Deuteronomi 2 - Iaai Bible 1901 (New Caledonia)

¹ KE ate me hwio me he ka hnyi hnyebuba gethen ka he ka hnyi Köiö ae Dra, hoton hna hûna hnö Iehova könya: ke se hia je bong ate me laba igigilö bucen Seira.

² Ke Iehova ame ha könya, ka habe,

³ Soju hnobun hna laba igigilö bucen eang: hwio thʼ öbun ka hnyi hwadrö.

⁴ Ke ha thö ka tavat, ka habe, Öbun e he ka hanyâûâ hnyigöulen hnyei iny je liamekeiny möbun a lakon Esau, tavat adre me labā Seira; ke adre me he ka outʼ öbun: anyin a wale wâ wiʼ öbun bi:

⁵ ca he öbun ka ivinö mödra; anyin oge me ca he ka ham köbun ûnyi hnyi idra, e ba dok ae ûhnyûkong hmönyin helâ me hnyeuca: anyin oge hia but ham bucen Seira kö Esau hnân iny.

⁶ Öbun e he ka ûcû jeû hwaban mone unyidra, me hnân han; kʼ öbun e he minya ka ûcû köiö unyidra hwaban mone hnân ic.

⁷ Anyin a Iehova Khongom ame hia but ohnahici u hnyi ta je huliwa hia anyin li hnyamâm: e ame wâhmakhmeto hnâm hna vheno hnyebuba eang ae gan: kʼ ame tha e mou Iehova Khongom hnyi ta je huna a fâte; ke ba ke ûnyi a hia gam.

⁸ Waleling mʼ ate me he ûheny unyin je liamekeiny möta a laku Esau, tavat adre me labā Seira gethen hnyi Arabah ûheny Elath, ke ûheny Eziona-gebera. Ke ate me khenyi, me he hnyi gethen ûheny hnyi hnyebuba Moaba.

⁹ Ke haba Iehova ame ha könya, ka habe, Ca he ka okongoâ at Moaba, me vat mödra: anyin oge me ca he ka ham ûnyi hnyi idra hnyei me me em bi; anyin oge hia but ham Aro ka laku Lota me me idra.

¹⁰ (Ame labā eling ehac at Emi, tavat ae gan, ke ödra se hia, ke beû helâ me at Anaka:

¹¹ adre bawʼ ödra me at Refai, helâ me at Anaka; ke haba at Moaba adre me hwenyi iödra, me, at Emi.

¹² Ke haba at Hori adre me labā Seira ehac, kʼ ame hwöhwabödra hnen laku Esau; a ohiʼ ödra hnyi hnyimaködra me labā bi hwabödra: helâ me hna ânyâ hnen at Isaraela hnyi hnyei a idra, waleji Iehova ame ham ködra.)

¹³ Ke todrʼ öbun me hanyâûâ wagewe Zareda. Me ate me he hanyâûâ wagewe Zareda.

¹⁴ Ke haba ûseiny je bong ate me he ûheny Kadesi-banea, ke ne but ate me hanyâûâ wagewe Zareda, me thote eit je huna; ke ne o but ame ba hia döiny aten vat hnyi hnyei, helâ me Iehova ame khemanyin ködra.

¹⁵ Ke haba khaca ame mokut hnyamö Iehova hudrin, he ka ohiʼ ödra ûheny unyin tavat, ke ne o but adre ohiʼ ödra hia thithö.

¹⁶ Ke haba hnyi ûen adre hia but ohia aten vat hia hnyi hnyei, kʼ adre mokcu,

¹⁷ me Iehova ame ha könya, ka habe,

¹⁸ Haba hnyi bong ang u me he ka hanyâûâ Aro, a hnyigöulen Moaba:

¹⁹ ke u ka hakekenyâ laku Amona, ca he ka okongu ödra, ke ca ivinö mödra: anyin oge me ca he ka ham köu ûnyi hnyi hnyei iny laku Amona me me em: anyin oge hia but ham e me me iny laku Lota me me idra.

²⁰ (Adre me hawâ hnyei eling minya me hnyei tiny at Refai: kʼ ame laba eling at Refai ehac; ke ame hwenyi iödra hnen at Amona, me, at Zamezumi;

²¹ ödra tavat ae gan, me se hia, me beû helâ me at Anaka; kʼ ame ohiʼ ödra hnö Iehova hnyi hnyimaködra; kʼ adre me hwöhwabödra, me laba hnyi hnödra:

²² helâ me hnen hna ânyâ hobi kâu laku Esau, tavat adre me labā Seira, waleji hnyi hnen hna ohia at Hori hnyi hnyimaködra; kʼ adre me hwöhwabödra me laba hnyi hnödra ke ne o but hnyi bong ang:

²³ ke haba at Avi tavat adre me laba hnyi je ong taun ke ne o but Gaza, a at Kafetori, a tavat adre o ûheny Kafetori, adre me ohiʼ ödra me laba hnyi hnödra.)

²⁴ Köûö thʼ öbun me he, ke hanyâûâ hnyigöulen bucen e Arenona: wâ bi, oge hia but ham ka hnyi hnyamâm Sihona at Amona, thaniny Hesebona, me iny hnyei: hwân dö he ka hûgûnâ, ke tet metâ kâu hnyi vat.

²⁵ Ke oge me he ka hwân hnyi bong ang he ka okûâ outö u, me me he ka öbubuny gam hnen ta je hnyei hia eang hmeledrany, a tavat adre me löng ânyâm lung, kʼ adre me he ka öbubuny, me hleûhleû gam.

²⁶ Ke oge me kunâ je metu ûheny hnyi hnyebuba e Kademotha kö Sihona than Hesebona, me ta je ûthumetu hnân ûsoköu, ka habe,

²⁷ Iny be wek he ka he hnyi wanben em hnyei: ke oge me he ka he hnyi hna cit gethen, kʼ oge me ca he ka saû ka hnyi ke keihen metâ me me.

²⁸ U me he ka ham könya jeû hwaban mone me inye he ka han; me habelik hwaban mone mʼ inye he ka ic: hnö nya thibi he ka he hnyi hon kânâ;

²⁹ helâ me hna ânyâ könya hnen laku Esau adre me labā Seira, me at Moaba adre me labā Aro; me inye he ka hanyâûâ Joridano ka hnyi hnyei waleji a ham kohmun hnö Iehova Khonguhmun.

³⁰ Ke e höcö Sihona than Hesebona he ka hnʼ ota ka gethen unyin: anyin a Iehova Khongom ame okhötâ hnyekon, me ohwegiâ hnyekon, me me he ka hna e ka hnyi hnyamâm, a helâe hnyi bong ang.

³¹ Ke Iehova ame ha könya, ka habe, Wâ bi oge me hwân ang ka hnö Sihona, me iny hnyei köu hnyi hnyimâkâm: hwân dö he ka hom, mʼ u me he ka labā.

³² Ke ame o thö Sihona ûcûta, a tha e me lakeiny hia me vat e Jahaza.

³³ Ke haba Iehova Khonguta ame hna e köta; mʼ ate me kot e, me lakon, me lakeiny hia.

³⁴ Me ate me hûgûnâ anyin ta je taun hia hnyi ûen eling, me ti ohia je taun adre labā, tha e me je momo me tavat ae ûhnyûkong; ke ba kolon:

³⁵ ke so bi ate me hûgûnâ omeno me haleta, tha e me omjeû ûnyi hnyi taun waleji ate me hûgûnâ.

³⁶ E ba ke taun ae hwege huta, hwân hnyi Aroera hnyi baten hnyigöulen bucen e Arenona, me taun a e hnyi hnyigöulen bucen, ke ne o but Gileada: Iehova Khonguta ame hna but hia köta hnyi hnyima-köta:

³⁷ ke so bi u je ca o ka hnyi hnyei iny laku Amona; me baten hia wagewe Jaboka, me je tauniny bucen, me ta je dok hia ame nyibu öta hnyin Iehova.