Deuteronomi 22 - Iaai Bible 1901 (New Caledonia)

¹ U KA wâ bolok haleny liamekeiny mou ame ne haleny mamoe ame he monu, me u me ca he ka kec hota: ke u me he ka ohmetuhmeto ka liamekeiny mou.

² Ke ame ne ca ûhakekenyi mou liamekeiny mou, ke ca khanö u e, me u me he ka hom e ka hnyi umâm uma, me me tha e mou ke ne o but liamekeiny möu ame elâm, me u me he ka hna hmetu kâu.

³ Ke u me he ka ânyâ helâe ka haleny asina; me u me he ka ânyâ helâe ka anyin ûkhaû; me u me he ka ânyâ helâe ka ta je ûnyi hia a hia anyin liamekeiny möu, wale ame hia gan, ke u je hlo, u me ca he ka laba duöng.

⁴ U me ca he ka wâ asina haleny liamekeiny möu, ame ne bolok ame ta eû hnyi gethen, me u me oiyongi u bi gadrin: ke u me he ka hadruâ he ka otilâ hmetu.

⁵ Ame ca he momo ka khavâ khaûen baga, kʼ ame ca he baga ka khavâ khaûen momo; anyin a hûkötianö Iehova Khongom ödra hia adre me ânyâ helâe.

⁶ Ame ne e bi hnyi hnyimâkâm eû hnyi gethen ke hâûen meno ame gâ, hnyi ûö, ame ne hon kânâ, ae hu lakon a thö, kʼ ame ne ca thö bi, ke ame mokulec lakon ge hinyen, me u me ca he ka tha hom lakon me hinyen:

⁷ ke u me he ka hna but hinyen, ke e khatö u he ka hom lakon nobi köu bi; me u me so, me se hia bongom je bong.

⁸ U je ne up uma a teb ûnyi, me u me he ka bi haginy ethö hnyi ban umâm uma igigilö, wâ e nye takoû umâm uma ge dra, ame ne kolu at ûheny thö.

⁹ U me ca he ka ta hatong a lo li bongon hnyi em hnyei vine: wâ e nye hia but wan hia, wale je hatong u je ta, me wan em hnyei vine.

¹⁰ U me ca he ka wia kânâ ge bolok a tha e me asina.

¹¹ U me ca he ka khavâ mano adre hwâwâ ûnyi hnyi li ûnyi a lo, wale leûnen mamoe me lino.

¹² U me he ka bi bâbuen hnyi je baten ûkhaûâm a vak, wale u je khaûö u kâu.

¹³ Ame ne hom momo hnen ke at me âiân, ke e ame tha laba mē, me hûkötiâ,

¹⁴ me haikongoâ e ge ta je unyi hnân ohmehma, me oâ kâu ien ae kong, me ha, ka habe, Oge hom momo eang, ke iny ka ûhakekenyi mē, me oge me ca wâ haten hlu;

¹⁵ awe, ame he kamen me hinyen hlu ka hom haten anyin hlu, me hom ka wahingatiny taun hnyi homagöule:

¹⁶ ke ame he kamen hlu ka ha ka wahingat, ka habe, Oge ham nokuk ka at ang me âiân, ke e ame hûkötiâ;

¹⁷ ke wâ bi e ame hia but hathoiâ e ge ta je ûnyi hnân ohmehma, kʼ ame ha, ka habe, Oge ca wâ ju haten hlu ge nokom; ke walang haten hlu anyin nokuk. Ke ödru me he ka ulolo ûkhaû hnyi hnyimakan wahingatiny taun.

¹⁸ Ke hamen wahingatiny taun eling ka hom at e me kot.

¹⁹ Ke ödrin e he minya ka ba hwaban kâu a khaca haded ta je sileva, me ham ka kamen hlu, can e ame oâ ien ae kong hon hlu Isaraela: ke ame he bala ka âiân; ke e ame ca he bala ka degec.

²⁰ Ke so bi ame ne hnathu hofuc eling, kʼ adre ca wâ haten anyin hlu;

²¹ me ödrin e he ka hom hlu kâ û ka hnyi hwanumen uma umen kamen, ke ame he aten anyin taun ka luâ e ge veto, me me mokcu: anyin a e ame ânyâ monu hnyi Isaraela, kʼ ame bi ûnyi monu hnyi hnyaban kamen: ke helâe u me he ka ohia hulö unyâm.

²² Adre me ne wâ ke at ame tha mokut me momo a âiân ke baga, me ödru me he ka mok, wale baga at ame tha mokut me momo, ke momo minya: helâe u me he ka ohia hulö unyi Isaraela.

²³ A ne hu ke hlu baû a at ûköcö me baga; ke a wâ ge ke baga bi hnyi taun, kʼ ame tha mokut mê;

²⁴ awe, öbun e he ka hum ödru ka hnyi homagouleny taun eling, me öbun e he ka luʼ ödru ge veto mʼ ödru me mokcu: haba hlu, me can e ame ca kuku ke e hnyi taun; ke haba baga, me can e ame okongo momo anyin ke at: helâe u me he ka ohia hulö ûnyi gam.

²⁵ Ke ame ne ke baga ame wâ hnyi ta hnyei hlu ae hmehmela ke baga, kʼ ame kât e me tha mokut mē; me ame he ka hake mok baga at a tha mokut mē:

²⁶ ke u me ca he ka ânyâ ke ûnyi ka hlu; ke ba monu anyin hlu me me moko: anyin a haba ûnyi eang me helâ me at ame todrö ka at ae hakekeny kân me hlingâ;

²⁷ anyin a e ame wâ e hnyi hnyei; kʼ ame kuku hnen hlu a hmehmela ke at, ke ba at he ka hadruâ.

²⁸ Ame ne ke baga ame wâ hlu baû a at ame ca hmehmela ke at, kʼ ame kât e, ke tha mokut mê, ke adre ö ʼdru;

²⁹ me hamen baga at ame tha mokut mē ka ham ka kamen hlu je sileva a fifte, me ame he ka âiân bi anyin a e ame okongoâ; e ame ca he ka degec e hnyi bongon ta je bong hia.

³⁰ Ame ca he ke at ka hom âiân kamen, ke e ame ca he ka hai hnamejin kamen.