Deuteronomi 24 - Iaai Bible 1901 (New Caledonia)

¹ AME ne ke baga ame hom momo me faipoipo me, ke e ame ca betenge bi gan, anyin a e ame wâ ke ûnyi ae ca so unyin, me e ame he ka sihnalimen hobi kâu tusiny degec momo, me ham ka hnyi hnyamen, me obâ ûnyi hnyi umen uma.

² Ke e ka hia but didrut, me e khana he ka âiân ke baga bi.

³ Ke ame ne hûkötiâ e ge baga a biliny, kʼ ame ne sihnalimen hobi kâu tusiny degec momo, ke ham ka hnyi hnyamen, me obâ ûnyi hnyi umen uma; ke ame ne mokcu baga a biliny at ame hom e me âiân;

⁴ awe, ame ca he baga a bân waleji a obâ ka hom hmetu, kʼ adre hia but okongoâ; anyin a wale ûnyi ae ikiki hnyi hnyimakö Iehova: ke u me ca he ka bi joniny hnyei a ham köu Iehova Khongom me me em.

⁵ Ame ne ke baga ame hap hoktamomo, me e ame ca he ka tha he me vat, kʼ adre me ca he ka khene hanymen: ke e ame he ka at baû hnyi hnyaban hnyi huna a khaca, me osenyinâ âiân a momo e ame hom.

⁶ Ca he ke at ka hom ûnyi hnân oamamâ, kʼ ame ne vetoiny ethö görany, me me haten bi: anyin a e ame hom melen at me me haten.

⁷ Adre me ne wâ ke at ame venâu liamekeiny mē a at Isaraela, ke ame ânyâ kâu helâ me ka at adre ûco, me ûco bi; awe ame he ka mokcu at venöu eling: helâe u me he ka ohia hulö unyâm.

⁸ Ō u âu ge mok lepera he ka ti wâ wia, me ânyâ helâ me at Levi a tavat bihut ame nʼ öbun: öbun e he ka wâ wia ka ânyâ hoton hnok hna hûna ködra.

⁹ Ûnykûme thö ûnyi a ânyâ Iehova Khongom kö Miriama eû hnyi gethen waleji hnyi ûhebun Aigupito.

¹⁰ U je ne mē ham ke ûnyi ka liamekeiny mou, me u me ca he ka dit ka hnyi umen uma he ka hom haten.

¹¹ Ke u me he ka tot eû hnyi hwanuma, ke hamen at waleji u je mē ham ûnyi kâu he ka hom haten köu eû hnyi hwanuma.

¹² Ke ame ne at ae theduoc, me u me ca he ka tha mokut me haten bi.

¹³ Ke u me he ka ham hmetu kâu haten e ka didrut seûno, me me he ka tha mokut me khaûen bi me hahnahici u: ke wale hwakecâm ae wisa hnyi hnyimakö Iehova Khongom.

¹⁴ U me ca he ka ovecâ at u me hawâ he ka huliwa, a at ae theduoc ke ba ta ûnyi gan, ame ne liamekeiny mou, ame ne atkanyua hnyi em hnyei hnyi ânyâm je taun:

¹⁵ u me he ka bi hwaban hnyi bong bi, kʼ ame ca he ka dit seûno hon; anyin a e theduoc, kʼ ame oûnyihnathoâ hwaban: ke wâ e nye tenge kö Iehova gam, ke wale hulö bi köu.

¹⁶ Adre me ca he ka hlingâ je kamen can je nokon, kʼ adre me ca he ka hlingâ je nokon can je kamen: kʼ adre me he ka ve hlingâ at can anyin hulö bi.

¹⁷ U me ca he ka ohwalö hna owisa ka atkanyua me nakahme; me hom ûkhaûen safac hnân haten:

¹⁸ ke u me he ka ûnykûme hna thaluö u hnyi Aigupito, ke Iehova Khongom ame omeli u ûheny: anyin a wale inya oge me hûna köu he ka ânyâ ûnyi e.

¹⁹ U ka subâ ânyâm hwit hnyi em hnyei, ke u me hnying ke thi hwit hnyi hnyei, me u me ca he ka hmetu ka hom e: ke hobi kâu biju atkanyua, me nakahme, me safac: me me he Iehova Khongom ka ohnahici u hnyi ta je huliwainy li hnyamâm hia.

²⁰ U ka tau halem ûö elaio, me u me ca he hmetu ka elâm hnyi je vheiny: ke hobi kâu biju atkanyua, me nakahme, me safac.

²¹ U ka tau wan halem hnyei vine, me u me ca he hmetu ka hlo hia: ke hobi kâu biju atkanyua, me nakahme, me safac.

²² Ke u me he ka ûnykûme hna thaluö u hnyi hnyei Aigupito: anyin a wale me oge me hûna köu he ka ânyâ ûnyi eling.