Deuteronomi 29 - Iaai Bible 1901 (New Caledonia)

¹ WALANG je hofuciny ûhihinyköu, waleji Iehova ame hûna kö Mose he ka ânyâ me lakon Isaraela hnyi hnyei Moaba, ke ca ha bi hna ûhihinyköu mödra hnyi Horeba.

² Ke haba Mose ame hawâ at Isaraela hia thithö, me ha ködra, ka habe, Öbun e wâ ta je ûnyi hia a ânyâ Iehova kö Farao hnyi hnyimaköbun hnyi hnyei Aigupito, me lathnyabainy, me iny hnyei hia:

³ a ta je ûcûbic ae gan waleji a wâ je emaköbun, me je haten, me je ûnyi hnân lâiâ gan eling:

⁴ ke a ca ham bi köbun Iehova hnyok ae wâhmakhmeto, me li emakan ae bwela, me li hnyikonyen ame löng, ke ne o but hnyi bong ang.

⁵ Ke oge hia but hum öbun hnyi hnyebuba fâte je huna: e ca bobot anyibun je ûkhaû, kʼ ame ca bobot je tangen hnyeûcabun hnyi je cabun.

⁶ Öbun e ca han areto, me ijem waina me grâg: me me khanʼ öbun a inya Iehova Khongubun.

⁷ Ke öbun e o but ka hnyi dok ang, me ame tot metâ köta Sihona tuhan Hesebona, me Oga than Basana he ka vat, me ötin e kuc ödra:

⁸ me otin e hûgûnâ idru hnyei me ham e me iny at Reubena, me Gada, me hafiny tribu Manase.

⁹ Anyin a wale tuö ju ta je hofuciny ûhihinyköu eang, me ânyâ, mʼ öbun e hnahic hnyi ta je ûnyi hia öbun e ânyâ.

¹⁰ Öbun e tha tot hnyi bong ang, a öbun hia hnyi hnyimakö Iehova Khongubun; a anyibun je taben, me je tribu, me wahingat, me je homakan, a tavat hia aten Isaraela,

¹¹ lakubun, me laöiöbun, me atkanyaua unyâm hnyi hnâm je hna hunuma, hwân ge at ame höcö hlogom ke ne o but at ame soû belâm köiö:

¹² me u me he ka tot hnyi ûhihinyköu anyi Iehova Khongom me hnen hna khemanyin wale ame khemanyin köu Iehova Khongom hnyi bong ang:

¹³ me e ame he ka ohmö u hnyi bong ang mʼ u me he bi ka iny hnyei, me e ame he ka Khongom, hoton hofuc e ame ha köu, ke hoton hofuc e ame khemanyin ka lakâmâm, a Aberahama, me Isaaka, me Jekob.

¹⁴ Ke oge me ca hake ânyâ ûhihinyköu ang möbun me khemanyin köbun;

¹⁵ ke so bi hobi ködra adre me tha tot möta eang hnyi hnyimakö Iehova Khonguta hnyi bong ang, me tavat minya ae hia unyita hnyi bong ang:

¹⁶ (anyin e khanʼ öbun a ötin e laba hnyi hnyei Aigupito, me he but hnyi wanben je hnyei waleji öbun e he hanyâûâ;

¹⁷ ke öbun e hia but wâ je ûnyi ae ikiki gadra, me anyidra je idola, a utö, me veto, me sileva, me gol, waleji unyidra:)

¹⁸ wâ e nye hu at gabun, ame ne baga, ame ne momo, ame ne lap, ame ne tribu, at ame hwio hnyekon hnyi bong ang ûnyi ga Iehova Khonguta he ka he me bi athnyabainy je khongon je hnyei eling; wâ e nye hu unyibun wân ame okûâ ûnyi hnân mekiny, ame ne ûthâ;

¹⁹ ke e ka löng hofucin ûhangö eang, me e ame he ka hahnahicâ e bi hnyi hnyekon me ha, ka habe, Eja ke ne oge ne vheno weny hnyekuk, he ka bi hnen ûnyi ae kukuba ge ûnyi ae mada, me oge me he ka so but:

²⁰ ke ame ca he Iehova ka hna e, ke so bi, ame he ka sâ hmönyin anyi Iehova me anyin ciâ ka at eling, kʼ ame he bi ka ta hon hnaûhango hia adre sihnalimen hnyi tusi ang, ke ame he Iehova ka kot degecâ ien ûnyi eang hmeledrany.

²¹ Kʼame he Iehova ka ke ip e ka hnyi ke ûnyi ae kong hnyi ta je tribu anyin at Isaraela hia, hoton ta je hnaûhangöiny ûhihinyköu, wale adre sihnalimen hnyi tusiny hnanyibu eang.

²² Ke ame he ka ha hnen dö a biliny, a je lakubun adre me he ka o hwaböbun, me atkanyua at ame he ka o ûheny hnyi dok ae sâkâû, ödra ka wâ je mekiny hnyei eling, me je mok a kunâ Iehova;

²³ me haba hnyei hia me teio, me alase, me ame hiâ, kʼ adre ca belökâ, kʼ ame ca wa, ke ba hnaonying ame kû hnyin, helâ me hna ohia Sodoma, me Gomora, me Adema, me Zeboim, waleji Iehova ame ohia ge anyin hmönyin me anyin û:

²⁴ ke ame he je hnyei hia ka ha, ka habe, Can ieû Iehova ame ânyâ helâng ka hnyei ang? can ieû hmönyin ae gan eling?

²⁵ Ke adre me he ka thu, ka habe, Can adre degecâ ûhihinyköu anyi Iehova Khongon lakamödra waleji e ame ânyâ mödra, hnyi ûen e ame hum ödra ûheny hnyi hnyei Aigupito;

²⁶ ke adre me he me bi athnyabainy ke je khong, me khudrung kâu, a je khong ae ca khanʼ ödra, ke e ame ca ham ködra:

²⁷ anyin a wale ame ubâhlâ hmönyin anyi Iehova ka hnyei ang, he ka oâ kâu hnaûhango hia adre sihnalimen hnyi tusi eang:

²⁸ ke Iehova ame oc degeci ödra hnyi könödra kânâ hnyi hmönyin me hnyi û, me hmönyin ae gan, kʼ ame obʼ ödra ka hnyi ke hnyei bi, helâ me hnyi bong ang.

²⁹ E unyi Iehova Khonguta ta je ûnyi ae iyong: ke haba ta je ûnyi ae manen, me e unyita me lakuta nyiele balua, mʼ ate me he ka ânyâ ta je hofucin hia hnanyibu ang.