Deuteronomi 23 - Iaai Bible 1901 (New Caledonia)

¹ A ME ca he ka hnyi hanen ûkhacaköu anyi Iehova at ae aat wakunyin, kʼ adre subâ degecâ anyin baga.

² Ame ca he nokon gethen ka hnyi hanen ûkhacaköu anyi Iehova; ke ame ca he bala ka hnyi hanen ûkhacaköu anyi Iehova ke ne o but hnyi dö a libenyitainy.

³ Ame ca he at Amona, me at Moaba ka hnyi hanen ûkhacaköu anyi Iehova; kʼ ame ca be balua ke at gadra ka hnyi hanen ûkhacaköu anyi Iehova ke ne o but hnyi dö a libenyitainy:

⁴ anyin a ödra me ca ûkhanöâ möbun jeû me köiö eû hnyi gethen waleji hnyi ûhebun ûheny Aigupito; ke can adre me bi omjeû kö Balaama nöku Beora ûheny Pethora hnyi Mesopotamia, he ka hangö u.

⁵ Ke so bi haba Iehova Khongom ame ca ling Balaama, ke Iehova Khongom ame wia hnaûhangö eling me me hnahic bi, anyin a Iehova Khongom ame hnyok köu.

⁶ U me ca he ka hadruâ anyidra ûsoköu me anyidra hnahic hnyi bongom ta je bong hia nyiele balua.

⁷ U me ca he ka hûkötiâ at Edoma, anyin a e liamekeiny mou: u me ca he ka hûkötiâ at Aigupito anyin a u je laba kanyua hnyi iny hnyei.

⁸ Haba ta je mâtrânidru, me adre me he ka hnyi hanen ûkhacakoû anyi Iehova hnyi dö a kuniny.

⁹ U ka he hnyi vat he ka vat me je iwahnaihmiony mou, me u me he ka naûâ ta je ûnyi hia ae kong.

¹⁰ A ne hu ke at unyâm ame ca bo so can ûnyi a o kâu hnyi hnyinghet, me hamen he ka he ka hnyi hoton hna hunuma, kʼ ame ca he ka hmetu ka hnyi hna hunuma:

¹¹ ke haba hnyi sahac, me e ame he ka soû hnyi köiö: ke ka didrut seûno, me e ame he ka hmetu ka hnyi hna hunuma.

¹² U me he ka hu dok hnyi hoton hna hunuma hnân he ka he ka hnyin:

¹³ ke u me he ka hom ke utsoi a hanen je omjehem vat; ke u ka he hnyot ai e hele, me u me he ka hiny kâu, me hwio he ka konâm hna he ûnyi gam:

¹⁴ anyin a Iehova Khongom ame he hnyi wanben hnâm hna hunuma, he ka omeli u, me hna je iwahnaihmiony mou hnyi hnyimâkâm; anyin a wale ame he ka kap bi hnâm hna hunuma: me me ca he ka wâ unyâm ke ûnyi ae kong, me me hna degeci u.

¹⁵ U me ca he ka hna athnyaba ka tuhan, a at ame kec köu ûnyi ge tuhan:

¹⁶ ke e ame he ka tha laba mou, wale unyâm, hnyi dok e ame he ka ûca hnyi ânyâm je tauu, hoton weny bi: ke u me ca he ka okongoâ.

¹⁷ Ame ca he ka hu momo hnyi gethen a at Isaraela, kʼ ame ca he ka hu at hwen Sodoma unyin obagainy Isaraela.

¹⁸ U me ca he ka hom ka hnyi uma umo Iehova hwaban momo hnyi gethen, ke hwaban kuli hnân bi khöbi: anyin a wale li ûnyi a ikikiâ Iehova Khongom.

¹⁹ U me ca he ka me ham ke ûnyi ge hwaban ka liamekekeiny mou; wale ge hwaban mone, me hwaban jeû, me hwaban ke ûnyi adre labö ham ge hwaban:

²⁰ ke e khatö u he ka me ham ûnyi ge hwaban ka atkanyua; ke u me ca he ka me ham ûnyi ge hwaban ka liamekeiny mou: me me he Iehova Khongom ka ohnahici u hnyi ta je ûnyi hia u me he ka ip li hnyamâm kâu, hnyi hnyei u me he ka hnyin he ka labā.

²¹ U ka bi khöbi kö Iehova Khongom, me u me ca he ka bec he ka thamuâ: anyin ame he Iehova Khongom ka hnö e gam; me wale hulö köu.

²² Ke u je ne ca bi khöbi, me ba monu gam.

²³ Haba hofuc ame he ûheny hnyi li esongodâm, me u me wâ wia he ka ânyâ; hoton hnâm hna bi khöbi kö Iehova Khongom he ka hudo hut ibetengiö, a ûnyi u je ha bânâ ge hnyimâm.

²⁴ U je ne o hnyi hnyei vine iny at ame laba hakekenyi u, me e khatö u he ka ijem je wan vine me me sekom, ke u me ca he ka hitangen hnyi tângâm tang.

²⁵ U je ne o hnyi je hwit anyin at ame laba hakekenyi u, me e khatö u he ka thu je hwit ge hnyamâm; ke u me ca he ka inâ ânyâm hele hnân subâ hwit ka hnyi hwit ame tot anyin at ae hakekeny köu.