Deuteronomi 18 - Iaai Bible 1901 (New Caledonia)

¹ A ME ca he tavat bihut a at Levi unyi Isaraela, a tribu Levi hia ka hu jekhon me hnyei: ke ödrin e he ka han je hut a an ge meic kö Iehova, a jekhon.

² Ke ödrin e ca he ka hu hwajeköudrin unyin je liamekeiny mödrin: haba Iehova hwajeköudrin, helâ me hnen hna ha ködrin.

³ Ke walang jekhon tavat bihut ûnyi hnyi hnyei, a ûnyi ge tavat adre me hudo je hut, ame ne bolok, ame ne mamoe, me adre me he ka ham ka at bihut bajebenyin me li wahicen, me tangen han.

⁴ U me he ka ham kâu ge ânyâm hwit a bân, me ânyâm waina, me ânyâm wakaco, me ânyâm leûnen mamoe adre subâ a bân.

⁵ Anyin a Iehova Khongom ame hia but ûco e ûnyi hnyi ânyâm je tribu hia, he ka labö huliwa hnyi iö Iehova, a e, me lakon je baga nyiele balua.

⁶ Ke ame ne o ke at Levi ûnyi hnyi je homagöulem hnyi Isaraela hia, a dok e ame me laba hnyin, kʼ ame o me weny hnyekon ae bekhöt ka hnyi dok ame he Iehova ka ûca;

⁷ awe, e ame he ka huliwa hnyi iö Iehova Khongon helâ me je liamekeiny mē a at Levi, tavat ödrin e tot eling hnyi hnyimakö Iehova.

⁸ Kʼ ödrin e he ka hu jekhon ae ûcû unyin keihen, ke ca ha bi hna ûco hobi ködrin je ûnyi hnyi iny lakamen.

⁹ U ka o but ka hnyi hnyei ame ham köu Iehova Khongom, me u me ca he ka nâ he ka ânyâ hoton hwakecin ae ikiki anyin tavat eling.

¹⁰ E so adre me ca he ka wâ unyâm ke at ame kunâ nokon baga me nokon hlu he ka he hnyi wanben meic, me at bi khong, me at ame bibihwakeoin, me at ae tren khong,

¹¹ me at ame ûhnenamö me je hanu, me at ame biobotkong, me perofeta thoi, me at ame ûhnenamö me hanon je komok.

¹² Anyin a Iehova ame ikikiâ tavat adre me ânyâ ta je ûnyi e: ke haba can ta je ûnyi eling ae ikiki, me Iehova Khongom ame obʼ ödra hnyi hnyimâkâm.

¹³ U me he ka ti wisa kö Iehova Khongom.

¹⁴ Amyin a haba je hnyei eling u me he ka hu, me, adre me löng hoton tavat bihihwakecin, me tavat bi khong: ke haba u, me Iehova Khongom ame ca hnö u he ka helâe.

¹⁵ Ke ame he Iehova Khongom ka oâ köu perofeta ae ûcû mönya ûheny unyâm a ûnyi ge je liamekeiny mou; mʼ öbun e he ka löng kâu;

¹⁶ a helâ me wem hia ûnyi ga Iehova Khongom hnyi Horeba, waleji hnyi bong adre ûkhacaköu hnyin, ka habe, Ö iny ca he hmetu ka löng ifuci Iehova Khonguk, me wâ hmetu meic ae gan eling, mʼ inye ca he ka mokcu.

¹⁷ Ke haba Iehova ame ha könya, ka habe, E so hnödrin hna ha.

¹⁸ Me oge me he ka oâ hobi ködra ke perofeta ûnyi ge je liamekeiny mödra; me oge me he ka ip hok je hofuc hnyi hnyimen, me e ame he ka ha ködra ta je ûnyi hia oge me he ka ha kâu.

¹⁹ Ke haba at ame ca he bi ka löng hok je kofuc wale e ame he ka ha hnyi iök, me oge me he ka hnö e gan.

²⁰ Ke haba perofeta ame he ka ha sheshamökâ ke hofuc hnyi iök, waleji oge me ca hûna kâu he ka ha; kʼ ame ne fuc hnyi ien ke je khong, awe, ame he ka mok perofeta eling.

²¹ Ke u je ne he ka ha eû hnyi hnyekom, ka habe, Ohmun e he ka kâmâu hna wâhmakhmeto hofuc a ca ha Iehova?

²² Haba, e ka he perofeta ka ha hofuc hnyi iö Iehova, kʼ ame ca o bi ûnyi, kʼ ame ca hwâdâ bi, awe, wale hofuc ame ca ha Iehova: ke ame hia but ha e sheshamökâ hnen perofeta, mʼ u me ca he ka outen at e.