Deuteronomi 19 - Iaai Bible 1901 (New Caledonia)

¹ E KA he Iehova Khongom ka subâ degecâ je hnyei wale a ham köu idra Iehova Khongom, ke u je hwöhwabödra, me labā anyidra je taun me umödra je uma;

² me u me he ka kia hobi köu bi kun ta taun hnyi wanben em hnyei wale Iehova Khongom ame he ka ham köu me me em.

³ Ke u me he ka thu gethen, me khenâ je hnyigöulen em hnyei, a ohuâ köu Iehova Khongom, me me kun, me hnân kec ka hnyin ge tavat hia adre me hlingâ at.

⁴ Ke walang hwakecin at ame hlingâ at, a at ame he ka kec kâ e me me möt: haba at ame hlingâ ke at, ke ca ûnykûme he ka ânyâ, kʼ ame ca hûkötiâ ehac;

⁵ helâke at ame tha he me ke at ka hnyi hnyot he ka si uto, kʼ ame hna gö ge hnyamen he ka sö uto, ke ame ok ut ban gö ûnyi hnyi taben me hwâdâ ge ke at, me ame mokcu; awe, e ame he ka kec ka hnyi ke taun eling me me möt bi:

⁶ wâ e nye hnu at ame hlingâ at ge at ame bi hwaban komok, e ka tiga hmönyin hnyekon, me kât e, anyin ae sâkâû gethen, me ame kot moko e; ke ca ûcû kâu he ka mok, anyin a e ame ca hûkötiâ ehac.

⁷ Anyin a wale oge me hûna köu, ka habe, U ma he ka ke ip kun ta taun hobi köu bi.

⁸ Ke ame ne he Iehova Khongom ka olauâ em hnyei, helâji me hnen hna khemanyin ka lakâmâm, me ham köu hnyei hia waleji e ame ha bânâ he ka ham ka lakâmâm;

⁹ ke u je ne tuö je hna hûna hia eang he ka ânyâ, wale oge me hûna köu hnyi bong ang, he ka hnyok kö Iehova Khongom, me vheno bala deny je gethen; me u me he ka bi hanen ke je taun a kun minya hnân hobi köu, ke ca ha bi kun eling:

¹⁰ mʼ adre me ca he ka hingâlâ dra ae ba hulöiny hnyi em hnyei a ham köu Iehova Khongom me me em, me ame takû u ge dra.

¹¹ Ke ame ne ke at ame hûkötiâ ke at, kʼ ame mokut iyawâ, kʼ ame köûö thö kâu, me kot e me me mokcu; ke e ame kec ka hnyi ke taun eling:

¹² awe, ame he wahingatiny anyin taun ka ûkhûnöng he ka hom e ûheny e, me hna e ka at ame bi hwaban komok, me me mokcu.

¹³ Ca he emakâm ka betenge gan, ke u me he ka ohia dra ae ba hulöiny ûnyi hnyi Isaraela, mʼ u me so bi.

¹⁴ U me ca he ka uny haten hnyigöulen ke at, waleji adre ip kâû ehac, hnyi em hnyei u me he ka labā, wale hnyei a ham köu Iehova Khongom, me em.

¹⁵ Ame ca he bi at a khaca ka tot me ohnathoâ ge at hnyi anyin monu, ame ne ke hulö, hnyi ke hulö e ame ânyâ; ke adre me he he ka ohmâ ke ûnyi ge ifucin li at ohnatho, ame ne kun.

¹⁶ Ame ne tot ke at ohnatho ae ca wisa ka ke at he ka haikongoâ;

¹⁷ me hamödru a li at ivinö he ka tha tot hnyi hnyimakö Iehova, hnyi hnyimakan hnyat bihut, me hnyat owisa hnyi ûen eling;

¹⁸ ke hamen hnyat owisa he ka ûhnö wia; ke wâ bi, ame ne at thoi at ohnatho, kʼ ame hia but hathoiâ liamekeiny mē;

¹⁹ awe, hamöbun he ka ânyâ kâu helâ me hnen hna ûnykûme he ka ânyâ ka liamekeiny mē: helâe u me he ka ohia hulö unyâm.

²⁰ Me me löng me ot ge kolon tavat, me ca ânyâ hmetu balua ûnyi helâe ae kong unyâm.

²¹ Ca he emakâm ka betenge; ke haba möt me hwaban möt, ke ecmak hwaban ecmak, ke nyu hwaban nyu, ke hnyam hwaban hnyam, ke can hwaban can.