ba haginy.

⁶ Ke ate me ohiʼ ödra helâ me hnöta hna ânyâ kö Sihona thaniny Hesebona, me ti ohia je taun hia adre labā tha e me omomo me tavat ae ûhnyûkong,,

⁷ Ke ate me hûgûnâ hobi köta bi omeno hia, me ta je ûnyi hnyi je taun.

⁸ Ke, haba hnyi ûen eling ate me hûgûnâ hnyei ûnyi ge li thaniny at Amora, hoton Joridano, hwân hnyi hnyigöulen bucen e Arenona ke ne o but hnyi bucen Heremona;

⁹ (haba at Zidona adre me hwenyi ien Heremona eling, me Siriona, ke haba at Amora adre me hwenyi ien, me Senira;)

¹⁰ a ta je taun hia hnyi dok ae tha hon, me Gileada hia, me Basana hia, ke ne o but Saleka, me Ederei, a je tauniny dökhu dökhu Oga hnyi Basana.

¹¹ (Anyin a haba Oga thaniny Basana, me hake e thibi kolon at Refai; wâ bi, haba hnen hna mokut, me fao; hawa ca e hnyi Raba taun anyin laku Amona? haba ibeûen e me nain ta kubit, ke foa kubit ûlauen, hoton kubitiny at.)

¹² Ke ate me labā hnyei e hnyi ûen eling: hwân Aroera hnyi hnyigöulen bucen e Arenona, me hafiny hnyei hnyi bucen Gileada, me je tauniny, me waleji oge ham ka at Reubena me Gada:

¹³ ke haba kolon Gileada me Basana hia, a dökhu dökhu Oga, me waleji oge ham ka hafiny tribu Manase; uile hnyei hia hnyi Aregoba, a Basana hia. (Adre me hwenyi ien hnyei e, me, hnyei anyin at Refai.

¹⁴ Haba Jaira nöku Manase ame hûgûnâ hnyei hia e Aregoba, ke ne o but hnyi hnyigöulen at Gesuri me at Maaka; ke e ame hwenyi ien, a wale Basana, hoton ien bi, me Havoth-jaira, ke ne o but hnyi bong ang.)

¹⁵ Ke oge me ham Gileada ko Makir.

¹⁶ Ke oge me ham ka at Reubena me Gada, hwân Gileada ke ne o but hnyi hnyigöulen bucen e Arenona, a hnyi wanben e, me baten: ke ne o but hnyi wagewe Jaboka, wale hnyigöulen laku Amona:

¹⁷ ke Araba minya, me Joridano, me baten e, hwân Kinereth, ke ne o but hnyi köien Araba, wale Köiö ae Hiny hmelen hwatapkoluiny Pisega, ke e deiö.

¹⁸ Ke oge me hûna köbun hnyi ûen eling, ka habe, Haba Iehova Khongubun ame ham köbun hnyei eang he ka labā: ke öbun e be ka penapena ûnyi hnân vat me hanyâûâ hnyi hnyimakan je liamekeiny möbun a lakon Isaraela, tavat hia ae hwege.

¹⁹ Ke haba laöiöbun, me je ûhnyûkongibun, me halebun omeno, (e khanö nya ae se hia halebun omeno) adre me he ka laba biju hnyi anyibun je taun wale oge ham köbun;

²⁰ ke ne o but Iehova ame he ka omenâ je liamekeiny möbun, helâ möbun, me bu gadra hnyei waleji Iehova Khongubun ame ham ködra hnyi ke keihen Joridano: me öbun e he ka ve hmetu ka hnyi je gabun wale oge ham köbun.

²¹ Ke oge me hûna kö Josua hnyi ûen eling, ka habe, A wâ but li emâkâm ûnyi a ânyâ Iehova ka li than eling: awe, ame he Iehova ka ânyâ helâe ka je dökhu u me he ka o ka hnyin.

²² Ca he öbun ka outʼ dra: anyin a haba Iehova Khongubun, me wale at ame vat hobi köbun.

²³ Ke oge me khöû kö Iehova hnyi ûen eling, me ha, ka habe,

²⁴ Iehova lö, u je hwân ka omanenâ ûgânâm ka athnyabaem, hnyamâm ae hwege; anyin a ie khong ethö hnyi drany me eang hmelen ae khana he ka ânyâ helâ me ânyâm ta je huliwa, me helâ me hnâm hna ânyâ ae man?

²⁵ Iny ha he ju ka hnyi hama hnyei ae so hnyi ke keihen Joridano, wale bucen ae so, me Lebanona.

²⁶ Ke Iehova ame hmönyin könya cabun, me ame ca ling nya bi; ke Iehova ame ha könya, ka habe, Soju ang, ca he hmetu ka ha könya hofuc e.

²⁷ Ölö thö ka hnyi hon Pisega, me bwele jio, me ka hnyi hwadrö, me hwaiöu, me deiö, me wâ ge li emakâm; anyin a u me ca he ka hnyi hanyâûâ Joridano eang.

²⁸ Ke hûna thö ko Josua, me nâ, me sihwegiâ e: anyin a e ame he ka hnyimakan tavat eang, ke e ame he ka olabʼ ödra hnyi hnyei wale u me wâ.

²⁹ Me ate me laba hnyi hnyigöulen bucen a e cicö Bethe-peora.