Deuteronomi 27 - Iaai Bible 1901 (New Caledonia)

¹ KE haba Mose me wahingatiny at Isaraela ödrin e hûna ka tavat, me ha ka habe, Tuö ju ta je hnanyibu hia oge me hûna köbun hnyi bong ang.

² Ke haba hnyi bong öbun e he ka hanyâûâ Joridano ka hnyi hnyei a ham köu Iehova Khongom, me u me he ka khon je veto ae gan, me botru dröuiny:

³ ke u me he ka sihnalimen hon ta je hos uciny hia hnanyibu eang, u ka hia but he hanyâûâ; mʼ u me he ka he ka hnyi hnyei a ham köu Iehova Khongom, a hnyei ame di hnen debai me hani, helâ me Iehova Khongon lakâmâm ame hia but ha bânâ köu.

⁴ Ke öbun ka hia but hanyâûâ Joridano, me öbun e he ka khon je veto eling, wale oge me huna köbun hnyi bong ang, hnyi bucen Ebela, me up dröuiny.

⁵ Ke u me he ka otilâ taben hut eling kö Iehova Khongom a tap veto: u me ca he ka inâ ke ut fao ethö ka hnyi hon.

⁶ U me he ka otilâ taben hut kö Iehova Khongom ge je veto ae bekhöt, ke u me he ka hudo hon je hudiny leû kö Iehova Khongom:

⁷ ke u me he ka hudo je hudiny ûsoköu, me han eling; ke u me he ka senyin hnyi hnyimakö Iehova Khongom.

⁸ Ke u me he ka sihnalimen manenâ hon je vetoiny ta je hofuciny hia hnanyibu eang.

⁹ Ke haba Mose me tavat bihut a at Levi ödrin e ha ka at Isaraela hia, ka habe At Isaraela lö, ca mede bi, ke löng ju, haba hnyi bong ang me u hnyei i Iehova Khongom.

¹⁰ Anyin a wale u me he ka löng hofuc ho Iehova Khongom, me ânyâ anyin je hnanyibu, me hnen hna hûna, me hnen je hna owisa, walang oge me hûna köu hnyi bong ang.

¹¹ Ke haba Mose ame hûna ka tavat hnyi bong eling, me ha, ka habe,

¹² Ame he hnyat eang ka tot hon bucen Gerizim he ka hahmahicâ hnyei, öbun ka hia but hanyâûâ Joridano; jia Simeona, ke Levi, ke Juda, ke Isakara, ke Josefa, ke Beniamina:

¹³ ke walang hnyat ödrin e he ka tot hon bucen Ebala he ka hangâ; jia Reubena, ke Gada, ke Asera, ke Zebulona, ke Dana, ke Nafatali.

¹⁴ Ke ame he at Levi ka thu me ha ka at Isaraela hia ge hwan ae hwege, ka habe,

¹⁵ Hnaûhangö at ame bi hnatheat adre sö adre me ne oköiâ, kʼ ame otilâ duöngâ, e hûkötianö Iehova huliwainy hnyamen at tretrau. Ke ame he tavat hia ka thu me ha, ka habe, Amen.

¹⁶ Hnaûhangö at ame ca oûnyihnatho kamen me hinyen. Kʼ ame he tavat hia ka ha, ka habe, Amen.

¹⁷ Hnaûhangö at ame oc hnyigöulen ke at. Ke ame he tavat hia ka ha, ka habe, Amen.

¹⁸ Hnaûhangö at ame omono wadröu eû hnyi gethen. Kʼ ame he tavat hia ka ha, ka habe, Amen.

¹⁹ Hnaûhangö at ame ohwalö hna owisa ka atkanyua, me nakahme, me safac. Kʼ ame he tavat hia ka ha, ka habe, Amen.

²⁰ Hnaûhangö at ame tha mokut me âiân kamen, anyin a e ame hai hnamejin kamen. Kʼ ame he tavat hia ka ba, ka habe, Amen.

²¹ Hnaûhangö at ame tha mokut me meno. Kʼ ame he tavat hia ka ha, ka habe, Amen.

²² Hnaûhangö at ame tha mokut me haniny, ame ne nokon kamen a hlu, kʼ ame ne nokon hinyen. Ke ame he tavat hia ka ha, ka habe, Amen.

²³ Hnaûhangö at ame tha mokut me hinyen âiân. Kʼ ame he tavat hia ka ha, ka habe, Amen.

²⁴ Hnaûhango at ame kot ikhâlâ ke at. K! ame he tavat hia ka ha, ka habe, Amen.

²⁵ Hnaûhango at ame kap hwaban me me hlingâ at ae ca ûcû ka mok. Kʼ ame he tavat hia ka ha, ka habe, Amen.

²⁶ Hnaûhango at ame ca hnyi ohwâdâ hofuciny hnanyibu eang he ka ânyâ. Kʼ ame he tavat hia, ka habe, Amen.