Deuteronomi 26 - Iaai Bible 1901 (New Caledonia)

¹ KE u ka o ka hnyi hnyei ame ham köu Iehova me em, ke u je hom me labā:

² awe, u me he ka hom je wan kânâ hia a bân, wale u me he ka hom ûnyi hnyi em a ham köu Iehova Khongom: ke u me he ka hitangen, me hom e ka hnyi dok ame he Iehova Khongom ka ûca me me umen ien bi.

³ Ke u me he ka he ka at ame bi hut hnyi ûen eling, me ha kâu, ka habe, Inya oge me omanenâ kö Iehova Khongom hnyi bong ang, a iny o but ka hnyi hnyei a khemanyin Iehova lakamöta he ka ham köta.

⁴ Ke ame he at bihut ka kap tang ûnyi gam, me ip hnyi hnyimakan taben hut anyi Iehova Khongom.

⁵ Ke u me he ka thu me ha hnyi hnyimakö Iehova Khongom, ka habe, Haba kamök, me, at Suria ame he but ka mok, ke e ame he Aigupito ai, kʼ ame laba atkanyua eling, ke e wakhalet thibi; me e ame wia ka hnyei ae gan, ke hwege, ke se hia:

⁶ ke ame okongu ota at Aigupito, me oveci ota, me kunʼ ota ka hnyi huliwa ae hmak:

⁷ ke ötin e tenge kö Iehova Khongon lakamöta, me Iehova ame löng hota hwatenge, ke e ame wâ anyita vec, me anyita huliwa, me hnödra hna oveci ota:

⁸ me Iehova ame hum ota ûheny Aigupito ge hnyam ae hwege, me benyin adre hai, me je ûnyi hnân outen, me je haten, me je ûnyi hnân lâiâ:

⁹ ke e ame hia but hum ota ka hnyi dok ang, me ham köta hnyei ang, hnyei ame di hnen debai me hani.

¹⁰ Ke wâ ju, walang ang, Iehova. Iö, inya oge me hom köu je wan kânâ a bân wale u je hia but ham könya. Ke u me he ka ip e hnyi hnyimakö Iehova Khongom, me khudrung ju hnyi hnyimakö Iehova Khongom:

¹¹ ke u me he ka senyinâ ta je so hia a ham köu Iehova Khongom, me ka ânyâm lap, me at Levi, me atkanyaua unyâm.

¹² Ke u ka hia but ham je ke keihen a libenyitainy jeûiny huna a kuniny, wale huna adre ham je ke keihen a libenyitainy, me u me he ka ham e ka at Levi, me atkanyua, me nakahme, me safac, mʼ ödrin e he ka han sekon hnyi ânyâm je lap;

¹³ ke u me he ka ha hnyi hnyimakö Iehova Khongom, ka habe, Oge hia but hom ta je ûnyi ae kap ûheny hnyi umök uma, ke oge hia but ham e ka at Levi, me atkanyua, me nakahme, me safac, hoton je hna hûna hia, u me hûna könya: oge me ca hanyâûâ ânyâm je hnanyibu hia, ke oge ca hnying e:

¹⁴ oge me ca hia but han ûnyi hnyin hnyi ûen oge me tenge, me hom ûnyi hnyin iny ka bo kong, me ham ûnyi hnyin hobi kâu je komok: oge hia but löng hoton hofuc ho Iehova Khonguk, oge hia but ânyâ hia hoton hnâm hna hûna könya.

¹⁵ Wâ ju eû hnyi hnyabam ae kap ûnyi hnyi drany ethö, me ohnahicâ em hnyei Isaraela, me kûnâ u je ham kohmun, helâji me hnâm hna khemanyin ka lakamöhmun, a hnyei ame di hnen dân basin me hani.

¹⁶ Haba hnyi bong ang Iehova Khongom ame hûna köu he ka vheno je hnanyibu eang, me je hna owisa, ke u me he ka tuö me ânyâ ge hnyekom ae bekhöt, me hanom ae bekhöt.

¹⁷ U je hia but ha muâ hnyi bong ang a haba Iehova me e Khongom, ke ûcû köu he ka vheno deny je gethen, me tuö hnen je hna hûna, me anyin je hnanyibu, me hnen je hna owisa, me löng hoton hwan hofuc:

¹⁸ ke a hia but Iehova ha muâ hnyi bong ang a u hnyei ae ke bongon bi kâu, helâ me hnen hna ha bânâ köu, me u me he ka tuö hnen je hna hûna hia;

¹⁹ kʼ ame he ka obeönuai u hon je hnyei hia e ame op, hnân haisoâ, me hnân ien bi, me hnân ogânâ; mʼ u me he ka hnyei ae kap hobi kö Iehova Khongom hoton hofuc waleji e ame ha.