Deuteronomi 21 - Iaai Bible 1901 (New Caledonia)

¹ ADRE me ne wâ komok hnyi hnyei ame ham köu Iehova Khongom me me em, kʼ ame mokut hnyi utkânâ ke ca manen bi at a hlingâ:

² me ame he wahingatâm me hnyat owisa unyâm, ke ödrin e he ka tuluto ûnyi hnyi hnen komok ka hnyi je taun igigilö:

³ ke haba taun ae hakekeny ka hnen komok, me hamen wahingatiny taun eling ka hom ke kau a ca huliwa ehac, ke tiga ca hlihli ûnyi ge ûnyi hnân ûhûkâlâköuâ;

⁴ ke hamen wahingatiny taun eling ka hom kau ka hnyi hnyigöulen bucen ame hingölö hnyin köiö, kʼ adre ca tronenâ me belökâ, me ödrin e he ka thu nyin kau hnyi dok e:

⁵ ke ame he ka ûhakekenyi ge tavat bihut a laku Levi; anyin a hia but Iehova Khongom ucʼ ödrin he ka huliwa kâu, me he ka hahnahicâ hnyi iö Iehova; ke adre me he ka owisa hoton hnödrin hna ha hnyi je ivinö hia me je ûkûc hia:

⁶ kʼ ame he wahingatiny taun eling hia a ödrin hakekenyâ komok he ka hinyem hnyi hon kau adre thu nyin hnyi hnyigöulen bucen:

⁷ ke ödrin e he ka ha, ka habe, A ca hingâlâ dra e ge je hnyamöbmun, ke haba khaca a ca wâ bi ge li emaköhmun.

⁸ Iehova lö, thang monu anyin em hnyei Isaraela waleji u je omelö, ke u me ca he ka ip dra ae ba hulöiny he ka laba hnyi em hnyei a at Isaraela. Me adre me he ka hnʼ ödrin dut ge dra.

⁹ Ke u me he ka ohia unyâm dra ae ba hulöiny, u ka ânyâ ûnyi ae wisa hnyi hnyimakö Iehova.

¹⁰ U ka he ka vat me je iwahnaihmiony mou, ke Iehova Khongom ame ham ödra ka hnyi hnyamâm, ke ödrin e bâ but gam,

¹¹ ke u je wâ momo ae so hmainy unyin je bâ, ke u je bewem, kʼ u je behom e me me âiâm;

¹² awe, u me he ka hom e ke hnyi umâm uma; ke e ame he ka giâ ban, me suba je ûjimen banyen;

¹³ ke e ame he ka uny jut je ûkhaûiny bâ, me laba hnyi umâm uma me tenge ge kamen me hinyen hnyi khaca tehi ae bekhöt: ke hwaban dö e me u me he ka tha laba me, mʼ öbu me liamâiân.

¹⁴ Ke u je ne ca wem momo, me u me he ka hna but e ka hnyi weny bi; ke u me ca he ka ûco e hwaban mone, u me ca he ka tha luâ, anyin a u je hia but okongoâ.

¹⁵ Ame ne lo li momo a li âiân baga a khaca, ke e ame betenge ge khaca, ke hûkötiâ khaca, ke ödru me hia but hnokoâ kâu, a momo e ame betenge gan me momo e ame wâ kongo; ke haba atö, me wale nokon momo adre wâ kongo;

¹⁶ ke haba hnyi bong e ame he ka khenyâ omjehen ka lakon baga, me e ame ca he ka hwio me me atö nokon wale, at e ame betenge gan hon nokon wale e ame wâ kongo, a atö,

¹⁷ ke e ame he ka oûnyihnathoâ atö, a nokon momo e ame hûkötiâ, ge li jekhöû e ame he ka ham, ûnyi hnyi anyin ta je ûnyi hia; anyin a nokon hidröu a e; ke e bi gan hanymen atö.

¹⁸ Ame ne ke at ae hu nokon baga ae ûjöng me ûkhin fuc, kʼ ame höcö löng hwan kamen me hinyen, ke ne ödre hia but kot e, ke e ame ca ling ödru bala bi:

¹⁹ me ame he ka kât e ge kamen me hinyen me hom e ka wahingatiny anyin taun, hnyi homagouleny dok e ame labā;

²⁰ me ödru me he ka ha ka wahingatiny anyin taun, ka habe, Walang hnökuhmu at ame ûjöng me ûkhin hofuc, kʼ ame ca löng hohmu; e at ae hwenhmiâ me monu ge grâg.

²¹ Ke ame he tavat hia hnyi anyin taun ka luâ e ge veto me me mokcu: helâe u me he ka ohia hulö unyâm; kʼ ame he at Isaraela hia ka löng me ot.

²² Ke ame ne he ke at ka ânyâ hulö ae ûcû he ka mok gan, ke adre me hlingâ, me u me he ka uhno e hon ûö:

²³ kʼ ame ca he ka hnen unyin hon ûö hnyi hnyinghet, ke u me he ka konâm e hnyi bong eling; anyin a hnaûhangö ka Khong at adre uhno; me u me ca he ka okongoâ kânâm kânâ hnö Iehova Khongom hna ham köu me em.